Read lango Kocea 8 Bible Online

Kocea 8 - lango bible

Kocea 8

¹Kut bilo! Pien acut tye malo i wi ot a Rwot acil; en tye kuno pien gin oturo cikkerena, ojem daŋ i cikka,

²Gin oredo i koko baŋa ni, “Yin Obaŋawa, wan jo Icrael oŋei.”

³Pien Icrael doŋ obolo gin aber oko, okwor bino ryemo yore.

⁴Gin oketo obakkigi aboŋo twerra, karacel kede oloc daŋ kun an mom aŋeo, Gin otio pirgi kengi cal jogi me ryalgi kede me jabugi, timgi-nono bino kelligi to,

⁵Yia dag atin twonni yin Camaria. Atye i twon akemo meicel i komgi. Bino kara ri kare a rom mene, jo Icrael te bedo doŋ aboŋo bal?

⁶Pien ati tic ciŋ gire en otio; mom gire Obaŋa, atin twon me Camaria obino ŋiŋinyo oko.

⁷Pien gin ocoo yamo, ote kayo ajuru. Kal okwero ŋok oko i poto, moko mom aya iye, dok akadi kono onwoŋo onen, orok kono otyeko oko luŋ.

⁸Doŋ omwonyo Icrael gire oko, aman doŋ gin tye i akina orok, calo ginnoro a mom dok omito.

⁹Pien Icrael woto kede i Acuria, calo kana me tim ame woto kene; Epraim owilo owote mere awila.

¹⁰Kadi gin owot wilo jo i akina orok, abino dwoggogi cen oyotoyot. Mano bino miyo koŋ oweko onyo moo i wi obakkigi kede olocgi pi kare moro anonok.

¹¹Pien jo Epraim otimo bal pi gero keno lam apol, omio keno lamgi-nogo odoko gin a terogi i bal,

¹²Aco kono acoo cikka tutumia apar twal pirgi, gin oneno gigi acalo gin a welo.

¹³Gin omedde gigi ameda me ŋolla leyi, ote camo gigi riŋo mere, cite cuny Rwot mom yom komgi. Aman doŋ Rwot bino po timgi areco, bino keto can i komgi pi balgi. Gin bino dok i Miciri.

¹⁴Pien Icrael wie doŋ owil oko i kom ŋat ocwee, eka te lunyo gero udi adoŋo; aco Juda te gero boma apol ame oguguro i cel; ento abino bolo mac i boma mege-nono, maccono bino waŋo udi mere adoŋo oko.