Read lango Kocea 4 Bible Online

Kocea 4 - lango bible

Kocea 4

¹Winy wunu kop a Rwot, wun jo Icrael; pien Rwot tye i gin ame emito da iye i kom jo abedo i lobo-ni. Pien cuny me ateni gire mom i loboni, akadi marroro daŋ mom, neccoro i kom Obaŋa daŋ mom.

²Gin a tye iye en kwoŋ, goba, nek, kwalo kwo, kede cot, jo iye mom ye ni jukgi, oneno nek a kolle akola.

³Pi mannono, lobo tye kumo akuma, jo luŋ a bedo iye doŋ onyonere oko, karacel kede leyi me tim, kede winy a twarre malo; naka akadi rec me nam daŋ oto oko.

⁴Cite dano moro myero kur da, dano moro daŋ kur dot awottere, pien ŋat ame an ada kede en yin alamdog.

⁵Ibino twomere dyeceŋ, odwarpiny daŋ bino twomere kedi dyewor, dok abino neko daŋ totti oko.

⁶Jona gire tye ka to atoa pi kwiya pinygi, pien yin ikwero pwonyere oko, omio an akweri doŋ oko me bedo alamdogga, Kite acalo yin doŋ wii owil oko i cik Obaŋani, an daŋ wia bino wil oko i kom itinoni.

⁷Gin ka welgi omedde, gin daŋ omedde balo baŋa; abino loko kwogogi bedo me lewic.

⁸Bal a jona odoko camgi, worogi omio gin mito ni jo tim gin arac,

⁹Cite abino miyo olamdog bedo calo jo ocele, abino keto can i komgi pi kitegino no, ate culogi pi timgi-nono,

¹⁰Gin bino cem, cite mom obino yeŋ, obino daŋ timo tim me alaya, cite mom obino gire nya; pien gin oweko Rwot oko, pi miye gigi i tim me alaya.

¹¹Koŋo olok, kede koŋo olok anyennere, rwenyo tam a dano oko,

¹²Jona penyo tam kom i baŋ yat, abirogi kom en ame nyuttigi kop. Pien cuny me alaya doŋ orwenyogi oko, omio gin oweko obaŋagi oko, pi timo tim me alaya.

¹³Gin ŋolo motgi me yalo Obaŋa malo i wi kiddi gin waŋo gitumgi i wi tur malo, i te kworo, atego kede olwedo, ni pien tipogi ber. Mannono en gin omio anyirawu yam timo tim me alaya, aterawu daŋ codo cot.

¹⁴Mom abino keto can i kom anyirawu, kadi bed gin otye ka timo tim me alaya, kadi i kom aterawu kadi bed gin tye mito co ocele; pien co daŋ opokere oko kun obedo gigi baŋ olaya, dok omio motgi me yalo Obaŋa karacel olaya me ot jogi. Rok ame mom i tam poto gire oko,

¹⁵Kadi bed yin Icrael ibedo alaya, cite kur Juda daŋ dok abal. Kur iwot wunu i Gilgal, kur daŋ iwot wunu i Bet-awen; kur daŋ ikwoŋ wunu ni “Acalo Rwot tye kwo-ni.”

¹⁶Icrael calli roya ame aole; Rwot aman dok twero pitogi, acalo atin romo ame okwao kan alac?

¹⁷Epraim doŋ oribere oko i cal jogi, wek en gire koŋ bedi!

¹⁸Lwak jo ame omero, omiye gigi oko i tim me alaya, gin omaro gin a kelligi lewic akato kwogogi.

¹⁹Yamo gire tye oridogi oko i bwome, lewic bino makogi pi motgi ame oŋolo-nono.