Read lango Yona 4 Bible Online

Yona 4 - lango bible

Yona 4

¹Kop man rik te miyo cuny Yona waŋ meicel, akemo omake.

²En te kwayo Rwot kun kobo ni, “Akwai, yin Rwot, man mom gin a rik akobo i kare ame pwod atye i lobona? Mannono en gin omio rik a ru lwi me wot oko i Tarcic; pien onwoŋo aŋeo ni yin ibedo Obaŋa ame akica, ame timo jo ber, dok akemo mom maki oyot, mar meri a mom lokere dwoŋ meicel, dok daŋ ijuko cunyi oko i timo gin arac.

³Doŋ pi mannono ba, Rwot, aman doŋ tim ber ikwany kwona oko, pien twara ata kato ame abedo kwo.”

⁴Rwot te gamo ni, “Itimo ber me bedo kede akemo?”

⁵Yona te ya oko iyi boma, te wot bedo i ŋet boma tuŋ kide, te tiyo gonnyere pire kene kuno. En te bedo piny ite tipo mere, me koŋ enen gin ame bi no timere i kom boma.

⁶Rwot rik te miyo coga tu, te doŋo i ŋet Yona, me tipo mere geŋ wie, gwoke i cannere. Coga-nono rik te miyo cuny Yona bedo ayom meicel.

⁷Cite odiko i kare ame piny doŋ oru, Obaŋa te miyo kudi cobo coga-nono oko, te miyo ner oko,

⁸Kare ame ceŋ doŋ odonyo, Obaŋa omio twon yamo moro alyet meicel okuto kun bino i tuŋ kide, ceŋ te cako waŋo wi Yona, ame te miyo kome nyoŋere oko; en te kwayo ni myero eto oko, kun kobo ni, “Twora ato, kato ame abedo kwo.”

⁹Ento Obaŋa te kobbi Yona ni, “Itimo ber me bedo kede akemo pi coga?” En te gamo ni, “Atimo ber me bedo kede akemo, akemo ame romma to.”

¹⁰Rwot dok te kobo ni, “Kica omaki i kom coga ame yin mom itiyo ticcoro i kome, ame mom daŋ yin imio odoŋo, ame odoŋo gire i dyewor acel keken, dok te to daŋ i dyewor acel.

¹¹An kica mom myero maka i kom Nivene ame en twon boma adwoŋ meicel, ame tye iye jo ame kato tutumia mia acel kede pyeraryo oko, ame mom ŋeo poko badgi tuŋ cem kede tuŋ cam, karacel kede dok apol ame tye iye?”