Read lango Kocea 2 Bible Online

Kocea 2 - lango bible

Kocea 2

¹Kob baŋ ominwu ni, “Ammi[3]” kede baŋ aminwu ni “Rukama”[4]

²Pyem i totowu, pyem wunu kede, pien en mom obedo cega, an daŋ gira mom abedo cware, me en mi timmere me alaya rweny oko i waŋe, dok mito co ocele rweny oko i akina tuno mere.

³Ka mom amannono, abino gonyo rukkere, ete doŋ onoro, abino miyo edoŋ nono calo nino a rik onywale iye, abino miyo ebedo calo lobo otwo, abino miyo oryo pi en aneke.

⁴Mom daŋ abino timo itino mere kica, pien gin obedo itino ame nywalo pi tim me alaya

⁵Pien totogi obedo alaya, dako oyacogi otimo tim me lewic. Pien en okobo ni, “Abino wot baŋ coga” ame mia kwonna kede piina, yer romona, pambana, moona kede gi-amatana.

⁶Pi mannono abino cego yore oko kede okuto, eka ate gero cel gure kede oko, me kur dok enwoŋ yo me beo mere.

⁷En bino ryemo yo coge, cite mom bino makogi, en bino yenyogi cite mom gire bino nwoŋogi. Icennere en bino kobo ni, “An abino wot, abino dok baŋ cwara me agege, pien rik atye aber i kato i kare-ni”.

⁸En gire rik mom daŋ ŋeo, ni an a rik amie kal, koŋo olok kede moo, dok an daŋ amio ryal onya baŋe, kede jabu ame gin otio kede pi Baal.

⁹Pi mannono, ka kare oromo, abino twonne gira kalla oko, kede koŋo olokka ka kare mere oromo, abino daŋ gamo yer romona kede pambana, a rik egeno i kome olaŋara.

¹⁰Aman doŋ abino yabo lewiccere i nyim coge, ŋattoro mom bino lare i ciŋa.

¹¹Abino miyo yomcunnyere luŋ gik oko, ecubannere, por dwe, cabittere, karacel kede ecubannere luŋ ame ociko pirgi.

¹²Abino babalo olok kede oduro mere oko, ame en onwoŋo kobo ni, “Magi motta ame coga omia.” Abino miyogi luŋ doko buŋ, leyi me tim bino camogi.

¹³Abino keto can i kome pi nino me ecuban a Baal, ame kere a en waŋo kede odok akur baŋgi, te rukere aber atemmere, kede wellere, te lubo kede yo coge, kun wie wii oko i koma. Man kop a Rwot ikokome.

¹⁴Pi mannono, nen ba, abino bibito en, abino tere i tim abino kop kede i mwolo.

¹⁵Ate bino miye poto olokkere kuno, abino miyo luŋ me Akor doko doggola ame miyo jo bedo i gen. En te bino kop kede kuno calo kare ame en pwod nyako, dok acalo kare a rik en ya Miciri.

¹⁶“I kare-nono ibino lwoŋa ni, ‘Cwara’, man kop a Rwot ikokome, mom dok ibino lwoŋa ni ‘Baal mera.’

¹⁷Pien abino kwanyo nyiŋŋogo me Baal oko i doge, jo mom dok bino lwoŋo nyingi kadi acel.

¹⁸I nino nono daŋ abino cikere pirwu, kun acikere i leyi me tim kede winy a twarre malo, kede gin ame lak alaka i wi lobo; dok daŋ abino turo akud atero, karacel kede pala lweny, kede mony i lobo; eka ate miyi buto piny i kuc.

¹⁹Abino nyomi doŋ ibedo mera atwal. Abino nyomi i kite atira, kede cuny aler, kede mar a mom lokere, karacel kede kica.

²⁰Abino nyomi ibedo mera ateteni, dok daŋ ibino ŋeyo Rwot.

²¹“I nino-nono, man kop a Rwot ikokome, abino gamo kop a polo, eka gin te gamo kop a lobo;

²²eka lobo te gamo mea kal, koŋo olok kede mea moo, gin luŋ bino dok i kwaca Jejreel[5],

²³eka ate coye me bedo mera kena i lobo-ni. Abino timo kica baŋ Lo-rukama eka ate kobo baŋ Lo-ammi ni, ‘Ibedo wunu jona,’ eka en te kobo ni, ‘Yin Obaŋana.’ ”