Read lango Danieri 8 Bible Online

Danieri 8 - lango bible

Danieri 8

¹I mwaka me adek me loc abaka Belcajar, anyuttogo onen baŋa an Danieri i wan lek, kun doŋ atyeko neno maca me agege-ca oko.

²I kare ame aneno anyut ame onen baŋa i waŋ lekkono, aneno ni doŋ tye i boma me Cuca, ame tye i lobo me Elam; dok daŋ aneno ni onwoŋo atye i dog kulo me Ulai.

³Atiŋo waŋa malo ate neno nyok romo ame ocuŋ i wi tela i dog kulo. Nyok romo-nono onwoŋo tye kede tuŋe aryo, tuŋe aryo-nono luŋ onwoŋo bocoboco, cite acel onwoŋo kato awottere oko; en aborrere onwoŋo otu icen.

⁴Aneno nyok romo-nono kun tye ka mwomere tuŋŋi i tuŋŋi, ogeo mwomere tuŋ to, te mwomere tuŋ anyarodi, eka dok te mwomere tuŋ anyarolum; lee moro onwoŋo mom romo cuŋ i nyime, dok onwoŋo mom tye ŋattoro ame twero larogi i teko mere. En rik timo gin ame yie mito kun daŋ dwore gire kene.

⁵I kare ame pwod atye alwodo kop man i cunya, dok ate neno nyok dyelloro tye abino i tuŋ to, kun ŋolo dye lobo arii, ame tyene mom agudo piny, Nyok dyellono onwoŋo tye kede twon tuŋe acel keken i akina waŋe.

⁶Dyellono te wot baŋ romo ame tye kede tuŋe aryo-ca, ame onwoŋo aneno tye ocuŋ i wi tela i ŋet kulo ca, en te mwomere i kome i twon akemo adwoŋ meicel.

⁷Anene i kare ame en doŋ onoko romo-ca, akemo te miyo bedo ager meicel, omio te dipo nyok romo muko tuŋe aryo-ca oko, nyok romo onwoŋo mom tye kede teko me cuŋ i nyime. En te reto nyok romo oko piny, te bedo nyonyono, kun mom tye ŋattoro ame twero laro nyok romo i baŋe.

⁸Nyok dyel te doŋ yon atek meicel. Ento i kare ame onwoŋo en tek wokkono, twon tuŋe acel-ca te tur oko, eka akaka mannono oturrono te donnyo tuŋe ocele aŋwen ame nen i teŋe, ame otikere i yamo aŋwen ame onwoŋo tye akodo i polo.

⁹Dok ate neno tuŋe ocele atidi mere ocako donnyo i akina tuŋe acel i akina maka aŋwen-ca, eka te doŋo abor meicel kun oleŋere odok tutuŋ anyarolum kede tutuŋ kide, ame otikere i lobo me kwogo.

¹⁰Odoŋo abor atek meicel ame te tuno naka kan ame mony me polo tye iye, ame te bolo acerrogo oko piny, te daŋ nyonyono oko i tyene.

¹¹En te doŋ yon okato kare naka i kom Aloc ame loo mony me polo; ogiko tic me yalo oko i mot awaŋa ame onwoŋo otimo kare ducu, dok te giko daŋ tic me wore oko, kun babalo kabedo acil ame rik owore iye oko,

¹²Rik ote miye mony me polo kede mot awaŋa me nino i nino pi bai, wi jo te wil oko i kop me ateni, tuŋŋono te bedo tic kun medde ameda i bedo atek.

¹³Dok ate winyo amalaika tye ka kop kede amalaika wadgi, awinyo ka acel gamo kop awottere ni, “Anyut ame onyuto i mot awaŋa me nino i nino myero ri pi kare ame rom mene, dok bal ame mio gigi mogo ame neno lik timere, myero mi pi kare a rom mene, karacel kede miyo ka woro Obaŋa me mony me polo bed me anyona piny i tyen?”

¹⁴Awottere te gamo ni, “Tuno ka odiko kede otyeno doŋ okato ame romo tyen tutumia aryo kede mia adek nono; eka ote doŋ dwoko ot woro Obaŋa kakare.”

¹⁵Kare ame an Danieri atyeko neno, amito ni myero aniaŋ iye; i caa-nono ŋattoro ame cal i dano te bino cuŋ i nyima.

¹⁶An ate winyo dwon ŋattoro ame tye ka kato i wi tela i ŋet kulo me Ulai, ame kobo ni, “Gabriel we, mi dano-nu niaŋ ayut ame eneno i wan lek.”

¹⁷Dano-nono te bino aceggi keda kan ame onwoŋo acuŋ iye. Lworo omaka, omio ate rette piny aryeba cuny. Cite en te kobba ni, “Yin wot a dano, myero iniaŋ ni anyuttono mako kop i kom agikki me jami luŋ i lobo.”

¹⁸Kare ame en tye ka kop keda, an ate cako nino atek meicel kun akula wia piny i lobo, en te maka miya ya cuŋ acuŋa kede tyena.

¹⁹En te kobba ni, “Nen ba, abino miyi iŋeo gin ame bino timere i kare ame akemo Obaŋa bino gik iye; pien koppere mako nino me agikki ame yam doŋ otyeko ciko pire con.

²⁰Romo ame yin ineno ame tuŋe tye aryo, mannono obedo obakki aryo me Medi kede me Pacia.

²¹Aco nyok dyel obedo twon abaka atek me Grik; tuŋ odoŋo abor meicel i akina waŋe obedo abaka me agege.

²²Tuŋ ame otur, eka aŋwen ocele te tu kakare, mannono loc aŋwen apapat ame bino leyo kakare, kun tekogi mom rom kede mege.

²³“Kare ame doŋ loc obakki aŋwennono ceggi gik, ame balgi doŋ rac dok bup okato kare, abaka moro ame kwiri bino cako loc, ame obedo dano ame twero roto gigi mogo me ryeko,

²⁴Abaka-nono bino bedo atek meicel, bino timo jami mogo ame mio jo lworo, dok jami luŋ ame en tio bino wot aber. En bino neko twoni jo ame tek i lweny karacel kede rok a jo acil.

²⁵Pi ryeko mere ame calo ryeko apwo, en bino medde ameda i ryeko me bwolo jo, dok en bino bedo dworre kenekene i cunye. En bino neko jo apol meicel kun nwoŋo gin mom ocako lweny i komgi atura; bino cako lweny anaka i kom Aloc ame loo luŋ cite nen ba, obino rete piny kun ciŋ dano mom ogude.

²⁶Anyut ame ineno i waŋ lek ame onyuto iye kop i kom mot awaŋa me odiko kede otyeno tye ateni, Cite myero igwok acalo kop me imuŋ i cunyi, pien bino tyeko kare alac kun gin ame onyutti-nono mom ru otimere.”

²⁷Ryeko onwoŋo orywenya oko two te maka, ate bu to kon piny pi kare abubup, icennere ate doŋ ya wot tiyo tic abaka, Ento abedo wuro gin ame aneno i waŋ lekkono meicel, dok naka mom aniaŋ gira iye.