Read lango Kocea 10 Bible Online

Kocea 10 - lango bible

Kocea 10

¹Icrael obedo calo olok ame nyak amwonya meicel, ame nyige cek meicel. Ka nyige omedo nyak atek, gin daŋ medo cano keno lamgi apol apola; ka lobo mere omedde bedo aber, gin daŋ omedo yiko kiddigi me awora bedo abeco.

²Cunygi tye opoŋ i goba; aman gin doŋ myero nen can pi balgi. Rwot ikome en a doŋ bino mumuko keno lamgi-nono dok en daŋ bino reto kiddigi oko ame gin ocibo me awora.

³Aman doŋ gin myero kob ni, “Abakawa gire pe, pien wan giwa mom olworo Rwot, kara abaka doŋ twero timo ŋo pirwa?”

⁴Gin kom oduro doggi nono, ocikere i kwoŋŋogo me nono. Mannono gire miyo ŋolo kop durre adura, calo yat ame neko jo ame tu i poto ame opuro.

⁵Jo ame bedo i Camaria komgi myel, pi atin twon me Bet-awen. Jo mere bino kumo pire olamdoggere ame woro cal jokkono bino koke, pi kwogo mere ame oya oko baŋe.

⁶Obino gire tero oko i Acuria, me mot baŋ abaka adwoŋ. Obino miyo lewic mako Epraim, aco Icrael lewic bino mako pi cal jokkere.

⁷Abaka me Camaria bino gire rwenyo oko bala dul yat ame alelea i wi pii.

⁸Ka woro Obaŋa a tye i wi kidi me Awen, obino gire rwenyo oko kan ame Icrael timo bal iye. Okuto kede ocokocok bino tu i wi keno lamgi, gin bino kobbi kiddi adoŋo ni, “Wumwa wunu” kede kiddi atino ni, “Rette wunu i komwa.”

⁹Yin Icrael ibedo bal cakere i kare me Gibea; cakere i kuno gin obedo medde ameda iye. Mony mom bino cobogi i Gibea kuno?

¹⁰An doŋ abino me pwodogi; orok bino cokere karacel komgi i kare ame apwodogi pi balgi aryo.

¹¹Epraim calo roya ame opwonyo, ame maro dino bel, cite an aketo lodi i ŋute aber-ri. Aketo Epraim i waya kweri, Juda myero pur gire, Yakobo myero lok poto mere kene.

¹²Koti icoyo wunu myero bed tim me kite atira, eka adwoggi mere te bedo mar a mom lokere. Pur wunu poto anyen, pien man kare me yenyo Rwot, me en bin mi larre cwe i komwu bala kot.

¹³Rik ipuro wunu bal, omio ikao wunu kite a mom atira, icamo wunu adwoggi me bedo ogoba. Pien yin ibedo geno gadigadi me lwennyi, kede olwennyi ame tye ecipan,

¹⁴pi mannono, woo lweny bino ya i akina joni, ot ame tye i cel atek obino mumuko oko, calo kite a rik Calam omuko kede Bet-arbel i nino me mony, totti itino rik oŋiŋinyo oko atitino aracel itinogi.

¹⁵Mannono kite ame obino timowu kede, wun jo Icrael pi twon balwu areco meicel. Ka piny oru, abaka me Icrael obino neko oko.