Read lango Kocea 7 Bible Online

Kocea 7 - lango bible

Kocea 7

¹I kare ame dok abino miyo jona gum aber, i kare ame amito caŋo Icrael, bal Epraim te nen oko, kede tim areco a jo Camaria otimo. Pien gin obwolo jo, akwo turo ot, oyak jo, yako jo iyo.

²Cite mom daŋ oparo gigi ni an apo pi timgi areco luŋ. Timgi doŋ am an ogurogi dyere, tye daŋ doŋ i nyima.

³Gin oyomoro cuny abaka i timgi areco, oyomoro daŋ cuny oloc i gobagi.

⁴Gin luŋ ocodo cot, gin rom kom i keno alyet, ame ated ogati mere mom dok yiko mac iye, cakere a en orubo tobi kede moko tuno waŋ oyenyo, te kwot.

⁵I nino abakawa, lyeto me koŋo olok omio oloc luŋ otwoye, abaka te ryeyo bade karacel i wegi ayet.

⁶Pien yigi bedo alyet calo keno, pi kop a gin aporo; akemogi bedo mimira dyewor benebene, eka odiko te lyel malo calo mac arum.

⁷Gin luŋ doŋ olyet calo keno, orweo olocgi oko. Obakkigi luŋ oto oko, cite mom tye ŋattoro i akinagi a kok baŋa.

⁸Epraim doŋ orubere oko i akina orok; Epraim doŋ olokere calo capat a mom oloko.

⁹Rok ocele camo tekogi, cite en gire mom ŋeo; kadi lwar atar kwaŋ i wie, en gire mom ŋeo.

¹⁰Wakere Icrael en a nyuto ballere; cite gin gigi mom odwogo baŋ Rwot Obaŋagi, kadi yenye, kadi bed can man luŋ opoto i komgi.

¹¹Epraim cal kede amam, miŋ, wiegu mom tio; aman okok baŋ Miciri, olunyo wot i Acuria.

¹²I yo moro luŋ a gin olokere iye, abino ciko boona me makogi, abino retogi piny calo winnyi a twarre; abino pwodogi pi timgi areco.

¹³Gin bino neno can, pien gin oya oko i baŋa, myero rwegi oko, pien gin ojem i koma! Kadi bed amito lakorogi cite gin okobo kop goba i koma.

¹⁴Ka gin okok baŋa, nwoŋo cunygi mom iye, gin cur gigi i koko i wi tandagi, oŋoŋolo komgi kengi i pala pi kal kede koŋo olok, kun ojem i koma,

¹⁵Kadi bed apwonyo badgi, amiogi obedo atek, cite gin gigi oyiko ka kop arac me atima i koma,

¹⁶Gin olunyo lokere dok baŋ Baal; gin rom aroma atero a celo piny nono, Olocgi bino to i pala lweny, pi lebgi adwir i ceno jo, Man bino miyo ocaogi i lobo Miciri.