Read lango Kocea 13 Bible Online

Kocea 13 - lango bible

Kocea 13

¹Epraim ka rik okobo, kom jo myel amyela; Epraim rik dit atek iyi Icrael; ento en okelo bal i kome pi Baal, te to oko.

²Aman balgi doŋ tye amedde ameda, dok otye ka twatwako callogo pirgi kengi, kede cal jogi me ryalgi ame otio diro, magi-nono luŋ aluŋa obedo tic otet. Gin okobo ni, “Yal wunu cal jogi magi.” Jo nonoto kom twon otwako.

³Pi mannono gin bino bedo calli ekuna me odiko calo toyo a ru ony oyotoyot, calo cuŋ kal ame yamo atek kolo oko i laro, onyo yito ame duny wan dirica.

⁴An a Rwot Obaŋani, cakere i lobo Miciri; mom tye Obaŋa moro ocele ame iŋeo, kono an keken, alarroro ocele mom dok tye, kono an keken,

⁵An en a rik aŋeowu i tim, i lobo ame can pii dwoŋ iye.

⁶Cite i kare ame gin ocemo te yeŋ, gin oyeŋ, ote ero yeyea i cunygi, mano te miyo wigi doŋ wil oko i koma.

⁷An rik arom i eŋatu baŋgi, calo kwac ame kiogi i ŋet yo.

⁸Abino ŋolle i komgi calo ŋu ager ame oneko itino mere, abino yeco korgi dado oko, abino mwodogi kuno calo eŋatu, kite a lee tim kikilogi kede.

⁹Aco yin Icrael, abino rweyi oko luŋ aluŋa; ŋa kara a twero lari?

¹⁰Kara abakani tye atimo no? Koŋ elari ba kede jo me bomani luŋ. Kara oloc-ci kono tye atimo ŋo, ame ipenyo pirgi ni, “Mia abaka kede oloc?”

¹¹Rik ami abaka kun cunya mom yom, ate daŋ dok kwanye oko kun atye akemo.

¹²Tim Epraim areco luŋ ocoo oko piny, ballere luŋ tye okano,

¹³Rem acalo me nywal tye abino pire, cite en obedo atin amiŋ; Pien aman en mom tye otikere i yo nyodo.

¹⁴Myero alargi i twer a Ceol? Myero alakorogi i baŋ To? Yin To wee, edeke-ni kara tye kwene? Yin Ceol, can-ni kara tye kwene? Mom doŋ atye i kica moro i cunya.

¹⁵Kadi bed en nya atek calo ogada, yamo oro ame Rwot ocwao, bino bino kun oya i tim, waŋ pii mere akukunya bino two oko, akoŋŋere daŋ bino dwono oko; en bino mayo jami mere luŋ a yomoro cunye, ame yam en okano.

¹⁶Camaria bino neno can pi ballere, pien en ojem i kom Obaŋa mere; pala lweny en abino nekogi itinogi obino teteŋo piny, te ŋiŋida atitino, mongi ayac obino ryeryeko yigi oko.