Read lango Danieri 9 Bible Online

Danieri 9 - lango bible

Danieri 9

¹I mwaka me agege me loc a Dario wot Akacuwera, ame en anywalli me Medi, ame rik odoko abaka ame loo jo Kaldaya.

²I mwaka me agege me loccere, i kare ame an Danieri onwoŋo abedo kwano buke, anwoŋo kop ame yam Rwot omio adwarpiny Jeremia okobo gin ame myero koŋ ge timere kun Jerucalem pwod tye acalo wi obur; ate nwoŋo wei mwaka ame onyuto ni bino romo pyerabiro twal.

³Man omio alokere baŋ Rwot Obaŋa, ate cako kok baŋe kun abako doga akwae, dok daŋ ari kec, ame aruko boŋo cola dok daŋ ajuko koma kede buru.

⁴Abedo kwayo Rwot Obaŋana, kun atuco balwa i nyime akobo ni, “Ama Rwot, ame ibedo twon Obaŋa moro ame iyiliyili, ame gwoko cikere mere kede mar a mom lokere baŋ jo ame mare dok mako cikkere.

⁵Wan giwa otyeko balo i nyimi, dok otimo gin arac, obedo daŋ timo tim arac kun ojem i komi, olokere teŋe i luba cikki kede gin ame yam iciko.

⁶Okwero-gu winyo kop omironi odwarpiny, ame obedo kobo kopgi i nyiŋi baŋ obakkiwa, olocwa, kede baŋ kwariwa, kede dok baŋ jo luŋ me lobowa.

⁷Kite atira gire tye baŋi yin keken, Amaa Rwot, aco wan luŋ lewic doŋ omio waŋwa oballe oko, kite ame tye kede i kare-ni. Kite ame tye kede baŋ jo ame bedo i Juda, jo ame bedo i Jerucalem, kede i kom jo Icrael luŋ, jo ame bedo kan aceggi kede jo ame bedo kannabor i lobo ame yam iryemogi iye luŋ, pi timo tim me erupe ame gin obedo timo i komi.

⁸Lewic doŋ omio waŋwa oballe oko, Ama Rwot, waŋ obakkiwa, olocwa luŋ, kede waŋ kwariwa, pien wan luŋ otimo bal i nyimi,

⁹Rwot Obaŋawa akica dok daŋ weko bal pien wan ojem i kome,

¹⁰wan mom owinyo kop a Rwot Obaŋawa, kun olubo cikkere ame en omiowa ame omiro mere odwarpiny otittiwa.

¹¹Jo Icrael luŋ oturo cikki, ote daŋ lokki ŋegi, kun mom owinyo koppi. Mannono omio cen kede kop me kwon ame ocoo i buk a Muca amiro Obaŋa ocoro i komwa, pien wan obalo i nyime,

¹²En otyeko moko koppere ame en rik okobo i komwa kede i kom olocwa, omio imiowa can adwoŋ meicel. Pien gin ame itimo i kom Jerucalem yam mom ru otimere kadi acel i lobo kan.

¹³Can man luŋ ame otyeko coyo i buk a Muca doŋ otyeko timere i komwa, cite kadi amannono, naka am an wan mom ru otemo yomoro cunyi i yore moro, mom oye weko bal wa ote cako lubo atenini.

¹⁴Man en omio Rwot onwoŋo oyiko can man oko pirwa, te daŋ miyo bino i komwa, Rwot Obaŋawa genne i ginnoro luŋ ame en tio, ento wan mom owinyo koppere.

¹⁵“Doŋ aman ba, Ama Rwot Obaŋawa, ame rik ikwanyo joni i lobo me Miciri i twon tekoni adwoŋ, ame te miyo nyiŋi rwo naka atot tin, wan gire obalo i nyimi, dok daŋ otimo gin arac.

¹⁶Ama Rwot kite acalo yin gire igenne i gin ame itimo, tim ber ilok tammi, iwek akemo kede iniga ame itye kede i kom Jerucalem bedi, nen Jerucalem obedo boma acil. Jo luŋ ame tye i ŋetwa tye ka kobo kop arac i ko mwa kede i kom Jerucalem pi balwa kede me a kwariwa.

¹⁷Doŋ ba, Ama Rwot Obaŋawa, tim ber iwiny kwacca an amironi ame abako doga i nyimi. Tim ber, pi nyiŋi, imi kica omaki i kom ot me wori ame aman doŋ tye i wi obur.

¹⁸Ama Rwot Obaŋana, cik yiti iwiny koppa. Yab waŋi, inena, Ama Rwot, nen boma ame olwoŋo kede nyiŋi. Wan giwa mom otye ka bako dogwa baŋi me nyuto kite atira, cite pien yin kicani dwoŋ.

¹⁹Ama Rwot winy kwacca, Ama Rwot tim kica; Ama Rwot cik yiti ite daŋ timo ginnoro oko, Tim ber, kur dok igal, po piri Ama Rwot, pien bomani kede joni olwono kede nyiŋi.”

²⁰I kare ame a tye ka kop kun akwayo Obaŋa, atuco balla kede bal a jona, dok abako doga baŋ Rwot Obaŋana, pi wi kidi acil ame obedo me Obaŋana.

²¹I kare ame at ye ka kwayo Obaŋa kun akop, dano ame nyiŋe Gabriel ame onwoŋo koŋ ageo neno i waŋ lek iyi anyut me agege, te ru bino baŋa oyotoyot, kun ŋweco adwir meicel i caa me yalo Obaŋa i mot otyeno.

²²En obino te bino kobba ni, “Danieri we, an abino me bino miyi ryeko kede niaŋ atut.

²³Nen ba, i kare ame pwod igeo bako dogi abaka baŋ Obaŋa, kopporo okato ame oya i baŋ Obaŋa, ame aman an abino me titti koppono, pien Obaŋa mari meicel. Pi mannono ba, tam koppono me iniaŋ gin ame onyutti i waŋ lek.

²⁴“Mwaka mia aŋwen kede pyeraboŋwen en ame obedo kare ame Rwot Obaŋa omoko pi jowu kede bomawu acil me tyeko bal oko me turo cik, me giko bal, kede me kwanyo bal oko i komwu, ote dok kela kite atira ame perakino nakanaka, me wek anyut kede kop odwarpiny ocobere kakare, kede dok wiro kabedo man acil akato ducu-ni kede moo,

²⁵Doŋ amito iŋe dok iniaŋ aber ni cakere i kare ame cik me gero, dok Jerucalem owoto oko pi kuro bino a dano ame owiro kede moo, ame en aloc, mwaka pyeraŋwen wie aboŋwen bino kon kato. Obino dok gero Jerucalem odoco, kede yo luŋ ame tye iye, kun tye apama cel otoro atora, eka te ri pi mwakki mia aŋwen kede pyeradek wie aŋwen, cite obino gero i kare ame peko tye.

²⁶I ŋe mwaka mia aŋwen kede pyeradek wie aŋwen, dano ame owiro kede moo obino neko oko, kun ŋat ocele mom dok leo kakare; mony ocele ame bino bi no kede alocgi bino turo boma oko, karacel kede kabedo acil. Agikki mere doŋ bino bedo calo abwal pii, lweny doŋ te erre agwa naka iyi agikki; mannono en ame obedo can ame yam Rwot ociko pire.

²⁷Dano-nono bino moko cikkere i jo apol pi mwakki abiro; en bi no miyo tic me yalo Obaŋa gik koŋ oko pi mwakki adek kede nucu. Dano ame bino balo piny odoco-nono bino bino kun oboo kome i timmogo me kwer, tuno ka kare ame rik Obaŋa oyiko pire doŋ oromo.”