Read lango Kocea 1 Bible Online

Kocea 1 - lango bible

Kocea 1

¹Kop a Rwot ame rik obino baŋ Kocea wot a Beeri, i kare obakki Ujjia, Yotam, Akaj kede Kejekia, ame gin onwoŋo obedo obakki me Juda, kede i kare abaka Jeroboam wot a Yoaci ame onwoŋo obedo abaka me Icrael.

²Kare ame Rwot ogeo kop baŋ Kocea, Rwot okobbi Kocea ni, “Wot i nyom nyako ame alaya me inwoŋ itino ame onywalo i tim me alaya, pien lobo odoko twon alaya pi kwero lubo Rwot”

³Kocea te wot nyomo Gomer nyaka Didaim, eka te yac, te nywalo atin awobi.

⁴Rwot te kobbi Kocea ni, “Cak nyiŋe ni Jejreel, pien odoŋ kare anonok, abino keto can i kom ot a Yeko pi remo a Jejreel, dok abino miyo loc me ot Icrael gik oko.

⁵Dok daŋ i nino-nono abino turo akud atero Icrael oko i luŋ me Jejreel.”

⁶Gomer dok te yac, te nywalo atin nyako, Rwot te kobbi Kocea ni, “Cak nyiŋe Lo-rukama[1] pien mom dok abino medde timo kica i ot Icrael, mom abino weko balgi kadi acel.

⁷Cite abino timo kica i ot a Juda, abino larogi pi tek a Rwot Obaŋagi; mom abino larogi kede akud atero, kadi i pala romo, onyo i mony, onyo kede aguragura, kadi wegi aguragura.”

⁸Kare ame Gomer doŋ oryemo atin oko i cak, dok te yac, te nywalo awobi.

⁹Rwot te kobo ni, “Cak nyiŋe ni Lo-ammi[2], pien wun mom ibedo wunu jona, dok an daŋ mom abedo Obaŋawu.”

¹⁰Cite wel a jo Icrael bino bedo acalli kwoyo me dog nam, ame mom pimere, dok a mom romo akwana; dok daŋ i kabedo ame rik okobbigi iye ni “Wun mom i jona wunu,” obino kobbigi iye ni, “Itino Obaŋa akwo.”

¹¹Jo me Juda kede jo me Icrael bino cokere karacel, ote keto ŋat acel ame telo wigi, eka gm te ya oko i lobo-nono, pien nino a Jejreel bino bedo nino adwoŋ meicel.