Read lango Kocea 14 Bible Online

Kocea 14 - lango bible

Kocea 14

¹Yin Icrael, dok baŋ Rwot Obaŋani, pien doŋ igatte iyo-ni areco-nono.

²Wot wunu i kop me dogwu, idok wunu baŋ Rwot, wot ikobbe wunu ni, “Kwany balwa luŋ oko, me igam motwa aber, me okelli kop oya i dogwa.

³Acuria gire mom bino larowa, mom obino riŋo aguragura; mom dok obino kobo ni, ‘Obaŋawa’, baŋ gin ame wan otio i ciŋwa. Atin kic nwoŋo kica i baŋi.”

⁴Abino miyo iyeegi agoro doko atek abino marogi pi ber a yia, pien akemona i komgi dok okwe oko.

⁵Abino doŋ bedo calo toyo baŋ jo Icrael; en bino turo calo kalaŋweka bino cwalo lwite piny calo Lebanon.

⁶Bino lot, te jany, berrere bino bedo calo me jeituni, eka ŋwece te bedo akur bala Lebanon.

⁷Jo ame bedo i tipo mere bino dwogo, bino nya meicel calo kal, bino turo calo olok, ŋwecgi bino bedo akur calo koŋo olok me Lebanon.

⁸Epraim wee! Kara cal jogi pwod konyi kede ŋo? An keken en ame abino gamo doge, dok daŋ agwoki. Abedo calo yat cipre ame pote mom ner, an en ame amii nyak.

⁹Ŋat ame ryek bino niaŋs jami magi; ka ce tamere tye, en bino ŋeyogi; pien yo a Rwot luŋ tye atira, jo a kitegi atira woto iye, cite obalo bedo twomere iye atwoma.