Read lango Danieri 7 Bible Online

Danieri 7 - lango bible

Danieri 7

¹I mwaka me agege me loc a Belcajar abaka me Babulon, Danieri oleko lek, kun onyutte gigi mogo i kare ame en tye obuto piny i ka buto mere. En te coyo lekkere-nono oko piny, te daŋ kobo gin ame eleko-nono oko.

²Danieri okobo kit man: “Nen ba, dyewor i waŋ lek, onyutta yamo aŋwen i polo, ame tye ka kodo i twoke aŋwen ducu kun rurubo pii ame tye i twon nammoro adwoŋ meicel.

³Dok ate neno daŋ leyi mogo adoŋo aŋwen kun otye odonnyo i dye nam, kun acel acel i akinagi pat apata owote mere.

⁴Lee me agege onwoŋo cal eŋatu, kun bwome tye calo me a cur. I kare ame atye aneno, ote puto bwome oko, ote tiŋo lee-nono oko i lobo, ote miyo wot cuŋ i tyene aryo calo dano; ote miye cuny ame dano tye kede.”

⁵Dok ate ru neno lee ocele me aryo mere, ame onwoŋo calo dubu. Tyene tuncel onwoŋo otiŋere malo, riŋo amara onwoŋo tye adek iyi doge i akina lake; rik ote kobbe ni, “Ya malo, imwod riŋo adwoŋ.”

⁶Dok ate ru neno lee ocele mere ame calo kwac, ame bwome tye aŋwen i nee calo me a winyo; wie onwoŋo tye aŋwen twal; mannono onwoŋo tye kede twer me loc.

⁷I ŋe man i dyeworrono, dok ate ru neno lee ocele me aŋwennere. Twon lee moro ame neno iyiliyili, ame mio jo twon lworo adwoŋ meicel, dok tek okato kare oko; tye i twoni lakkogo me nyonyo; obedo mwodo riŋo leyi kun tuturo cogogi oko atitino, te nyonyono en odoŋŋere oko i tyene. En onwoŋo pat meicel i leyi ame ageo neno luŋ, tuŋe onwoŋo tye apar twal.

⁸Kare ame pwod atye ka paro kop i kom tuŋe apar-ri, tuŋe ocele atidi te dok donnyo i akina owote mere; kare ame tuŋe-nono odonnyo, tuŋe adek i akina maka me agege-ca oputte i tergi luŋ. Tuŋe-nono onwoŋo tye i waŋŋogo ame calo waŋ dano, kede dog ame tye ka kobo koppogo adoŋodoŋo.

⁹I kare ame atye aneno, dok ate neno kome me loc ame ocicibo, ŋattoro ame operakino meicel te bino i wik ommere, boŋo mere onwoŋo tar calo pee, yer wie te tar calo yer romo ame olwoko odoco, kommere onwoŋo lyel alyela calo leb mac, kun okottere calo mac ame tye ka waŋ.

¹⁰Kulo me mac te cako mol, kun mol ya i nyime kuno; jo tutumia i tutumia onwoŋo tye ka tic pire, kun jo tutumia apar tyen tutumia apar tye ocuŋ i nyime, dok onwoŋo otye ka ŋolo kop a jo, kun buke tye ame oyabere ayaba.

¹¹I caa-nono abedo neno pien tuŋ lee onwoŋo tye ka kobo twoni koppogo adoŋodoŋo, kun akobo i dwon aloŋo meicel. I kare ame pwod atye anenonono, ote neko lee-nono oko, ote waŋo kome oko kede mac.

¹²Aco leyi ocele mege ca ote gamo locgi oko, cite kwogi kon ote weko bedo kwo pi kare moro anonok.

¹³I kare ame atye ka neno anyuttono, i dyeworrono, aneno anyuttogo acalo magi: Aneno dano moro ame calo wot a dano, ame abino i pol kun oya i polo, en te bino baŋ ŋat ame operakino meicel, otere naka i nyime.

¹⁴Rik ote miye loc, loc luŋ aluŋa kede kwogo ame tye iye, me rok luŋ ame kobo leb apapat, myero ti tic pire; loccere bino bedo loc ame pera-kino nakanaka, loccere mom bino gik kadi acel, dok loccere gire mom obino turo.

¹⁵“Aco an Danieri cunya onwoŋo oballe doŋ oko pi lek ame obino i wianono.

¹⁶An ate wot baŋ dano moro acel ame onwoŋo tye i akina jo ame tye kuno, me en niaŋa kop me ateni i kom lek man, En te titta, omia aŋeo kop me lek ame aleko luŋ.

¹⁷Leyi aŋwen adoŋo obedo obakki aŋwen ame bino loc i lobo,

¹⁸Ento jo acil ame obedo jo a Ŋat Amalo Meicel en ame bino gamo loccono, loccono te bedo meggi waŋ i waŋ.

¹⁹“Dok ate mito ni myero aŋe kop i kom lee aŋwen ame onwoŋo pat apata i leyi ocele-ca, ame onwoŋo iyiliyili meicel, kun tye i lake me nyonyo kede lwete luŋ me mola; ame omwodo rujo leyi, kun tuturo cogogi oko atitino, te nyono en odoŋŋere oko i tyene.

²⁰Dok ate mito ŋeyo daŋ kop i kom tuŋ apar ame onwoŋo tye i wi lee-naca kede dok tuŋe ocele ame te dok donnyo iceni ame te miyo tuŋ adek me agege-ca mukere oko, tuŋe ame onwoŋo tye iye waŋŋogo kede doge ame te kobo koppogo adoŋodoŋo, dok ame onwoŋo nen calo dwoŋ kato owote mere oko ca.

²¹I kare ame onwoŋo pwod atye aneno, tuŋe-nono te cako lweny i jo acil,

²²te daŋ loyogi oko, tuno waŋ ame ŋat operakino meicel-ca obino, en omio ote doŋ ŋolo kop a jo acil, ame gin obedo jo a ŋat Amalo Meicel, kare te romo, eka jo acil te doŋ gamo loc.

²³Dano-nono te kobo ni, ‘Kop i kom lee me aŋwen, loc me aŋwen bino bedo tye i lobo, loccono bino bedo pat i loc ocele, loccono bino romo lobo luŋ, bino nyono oko i tyene, bino ŋido oko atitino.

²⁴Aco tuŋ apar ca, i kom loccono obakki apar bino loyo loc iye; ŋat ocele dok bino donnyo i ŋegi, en bino bedo apat i me agege-ca, en bino turo loc obakki adek oko.

²⁵En bino kobo kop arac i kom Ŋat Amalo meicel, bino wuno jo acil ame obedo jo a Ŋat Amalo Meicel, bino temo loko karegi me woro Obaŋa kede cik Obaŋa. Obino miyo jo acil i ciŋe, pi mwakki adek kede nucu,

²⁶Cite okiko me ŋolo kop i kome bino bedo tye, loccere obino gamo oko, obino balo ote jwero oko naka i agikki mere.

²⁷Doŋ teko kede twer a loc luŋ ame tye i lobo, obino miyo luŋ baŋ jo acil ame obedo jo a Ŋat Amalo Meicel. Locgi bino bedo loc ame pera-kino waŋ i waŋ, loc luŋ me lobo bino worogi kun tio pirgi.’

²⁸“Agikki me kop man tye kitti. An Danieri, tamma onwoŋo omio cunya opoto meicel, koma daŋ te balle oko, cite akano kop man i cunya.”