Read lango Wel 12 Bible Online

Wel 12 - lango bible

Wel 12

¹Miriam kede Aron te cako kobo kop arac i kom Muca pi dako mere nyaka a jo Kuc, ame onwoŋo en onyomo, pien onwoŋo rik en onyomo nyaka a jo Kuc.

²Gin obedo kobo ni, “Rwot obedo miyo Muca keken en ame kobo koppere bo? Mom obedo miyowa miyowa daŋ kobo koppere?” Rwot te winyo koppono oko.

³Muca rik onwoŋo dano a mwol meicel, ame kato jo luŋ ame rik onwoŋo tye i wi lobo.

⁴Oyot Rwot te ru kobbi Muca kede Aron kede Miriam ni, “Wun adek ducu, wot wunu i kema me rwatte.” Gin adek luŋ daŋ ote wot.

⁵Rwot rik te yitto piny i pagi me pol, te cuŋ i doggola kema, eka te lwoŋo Aron kede Miriam; gin aryo luŋ ote kato anyim.

⁶Rwot te kobo ni, “Winy wunu koppa. Ka ce tye adwarpinnyoro i akinawu, an Rwot anyutte kena baŋe i anyut, akobo kede i wan lek.

⁷Mom atimo kittono baŋ amirona Muca; atyeko miyo oda luŋ i ciŋe.

⁸Akobo kede dog i dog, kun akobo atira, mom dok i kop a mom atira; dok en neno kite a Rwot cal kede. Piŋo kara mom ibedo wunu lworo me kobo kop arac i kom amirona Muca?”

⁹Akemo omako Rwot i komgi, te wot oko.

¹⁰Kare ame pol owarre oko i wi kema, nen ba, dobo orwatte i kom Miriam atar calo pee. Aron te lokere baŋ Miriam, nen ba, dobo orwatte oko i kome.

¹¹Aron te kobo baŋ Muca ni, “Ama adwoŋŋa, kur iket can i komwa pien wan otimo tim me miŋo, daŋ doŋ obalo.

¹²Kur imi en bed calo atin ame oto iyi totere, ko me te cako top oko kun mom ru onywalo.”

¹³Muca te kok baŋ Rwot ni, “Caŋe ba, ama Rwot, abako doga baŋi.”

¹⁴Cite Rwot te kobbi Muca ni, “Kono pappere rik onwoŋo oŋulo lao i waŋe, kono mom en obedo i lewic pi nino abiro? Myero koŋ cege i ot pi nino abiro; i ne mannono ote kele doŋ i gony.”

¹⁵Rik daŋ ote cego Miriam i ot i ŋe gony pi nino abiro; jo Icrael mom omedde i wotgi tuno waŋ ame odwoggo Miriam i gony.

¹⁶I ŋe mannono, jo Icrael doŋ te cako wotgi kun oya oko i Kejerot, ote wot guro kemagi i tim me Padan.