Read lango Wel 10 Bible Online

Wel 10 - lango bible

Wel 10

¹Rwot dok te kobo baŋ Muca ni,

²“Ti apel me ryal aryo, tetgi ateta kede anyul: ticgi bino bedo me lwoŋo lwak i cokere kede me miyo lwak cako wot.

³Ka okuto apel aryo luŋ, lwak luŋ bino cokere baŋi i doggola kema me rwatte.

⁴Ento ka okuto apel acel keken, otel wic ame gin odoŋe ame tye i atekere luŋ me Icrael bino cokere baŋi.

⁵Aco ka okuto dwone okok icel keken idwon me cukkoro cuny mony, gony luŋ ame tye tutuŋ kide bino cako wot.

⁶Ka dok omedo kuto tyen me aryo, gony luŋ ame tye tutuŋ anyarolum bino cako wot. Obino kuto apel kok i dwon me cukkoro cuny mony ka ce jo acako wot.

⁷Cite ka imito lwoŋo jo karacel, obino kuto, ento myero kur mi kok i dwon me cukkoro cuny mony.

⁸Awobe Aron ame gin olamdog en ame bino kuto apel. Cik me kuto apel bino bedo cik atwal, ituno i kare ikwaewu luŋ.

⁹Ka onwoŋo iwot wunu lweny okworwu ame odiowu i lobowu, ibino goyo wunu duru kun apel luŋ kok, me wek po pirwu i nyim Rwot Obaŋawu, eka ote larowu oko i baŋ okworwu.

¹⁰I nino ame cunywu yom iye daŋ, kede iyi ecuban ame ocikowu pirgi, kede i kare me cako dwewu anyen, ibino kuto wunu apel i wi mot awaijawu kede i wi motwu me kweyo cuny; apel bi no kok me miyo po pirwu i nyim Obaŋawu; an a Rwot Obaŋawu.”

¹¹I mwaka me aryo, nino dwe pyeraryo nono, me dwe me aryo pol te cako warre oko i wi kema me kop me caden,

¹²jo Icrael te cako wot me ya oko i tim me Cinai kun okokoba akokob; pol rik te geyo cuŋ i tim me Paran.

¹³Man en tyen me agege ame gin ocako wot pi cik a Rwot ame Muca okobbigi,

¹⁴Bendera a jo Juda en ame otelo yo kun woto eryoŋet eryoŋet; kun Nakucon wot Aminadab en obedo atel wi monygi,

¹⁵Atel wi mony a jo Icakar obedo Natanel wot a Juar,

¹⁶kede atel wi mony me atekere a Jabulon te bedo Eliab wot a Kelon.

¹⁷Kare ame doŋ oputo kema oko, awobe a Gercon kede awobe a Merari, ame gin otiŋ kema, gin te cako wot.

¹⁸Bendera me gony a Reuben daŋ te cako wot eryoŋet eryoŋet, kun atel wi monygi obedo Elijur wot a Cedeur.

¹⁹Atel wi mony me atekere a Cimeon obedo Calamiel wot a Juricadai.

²⁰Atel wi mony me atekere a Gad te bedo Eliacap wot a Deuel.

²¹Jo Kokat te dok cako wot, kun otiŋo jami acil luŋ; rik oguro kema oko kun gin mom ru otuno.

²²Eka bendera me gony a Epraim te cako wot eryoŋet eryoŋet kun atel monygi Elicama wot Amikud.

²³Atel wi mony me atekere a Manace te bedo Gamaliel wot a Pedajur.

²⁴Atel wi mony me atekere a jo Benjamin te bedo Abidan wot a Gideoni.

²⁵Eka icennere dok bendera me gony a jo Dan te cako wot luŋ eryoŋet eryoŋet, kun gin en a doŋ coko te gonye luŋ kun atel wi monygi Akiejer wot Amicadai.

²⁶Atel wi mony me atekere a jo Acer te bedo Pagiel wot Okoran.

²⁷Atel wi mony me atekere a Naputali te bedo Akira wot Enan.

²⁸Man en kite a rik jo Icrael owoto kede, kun lubere eryoŋet eryoŋet i kare ame gin ciro me cako wotgi.

²⁹Muca rik te kobo baŋ Kobab wot a Rewel, or Muca ame rik dano me Midian ni, “Wan doŋ ocako wotwa me wot i kabedo ame Rwot okobo pire ni, ‘Abino miyo baŋwu.’ Doŋ ba, myero iwot kedwa, wan obino timi ber, pien Rwot doŋ ociko oko ni ebino timo Icrael ber.”

³⁰Ento en te kobo ni, “An gira mom abino wot, an abino dok turwa, baŋ jowa.”

³¹Ento jo te kobbigi ni, “Tim ber kur iwekwa, pien yin iŋeo ni wan obino guro kemawa i tim, yin ibino konyowa acalo waŋwa.

³²Dok daŋ ka ce ibino wot karacel kedwa, ginnoro luŋ aber ame Rwot bino timo i komwa, wan daŋ obino timo baŋi kittono.”

³³Gin rik te cako ya oko i nyim kidi a Rwot, i wot me nino adek; adekkono onwoŋo canduk me cikere a Rwot en a woto telo nyimgi kun yenyo kede ka weogi,

³⁴kun pol a Rwot woto i wigi malo dyeceŋ, i kare luŋ ame gin ocako ya i gonygi.

³⁵Kare luŋ ka canduk cako wot, Muca kobo ni, “Ya doŋ malo ama Rwot, me imi okworri keketa atata; dok me jo a dagi riŋ oko i nyimi.”

³⁶Ento ka canduk cuŋ me weo, Muca kobo ni, “Dwog doŋ ceŋ ama Rwot, baŋ jo Icrael tutumia i tutumia.”