Read lango Amoc 4 Bible Online

Amoc 4 - lango bible

Amoc 4

¹Man kop a Rwot ikokome. “Winy wunu kop man, wun wegi dok me Bacan, ame bedo i bad kidi me Camaria, wun ame iburo wunu ocan, idiogi wunu piny ka can oridogi, ame ikobbi wunu cogwu ni, ‘Kel, me omati.’

²Rwot Obaŋa a kite atira doŋ okwoŋo ni mannono, nen ba, kare tye abinniwu, ame jo bi no wayowu oko i golo, golo me ciko rec bino tyekowu ducu.

³Ibino kato wunu i waŋcel ame oturo, kun ŋat acel acel woto atira nyim; obino bolowu oko iyi Armon.” Man kop a Rwot ikokome.

⁴“Biye wunu i Betel me itim wunu bal, biye wunu i Gilgal me imedde wunu i balwu. Kel wunu gin oŋolli Obaŋa nino i nino, kede acel me apar ine nino adek adek;

⁵Mi wunu mot pwoc me kwon a tobi tye iye, rab wunu pi motwu me bercuny, mejo winy; pien imaro wunu timo kittono, wun jo Icrael”, man kop a Rwot Obaŋa ikokome.

⁶“Rik amio lakwu ogebere pi kec opoto i bomawu luŋ, kede can kwon i bomawu luŋ, ento rik mom idwogo wunu baŋa”, man kop a Rwot ikokome.

⁷“Rik atwonowu kot, ame kare me kac pwod odoŋ dwete adek; amio kot ocwe i boma acel; ageno mom ocwe i boma ocele amio kot ocwe i poto acel, poto a kot mom ocwe iye otwo oko;

⁸omio boma aryo nyo adek ociro i boma acel pi mato pii, cite mom te romogi; ento rik mom idwogo wunu baŋa,” man kop a Rwot ikokome.

⁹“Rik atopo kalwu oko, amio omwato; abalo-gu pottiwu kede poto olokwu; bonyo ocamo odurowu kede jeitumwu; ento rik mom idwogo wunu baŋa”, man kop a Rwot ikokome,

¹⁰“Rik acwao too arac i akinawu ame rom aroma i me Miciri, aneko awobewu i pala lweny; ayako aguragurawu oko; amio ŋwec gonywu oduny umwu aŋwe meicel ento rik mom idwogo wunu baŋa.” Man kop a Rwot ikokome.

¹¹“Rik areto kabedo mogo i akinawu, bala i ka re a rik Obaŋa oreto kede Codoma kede Gomora, rik ite bedo wunu bala dog yen ame owoto i mac; ento rik mom idwogo wunu baŋa”, man kop a Rwot ikokome.

¹²“Pi mannono, yin Icrael, abino timmi kit man; pien abino timo man i komi, myero iyikere me rwatte Obaŋani, yin Icrael.”

¹³Nen ba, ŋat ame ocweo kiddi kede ame oketo yamo, ame daŋ titti dano mere tammere, ame loko ru-piny doko piny acol, dok ame bea i wi lobo ame otiŋere malo, nyiŋe Rwot, Obaŋa me mony.