Read lango Joel 1 Bible Online

Joel 1 - lango bible

Joel 1

¹Kop a Rwot rik obino baŋ Joel wot Petuel. Wun jo oteggo winy wunu man ba, ciku yitwu, wun jo a bedo i lobo luŋ!

²Kodi gin acalo mannono yam koŋ onen i karewu, onyo i kare a kwarowu?

³Rab wunu pire baŋ itinowu, me itinowu daŋ rab pire baŋ itinogi, dok itinogi daŋ rab pire baŋ jo a lubogi,

⁴Gin ame bonyo ogaŋgaji oweko odoŋ, bonyo ame olwoŋo ni acaocao ocamo oko; gin ame ocaocao oweko odoŋ, bonyo akolokwac ocamo oko; gin ame akolokwac oweko odoŋ, bonyo aluluk ocamo oko.

⁵Wun jo amer i koŋo akec, co wunu, me ikok wunu, kuk wunu duru, wun jo luŋ ame mato koŋo, pien koŋo alim oŋolo oko i dogwu ame mom ru ibilo wunu.

⁶Pien mony doŋ obino oko me lweny i kom lobona, mony atek a mom kwanne; lakgi cal i lak eŋatu, lakgi bocoboco calo mea min eŋatu.

⁷Gin obalo olokka oko, odurona daŋ oŋiŋinyo oko; gin opapaco pokgi obalo oko; jaŋgi doŋ tar kia.

⁸Kok bala nyako oruko boŋo co la, ame koko awottere a pwod onyomere kede anyoma.

⁹Mot me moko kwon kede me amata me ya lo Obaŋa, gin luŋ oŋolo oko i ot a Rwot. Olamdog, ame gin otic a Rwot, tye akumo.

¹⁰Potti doŋ yigi nono, lobo tye akumo aku ma, pien obalo kai oko, koŋo daŋ mom doŋ nen, moo daŋ doŋ mom,

¹¹Idoko wunu ababaŋ, wun opur, kuk wunu duru ba, wun ogwok olok, pi kai kede cayiri; pien cam doŋ oweo oko i potti.

¹²Olok luŋ doŋ onen oko, oduro daŋ oballe gire oko, okwer, otit acama kede amalera, yen i potti luŋ oner gire oko; ginnoro luŋ amio dano yomcuny mom tye.

¹³Wun olamdog, ruk wunu boŋo cola, ikok wunu, kuk wunu duru, wun otic i ke no lam. Biye wunu, ibut wunu i boŋo co la, wun otic Obaŋa, pien mot me moko kwon kede mot amata me yalo Obaŋa, gin luŋ mom doŋ nen i ot Obaŋawu.

¹⁴Kwer wunu kare me kanyo kec ba! Lwoŋ wunu cokere adwoŋ ba! Cok wunu odoŋe luŋ, jo luŋ ame bedo i lobo, me gin bin i ot a Rwot Obaŋawu; me ikok wunu baŋ Rwot.

¹⁵Oii, nino-ni doi! Pien nino a Rwot doŋ ceggi acega, bino a cal i to a piny luŋ aluŋa, ame oya ibaŋ Won Twer Ducu.

¹⁶Nen, camwa obalo oko, kun wan one no, yomcuny kede lelo, gin luŋ doŋ orwenyo oko ot Obaŋawa.

¹⁷Koti otuŋ gigi i dog lobo, yi twayi doŋ bedo nono aboŋo ginnoro, dero daŋ doŋ oballe oko, pien kai mom ocek.

¹⁸Kite a leyi doŋ tye akokoka kede! Dok daŋ loloŋo piny aboŋo weo, pien ka kwayogi doŋ mom tye; anaka rommi doŋ ojony oko ikokoro,

¹⁹Akok baŋi, yin Rwot, pien mac doŋ owaŋo elet me kwat oko, leb mac doŋ oweo yen luŋ a tye i tim.

²⁰Anaka leyi me tim daŋ kok baŋi, pien kulli me pie luŋ odwoŋo oko, dok mac doŋ owaŋo elet me kwayogi oko.