Read lango Obadia 1 Bible Online

Obadia 1 - lango bible

Obadia 1

¹Man en gin ame Obaŋa onyuto baŋ Obadia. Rwot Obaŋa me mony onyuto kop i kom Edom, Wan doŋ owinyo kop ame oya i baŋ Rwot, akwena daŋ doŋ ocwao oko baŋ orok, me kobo ni, “Ya wunu malo, ya wunu, me owot olweny wunu kede!”

²Rwot okobbi jo Edom ni, “Nen ba, abino miyo idoko wunu atitidi moro, i akina orok, ame jo luŋ bino cayowu atek meicel.

³Awakawu ame onwoŋo tye i cunywu en ame obwolowu, wun jo ame ibedo wunu i akina kiddi ame obarre, wun jo ame kabedowu tye malo meicel, wun jo ame ikobo wunu i cunywu ni, ‘Ŋa kara ame bino dwokowa piny i lobo?’

⁴Kadi bed ibed wunu malo calo cur, kadi bed udiwu bed i akina acer, abino dwokowu gire oko piny i kuno.” Man kop a Rwot i kokome.

⁵Ka ce okwo onyo oyak obino baŋwu dyewor, kadi bed gin oyakwu okato kare! gin mom obino kwalo ka gin ame oromogi keken? Ka ce opwon olok obino baŋwu, nyig olokkogo mom dok obino weko me adepa?

⁶Oyako Ecau meicel, oyenyo anaka jami mere ame en okano!

⁷Jo luŋ ame yam inotte wunu kedgi obwolowu abwola, gin oryemowu oko teŋe naka i waŋ lobo; jo ame yam ibedo kedgi i kuc doŋ oloowu oko; owotewu ame igeno wunu doŋ ociko owic i ka beowu, kun wun mom iŋeo wunu ginnoro iye,

⁸I nino-nono mom abino tyeko jo aryek oko iyi Edom, kede jo ame niaŋ daŋ oko i kidi me Ecau? Man kop a Rwot ikokome,

⁹Aco yin Teman, joni atekkege koyo bino onyere oko i komgi jo luŋ ame bedo i kidi me Ecau, pala lweny bino tyekogi oko,

¹⁰Pi tim me kolo ame itimo i kom ominni Yakobo, lewic bino maki atek, yin daŋ ote ryemi oko atwal.

¹¹I nino ame rik icuŋ wunu iye teŋe ca, i nino ame rik wele mogo ocoko iye limmere oko ca, kun orok dodonya i dog cellere ote bolo kwir i kom Jerucalem, wun daŋ rik irom wunu kedgi.

¹²Wun onwoŋo rik mom iporre wunu nyero i nino-nono, i kom omegowu ame onwoŋo rik piny oruyigi arac; onwoŋo rik mom iporre wunu lelo i kom Juda, i nino ame ojwerogi iye; onwoŋo rik mom iporre wunu wakere i nino me can.

¹³Onwoŋo rik mom myero idony wunu i boma a jona, i nino ame gin onwoŋo tye kede can adwoŋ, rik daŋ mom myero inyergi wunu pi gin arac ame otimere i komgi, i nino ame gin onwoŋo tye kede can adwoŋ rik mom myero iyak wunu gigi moro, i nino ame gin onwoŋo tye kede can adwoŋ;

¹⁴Rik onwoŋo mom iporre wunu cuŋ kan ame yo okare iye, pi jo ame onwoŋo aŋwec me laro komgi, rik onwoŋo mom iporre mako wunu jo ame obwottege, ite miyogi wunu i ciŋ okworgi, i nino me can,

¹⁵Pien nino a Rwot ceggi bino i kom rok luŋ aluŋa, Kite ame wun itimo wunu i komgi, wun daŋ obino timowu amannono, gin ame itimo wunu bino dok gire i wiwu.

¹⁶Pien kite ame doŋ imatte wunu kede i wi kidina acil; rok luŋ omanowu daŋ bino mato; gin bino mato ote bedo gatte agata, obino doko acalo jo a yam pe, Jo Icrael obwottege obino tiŋo malo

¹⁷Ento jo ame obwot bino bedo tye i wi kidi me Cion, kuno bino bedo acil. Jo me ot a Yakobo bino leyo jamigi ikokome.

¹⁸Jo me ot a Yakobo bino bedo mac, jo me ot a Yucepu te bedo leb mac, aco jo me ot Ecau te bedo reŋ kal: obino waŋogi otyekogi ducu, ame ŋattoro me ot Ecau mom bino bwot. Rwot doŋ otyeko kobo.

¹⁹Jo me Negeb bino leyo kidi me Ecau, jo me Cepela te leyo lobo a jo Piriciti, gin bino leyo lobo Epraim kede lobo a jo Camaria, aco Benjamin bino leyo Gilead,

²⁰Jo Icrael ame gin opii i Kalak, gin bino leyo Kanaan wot kede anaka i Carepa, aco opii luŋ ame tye i Ceparad ame rik omako i Jerucalem, gin bino leyo boma luŋ a tye i Negeb,

²¹Olar jo bino yito malo i wi kidi me Cion me loyo kidi me Ecau, aloc adwoŋ gire bino bedo Rwot.