Read lango Kocea 9 Bible Online

Kocea 9 - lango bible

Kocea 9

¹Kur ilel ba, yin Icrael! yii kur bed yom calo rok ocele: pien yin iweko Obaŋani ite doko alaya, imaro gin oculi kede me bedo alaya, i laro luŋ me dino bel.

²Laro me dino bel kede bur koŋo olok, mom bino ya iye cem kede koŋo a romo pitogi, koŋo olok anyen bino remogi.

³Gin mom bino bedo i lobo a Rwot: ento Epraim bino dok i Miciri, gin obino camo cam a cik ogeŋo i Acuria.

⁴Mom obino onyo koŋo olok me yalo Rwot akadi yomoro cunye i gin ame gin ŋolo me yale. Camgi bino calo mea jo a kwero cola, ame bino balo jo luŋ ame camo pien camgi-nono bino bedo me juko kec keken, mom myero kel i ot a Rwot.

⁵Ibino timo wunu ŋo i nino me ecuban ociko pire, kede i nino me ecuban a Rwot?

⁶Nen koŋ! Ka gin oriŋo oko i lobo ame okwor obalo, jo Miciri bino gamogi, Mempic bino bedo lyel me yikogi, Jamigi me ryal a yomoro cunygi, doo bino mayo oko, okuto bino tu i udigi.

⁷Kare me keto can doŋ obino oko, kare me culo bal doŋ obino; Icrael obino dwoko oko piny. Adwarpiny bino nen calo dano amiŋ, dano a tye i cuny Obaŋa bino nen bala opo oko, pi balwu kede adagewu ame dwoŋ meicel.

⁸Epraim libo jo Obaŋana, adwarpiny tye i yogi luŋ calo kumma, adage tye naka i ot Obaŋagi.

⁹Gin doŋ odonyo i bal okato kare oko, calo kare me Gibea. En bino poyo timgi areco, bino keto can i komgi pi balgi.

¹⁰Kare ame rik anwoŋo Icrael, rik kom calo ŋat ocop i kom olok i dye tim, Kare ame aneno kwariwu, rik kom calo aneno oduro anyen, ame pwod ogeo cek aceka. Ento gin rik ote wot i Baal-peor, ote miye kengi baŋ cal jok; omio gin odoko gin a me yi jo okwero, a rom aroma i gin a gin omaro.

¹¹Kwogo Epraim bino ket oko, calo winy ame otwarre, pien mom dok obino nywal, kadi yac onyo gamo,

¹²Kadi bed gin pit itinogi, abino tyekogi oko luŋ ame moro mom doŋ. Gin bino neno can meicel, ka abino ya oko i baŋgi!

¹³Aco itino Epraim kite aneno kede, obino neko calo leyi; Epraim bino cwayo itino mere me aneka.

¹⁴Migi ba, ama Rwot, gin aŋo kara ame ibino miyogi? Mi yigi bed ony aonya, dok tunogi daŋ two atwoa,

¹⁵Racgi luŋ aluŋa tye i Gilgal, cunya ogeo kwerogi i kuno, Pi gin ame gin obedo timo areco, abino ryemogi gira oko i oda. Mom dok abino marogi kadi acel; olocgi luŋ obedo jo ojem.

¹⁶Epraim rom i yat a doŋ oreto oko piny, lwite-gu daŋ doŋ oner oko, mom doŋ bino nyako nyige moro. Kadi bed gin nywal, abino neko itinogi ame omaro oko,

¹⁷Obaŋana bino bologi oko, pien gin okwero winyo koppere oko; gin bino bedo jo ame roroŋa akina orok.