Read lango Kocea 5 Bible Online

Kocea 5 - lango bible

Kocea 5

¹Wun olamdog, koŋ iwiny wunu. Wun jo ot Icrael, ketto wunu cunywu, Cik yitwu, wun jo ot abaka, Pien kop ame oŋolo otikowu, pien wun ibedo wunu kumma ame ociko i Micpa, kede boo ame oryeo i wi Tabor.

²Gin otyeko kunyo bur atut i Cittim, ento an abino keto can i komgi luŋ.

³An aŋeo Epraim, Icrael daŋ mom okanne i baŋa; aco aman yin Epraim idoko alaya oko, Icrael daŋ doŋ olille gire oko.

⁴Timgi areco-nono mom yegi odwogo baŋ Obaŋagi; pien cuny me alaya doŋ tye i yigi, omio mom oŋeo Rwot.

⁵Wakere Icrael bedo caden i nyime; Epraim bino twomere pi ballere, Juda daŋ bino twomere kedgi.

⁶Gin bino wot i leyi me aŋola, pi yenyo Rwot, cite mom obino nwoŋe, en doŋ oya oko i baŋgi.

⁷Gin mom obedo ogen baŋ Rwot, pien onywalo itinogi i jo ocele. Aman doŋ por dwe abino rweyogi oko gin karacel kede pottigi.

⁸Kut wunu bile i Gibea, kede opel i Rama. Kuk wunu duru i Bet-awen; wan olubi yin Benjamin!

⁹Epraim bino doko wi obur, i nino me keto can i kome; amio kop ame abino timere atenini, oneye i atekere Icrael.

¹⁰Oloc me Juda odoko calo jo ame kobo gweŋ i wan apokki, abino coro akemona i komgi calo pii.

¹¹Epraim doŋ odiogi meicel, mom oŋolo kop kakare, pien oketo cunygi i lubo gin a konyere mom.

¹²Cite an anaŋo ot Epraim bala nyenye atuco ot a Juda bala lut.

¹³Kare ame Epraim oneno two mere, eka Juda te neno waŋ burrere, omio Epraim owoto Acuria, te cwayo kwena baŋ abaka adit cite en gire mom ocaŋowu, kadi caŋo burwu.

¹⁴Ateni an acalo eŋatu baŋ Epraim, kede atin eŋatu baŋ Juda, Kom an, an ikoma abino kikilo yin, ate wot oko, abino wayi ateri oko, ame dano moro mom bino lari,

¹⁵Abino dok gira i kabedona, tuno ka gin oniaŋ balgi ote yenyo waŋa, gin bino yenya meicel i cangi.