Read lango Amoc 3 Bible Online

Amoc 3 - lango bible

Amoc 3

¹Winy wunu kop ame Rwot okobo i komwu, wun jo Icrael, kom atekere luŋ ame rik okwanyo lobo me Miciri:

²“Wun keken en a doŋ aŋeowu, kom atekere luŋ ame tye i wi lobo; pi mannono, abino keto can komwu, pi balwu ducu.

³Jo aryo twero nywako yo karacel, ka gin mom ocikere?

⁴Atin eŋatu twero kok i gorogoro mere, ka mom omako ginnoro?

⁵Winy twero moko i wi lobo, ka mom ociko i tol?

⁶Otwero kuku duru i boma, eka lworo mom le mako jo? Can twero poto i boma, ka Rwot mom en omio opoto?

⁷Rwot Obaŋa mom twero limo ginnoro, ka mom onyuto muŋŋere baŋ omiro mere odwarpiny.

⁸Eŋatu doŋ omor; na a kome mom myel? Rwot Obaŋa doŋ okobo; na akwero rabo koppere?”

⁹Rab wunu kop i udi adoŋo me Acuria, kede udi adoŋo me lobo Miciri ni, “Cokere wunu wi kidi me Camaria, koŋ inen wunu arubaruba adwoŋ ame tye iye, kede kit ame oburo kedejo iye.”

¹⁰Mom oŋeo tiyo gin aber, “Man kop a Rwot i kokome, gin okano gero kede kwo i udigi adoŋo.”

¹¹Mannono omio Rwot Obaŋa okobo ni, “Okwor bino guro lobowu dyere, bino dwoko tekoni oko piny; jami i udiwu adoŋo obino yako oko.”

¹²Rwot okobo ni, “Kit acalo akwat laro tyen lee aryo kede dul yite i dog eŋatu, jo Icrael ame bedo i Camaria daŋ obino larogi amannono, karacel i twok itanda kede dul gi-bedo.

¹³“Winy wunu, ite rabo wunu kop i kom ot a Yakobo”, man kop ame Rwot Obaŋa, Obaŋa me mony okobo,

¹⁴“ni mannono, i nino ame abino keto kede can i kom jo Icrael pi balgi, abino daŋ keto can i kom keno lam a tye i Betel; tuŋ keno lam obino muko oko, eka te peto oko piny.

¹⁵Abino go yo ot buto me iporo kede ot me oro aketo oko; udi odeo i lak lyec obino reto oko piny, udi adoŋo bi no tum oko.”