Read lango Yona 3 Bible Online

Yona 3 - lango bible

Yona 3

¹Kop a Rwot rik dok te bino baŋ Yona tyen me aryo, kun kobo ni,

²“Ya, iwot i boma adwoŋ me Nineve, iwot irab iye kop ame an akobbi.”

³Yona rik te ya wot Nineve kite ame Rwot ocike kede. I kare-nono onwoŋo Nineve rik obedo twon boma moro adwoŋ, ŋolo yie aria onwoŋo tero nino adek.

⁴Yona rik te cako wot i bomanono, owoto iye nino acel. En te cako redo kun kobo ni, “Odoŋ nino pyeraŋwen keken, obino reto Nineve oko.”

⁵Jo me Nineve rik te ye Obaŋ gina; te rabo pi kanyo kec; gin luŋ ote ruko boŋo cola, cakere i kom jo adoŋo, ituno kede i kom jo atino.

⁶Kare ame kop man otuno baŋ abaka me Nineve, en oya oko i wi kommere me loc, te gonyo rukere me kwogo oko, eka te ruko boŋo cola, te bedo piny i buru.

⁷En te miyo rabo kop romo Nineve luŋ ni, “Pi cik abaka, karacel kede odoŋe mere me awora: Myero kur mi dano moro bil ginnoro, akadi lee moro onyo dok kede rommi myero kur ocem, kur daŋ omat pii.

⁸Ento jo luŋ kede leyi myero wummere i boŋo cola, ote kok atek baŋ Obaŋa, ŋat acel acel myero olokere, owek yo mere arac oko, karacel kede kolo mere.

⁹Ŋa kara a ŋeo ka mom dok bino lokere, juko cunye i kom akemo mere agwa, me kur oto?”

¹⁰Kare ame Obaŋa oneno gin ame gin otio, kite ame gin olokere oweko yogi arac, Obaŋa ojuko cunye, te weko timo gin arac a rik ekobo ni ebino timo i komgi; mom doŋ te timo.