Read lango Amoc 6 Bible Online

Amoc 6 - lango bible

Amoc 6

¹“Bino neno can jo a tye i kuc i Cion jo a tye i wi kidi me Camaria ame bedo aboŋo lworo! Wot iman wunu koŋ rok adoŋo mege, ilimgi wunu, wun jo Icrael.

²Kat wunu naka i Kalne, me inen wunu; ya wunu i kunnu, iwot wunu i Kamat adwoŋ, eka ite wot wunu doŋ i Gat a jo Piriciti. Gin beco kato loc magi oko? lobogi dwoŋ loo lobowu oko?

³Wun jo ame cwao nino arac teŋe, kun ikelo wunu kom loc me kole cok baŋwu?

⁴“Jo ame buta i wi tanda ame odeo i lak lyec, ame buto gigi ilada i wi gibedogi; ame camo itino rommi iyi anok, kede roce ame okwanyo iyi awi;

⁵ame wero wer nononono i dwoŋ tum, kede ame roto kit tummogo anyen pirgi kengi bala Daudi;

⁶jo ame mato koŋo olok iyi gwatti, dok ame wirre kede moo wir abeco meicel, cite mom gigi oparo pi rette a Yucepu.

⁷Pi mannono, gin doŋ obino geyo telo nyim jo ame obino tero i opii, nyero a jo ame buto ilada-nu bi no gik oko.”

⁸Rwot Obaŋa doŋ okwoŋo i kwo mere kene, Rwot Obaŋa me mony oko bo ni, “Yia dago wakere a Yakobo, akwero udi mere adoŋo oko; abino miyo boma kede jami iye luŋ baŋ okwor.”

⁹Ka co apar bino doŋ i ot acel, gin bino to.

¹⁰Dok ka wat a dano moro ame waŋo kome, obino pi kwanyo cogo i ot, ee openyo dano ame tye i gul ot ni, “Dano moro pwod odoŋ bani?” en bi no kwero oko ni, “Pe gire”; dok bi no kobo ni, “Liŋ, Mom myero otuc nyiŋ Rwot.”

¹¹Pien nen ba, Rwot ociko, mio obino napo ot adwoŋ oŋinyo oko, ot atidi daŋ obino nininyo atitino.

¹²Aguragura riŋo i wi lela? Nam opuro i kweri dyaŋ? Ento wun iloko wunu ŋolo kop atira odoko awola, nyiŋ me kite atira iloko wunu odoko gin akec;

¹³wun ame ilelo wunu pi Lo-debar, ame kobo ni, “Pi tekowa mom omio omao Kamaim pirwa kenwa?”

¹⁴“Pien nen ba, abino tugo rokkoro i komwu, wun ot Icrael” man kop a Rwot Obaŋa me mony; “gin bino diyowu piny cakere dog yo ame woto Kamat naka i kulo me Araba.”