Read lango Wel 11 Bible Online

Wel 11 - lango bible

Wel 11

¹Jo Icrael rik te bedo ŋuŋura pi cangi kun Rwot winyo; kare ame Rwot doŋ owinyo, akemo omake, eka mac a Rwot rik te lyel i akinagi, te waŋo kakamogo oko i ŋet gonygi.

²Lwak te kok baŋ Muca, eka Muca te kwayo Rwot, mac ame onwoŋo alyel doŋ te cako to.

³Mano en omio ote cako nyiŋ kabedo-nono ni, Tabera pien mac a Rwot rik olyel i akinagi.

⁴I kare-nono jo ocele ame rokgi papat ame onwoŋo tye i akinagi rik obedo jo a cunygi pupuka meicel, omio jo Icrael daŋ dok te ero koko, kun okobo ni, “Koŋ inen ba, kono obedo giwa i riŋo me acamawa!

⁵Pwod opoyo rec a rik ocamo me nono i Miciri, kede okwer, kede okono, atungulu aboco mege kede en atino mege karacel kede en a tikkege;

⁶aco aman i kare-ni yiwa doŋ otwo imek, ginnoro doŋ mom tye kadi acelloro, kono ka manna ame orio neno-ni.”

⁷Manna rik onwoŋo cal i koti bel, dok daŋ nen calo odok yat olwoŋo ni bedola,

⁸Jo rik coko ote rego kede kidi, onyo odo aoda kede apany, eka ote tedo i gulu, ote tedo i capat; capattere ka icamo, mittere calo capat otedo kede moo.

⁹Rik ka toyo oluk i gony dyewor, manna daŋ onwoŋo obino kede.

¹⁰Muca rik te winyo jo me doggola acel acel tye akoko, kun ŋat acel acel tye i dog kema mere; akemo rik te mako Rwot atek meicel, yi Muca mom te bedo yom.

¹¹Muca te kobo baŋ Rwot ni, “Piŋo kara itimo amironi arac kit man? Dok piŋo kara mom anwoŋo pwoccoro i nyimi ame omio yin doŋ iyimo yec a lwak magi luŋ i wia?

¹²An abedo totogi gin luŋ bo? An en anywalogi, omio yin ikobba ni, ‘Tiŋgi i kori kite ame apidi tiŋo kede atin ame dot, i lobo ame rik ikwoŋo ni ibino miyo baŋ kwarigi.’

¹³Kara riŋo ame aromo miyo baŋ jo man luŋ abino nwoŋo kwene? Pien gin obedo kok i nyima kun okobo ni, ‘Miwa riŋo me ocam.’

¹⁴An gira mom aromo yeyo lwak man luŋ pira kena, yeccere pek okato kare oko baŋa.

¹⁵Ka pwod ibino bedo timo kit man, tika doŋ iru neka gira oko, ka ce anwoŋo pwoccoro i nyimi, me kur doŋ abed neno canna.”

¹⁶Rwot okobo baŋ Muca ni, “Cok ka jo pyerabiro i akina odoŋe a jo Icrael, ame yin iŋeo ni gin obedo odoŋe a lwak ame loogi; kelgi i kema me rwatte, migi ocuŋ kuno karacel kedi.

¹⁷An abino piny me kop kedwu kuno, abino kwanyo cunnyoro i komi, eka ate keto i komgi; gin bino konyi yeyo peko a lwak, me yin kur dok ibed yeyo keni.

¹⁸Kobbi lwak ni, ‘Lonyere wunu pi diki, ibino camo wunu riŋo; pien ibedo kok wunu kun Rwot winyo, ni, “Ŋa kara abino miyowa riŋo me acama? Pien wan giwa rik otye aber i Miciri.” Pi mannono Rwot bino miyowu riŋo, ibino wunu camo.

¹⁹Mom ibino wunu camo nino acel keken, onyo nino abic, onyo nino apar, onyo nino pyeraryo,

²⁰ento pi dwe acel twal, tuno ka riŋo doŋ pello i wumwu, dok daŋ yiwu doŋ okwero oko, pien ikwero wunu Rwot ame bedo i akinawu, kun ikok wunu i nyime ni, “Piŋo kara rik oya oko i Miciri?” ’ ”

²¹Cite Muca te kobo ni, “Jo ame an abedo i akinagi ame woto i tyengi, welgi romo tutumia mia abicel; ento yin ikobo ni, ‘Abino miyowu me icam wunu pi dwe acel twal!’

²²Obino nekkigi dok kede dyegi wek romgi? Onyo obino cokkigi rece luŋ me nam me wek romgi?”

²³Rwot ogamo dog Muca ni, “Ciŋ Rwot doŋ odoko acek oko bo? Ibino neno aman ka ce koppa bino cobere kakare baŋi onyo pe.”

²⁴Muca te wot oko, te wot tito kop a Rwot okobo baŋ jo; eka te coko jo pyerabiro i akina odoŋe me Icrael te canogi mano kema.

²⁵Rwot rik te yitto piny i pol, eka te kop kedgi; te kwanyo cunnyogo ame onwoŋo tye i kom Muca, te keto i kom odoŋe pyerabiro-nono. Kare ame cuny opoto i komgi, gin ocako rabo kop Obaŋa acalo odwarpiny. Cite gin mom dok te medde timo kittono.

²⁶Jo aryo rik onwoŋo odoŋ i gony, acel nyiŋe Eldad, en ocele nyiŋe Medad, cuny rik daŋ te poto i komgi. Gin daŋ onwoŋo rik tye i akina jo ame ocoo nyiŋgi, cite gin gigi rik mom onwoŋo owoto i kema, mannono omio gin obedo rabo kop acalo odwarpiny i gony.

²⁷Atin awobi moro te riŋo wot kobbi Muca ni, “Eldad gin kede Medad tye i gony arabo kop Obaŋa acalo odwarpiny.”

²⁸Eka Yocwa wot a Nun, akony Muca, ame en ŋat acel i akina jo a rik oyero, te kobo ni, “Adwoŋŋa Muca, jukgi oko.”

²⁹Cite Muca te kobbe ni, “Yin nyeko omaki pira ce? Kono jo a Rwot luŋ onwoŋo obedo odwarpiny, kono ber, ame Rwot te onyo cuny i komgi!”

³⁰Muca kede odoŋe a jo Icrael te doŋ dok i gony.

³¹Yamo moro te kodo kun oya i baŋ Rwot, te kelo aluru apipim i nam, te corre piny i ŋet gony, kan ame oony iye laccere romo wot me nino acel tuŋ cel kede dok wot me nino acel tuŋ ocele, kun omano gony amana, ame opoŋ malo futi adek twal ya i piny.

³²I nino-nono luŋ kede dyewor benebene, kede orwo mere daŋ, lwak obedo depo aluru. Ŋat odepo anok, mege oromo puku pyeradek; gin te moyo mano gony luŋ, me akannagi.

³³I kare ame riŋo aluru pwod tye omomoka i lakgi, kun gin mom ru ocamo otum, akemo te mako Rwot i kom lwak, Rwot te goyogi kede too edeke agwa meicel.

³⁴En omio nyiŋ kabedo nono olwoŋo ni, Kibrot-atava[2], pien oyiko iye kom jo a rik keo riŋo omako.

³⁵Jo te ya i Kibrot-atava wot a Kajerot; gin te bedo i Kajerot.