Read lango Kocea 11 Bible Online

Kocea 11 - lango bible

Kocea 11

¹Kare ame Icrael pwod atin, amare, rik alwoŋo woda i ya i Miciri.

²Ento kare luŋ ame amedde lwoŋogi, gin medde jer ajera teŋe i baŋa; obedo gigi ŋolo leyi me yalo Baal, kun daŋ owaŋo odok akur baŋ cal jogi.

³Aco kono an en a rik apwonyo Epraim kede wot, rik atiŋogi kom i kora; cite gin gigi mom oŋeo ni an a rik acaŋogi.

⁴Rik abedo telogi i tol a dano, karacel kede tol me mar rik an arom i ŋat okwanyo tol doggi, dok daŋ aryebere piny ate keto cam i nyimgi.

⁵Gin bino dok cen i Miciri, Acuria en abino lunyo bedo abakagi, pien gin okwero dwogo baŋa.

⁶Pala lweny bino meny i bomagi luŋ, bino rweyo lodi me dogcelgi oko, dok daŋ bino nenekogi i celginogo.

⁷Jona doŋ omoko tamgi me ya oko i baŋa, pi mannono obino ketogi oko i kol, mom tye ŋattoro a dok bino kwanyogi,

⁸Atwero weki niŋo, yin Epraim? Atwero miyi dok baŋ ŋa, yin Icrael? Atwero miyi idoko calo Adma yore aŋo? Atwero tic kedi calo Cebim yore aŋo? Aloko doŋ cunya oko, awinyo doŋ ni atye i mar i cunya.

⁹Mom doŋ abino miyo akemona loa, mom dok abino medde rweyo jo Epraim, pien an abedo Obaŋa, mom a dano, an a Ŋat Acil i akinawu, mom abino bino me nekowu.

¹⁰Gin bino lubo yo Rwot, en bino mor calo eŋatu; ee ta, en bino mor gire, itino mere bino bino i tuŋ to kun komgi amyel amyela;

¹¹gin bino kun oya i Miciri ame komgi amyel amyela calo winy, dok daŋ acalo amam kun oya i Acuria, an abino dwokogi i pacogi, man kop a Rwot ikokome.

¹²Epraim doŋ ogura dyere i goba mere, aco ot Icrael bedo bwola abwola. Ento Juda, Obaŋa gire pwod ŋeo, en gire geno Ŋat Acil.