Read lango Joel 3 Bible Online

Joel 3 - lango bible

Joel 3

¹“Pien nen, i nino-nono, i karenaca, ame abino dok miyo jo a Juda kede Jerucalem gum aber,

²abino coko rok ocele luŋ akelogi i luŋ me Yekocafat. Abino pidigi kuno pi jona Icrael, ame gin mega, pien okeketogi atata i akina Orok, kun opoko daŋ lobona oko,

³Obolo-gu kwir pi jona, awobi oloko kede alaya, aco nyako owilo kom i koŋo keken, ote mato gigi.

⁴“Wun jo Tura kede jo Cidon, kede jo luŋ me Piriciti, wun kara ino wunu tuŋ baŋa? Ka ee tye ginnoro ame iculla wunu, an abino dwoko i wiwu timwu luŋ oyotoyot, dok daŋ piopio,

⁵pien ikwanyo wunu ryalla kedejabuna, dok daŋ itero wunu jamina abeco, a pirgi litta, itero wunu i ot jogiwu.

⁶Icato wunu Juda kede jo Jerucalem baŋ jo Grik, kun icwaogi wunu teŋe i waŋ lobogi.

⁷Cite aman doŋ abino twarogi oya oko i kan ame icatogi wunu iye; abino dwoko gin ame itimo wunu i komgi i wiwu wun ikomwu.

⁸Abino ca to anyirawu kede awobewu baŋ jo Juda, gin dok te catogi oko baŋ jo Ceba, ame gin rok ame tye kannabor; pien Rwot doŋ okobo.”

⁹Rab wunu kop man baŋ rok luŋ; yikere wunu pi lweny, cukoro wunu cuny jo atek meicel. Wek wunu jo me romo luŋ cokere karacel, me gin bin malo kano.

¹⁰Tet wunu leb kweyi dyan odok pala me romo, kede pala ŋolo olok, odok toŋi; kadi ŋat agoro myero kob ni, “An atek.”

¹¹Ru bi no wunu aceggi kan, wun rok luŋ omano kan, cokere wunu kenwu kuno. Cwa jo meri atek, ama Rwot.

¹²Wek rok luŋ cokere kengi, me obin, oyito i luŋ me Yekocafat; pien abino bedo piny kuno me ŋolo kop, i kom rok luŋ omano kan.

¹³Kwany wunu doŋ pala, pien cam doŋ ocek oko me akaa. Dony wunu iye, iwot inyon wunu, pien bur olok doŋ opoŋ oko. Abinni doŋ opon ame aony aonya, pien balgi dwoŋ meicel.

¹⁴Lwak jo apipim doŋ ocokere i luŋ me moko tam! Pien nino a Rwot doŋ ceggi acega, i luŋ me moko tam,

¹⁵Ceŋ kede dwe odoko col oko, acer daŋ doŋ okwero ryeny oko.

¹⁶Dwoŋ Rwot mor i Cion, wi nyere i Jerucalem, polo kede lobo yenere, Ento i baŋ jo mere, Rwot en ka-larregi, en ka-bwot atek meicel baŋ jo Icrael.

¹⁷“Mannono bino miyo iŋeo wunu ni an a Rwot Obaŋawu, ame bedo i kidi acil me Cion. Jerucalem bino bedo acil. Orok mom dok bino bea iye.

¹⁸“I nino-nono, koŋo alim bino mollo i kom kiddi, cak bi no mollo i wi tur ducu, pii bi no poŋ i kulli luŋ me Juda. Pii daŋ bino kukunya i ot a Rwot, te bido luŋ me Cittim.

¹⁹Miciri bino doko wi obur, Edom bino doko tim odoŋ nono, pi kologi i kom Juda, pien gin oonyo remo a jo a mom i bal i kom lobogi-gu,

²⁰Aco i Juda, jo gire bino bedo iye nakanaka, Jerucalem daŋ obino bedo iye kare luŋ.

²¹Abino culo kwor me remogi, mom obino weko jo ame obalo. Pien Rwot bedo i Cion.”