Read lango Wel 13 Bible Online

Wel 13 - lango bible

Wel 13

¹Rwot okobbi Muca ni,

²“Cwa jo wot rot lobo me Kanaan ame abino miyo baŋ jo Icrael. I kom jo ame icwayo, dano bino ya i atekere a kwarigi luŋ, kun ŋat acel acel nwoŋo atel acel i akinagi.”

³Mannono omio Muca ocwaogi iya i tim me Padan, kite a Rwot ociko kede; gin luŋ onwoŋo obedo odoŋe a loo lwak jo Icrael.

⁴Nyiŋgi ene: Iyi atekere a Reuben rik oya iye Camma wot a Jakur;

⁵i atekere me a Cimeon te ya iye Capat wot a Kori;

⁶iyi atekere a Juda oya iye Kaleb wot a Jepune;

⁷iyi atekere Icakar oya iye Igal wot a Yucepu;

⁸iyi atekere Epraim oya iye Kocea wot a Nuni;

⁹iyi atekere a Benjamin oya iye Paloti wot a Rapu;

¹⁰iyi atekere a Jabulon oya iye Gadiel wot a Codi;

¹¹iyi atekere a Yucepu ame obedo atekere a Manace, oya oye Gaddi wot a Cuci;

¹²iyi atekere a Dan oya iye Amiel wot a Gemali;

¹³iyi atekere Acer oya iye Cetur wot a Mikael;

¹⁴iyi atekere a Naputal i oya iye Nabi wot a Vopci;

¹⁵iyi atekere a Gad oya iye Rewel wot a Maki.

¹⁶Mannono en jo ame Muca ocwao me roto lobo. Muca ocako nyiŋ Kocea wot a Nuni ni, Yocwa.

¹⁷Muca ocwaogi me wot roto lobo me Kanaan kun kobbigi ni, “Wot wunu naka i Negeb kuca, ite kato wunu malo i lobo obedo kidikidi,

¹⁸me inen wunu kite ame lobo-nono tye kede, ka ce jo ame bedo i lobo-nono obedo jo atek onyo jo agoro, ka ce ononok onyo opol,

¹⁹ka lobo ame gin obedo iye-nono ber onyo rac, ka ce pacci ame gin bedo iye obedo gonye gonye onyo pacci ame ocecelo oko i cel atek,

²⁰ka ce lobo mere ceko cam onyo mom gire ceko cam, ka ce yen tye i lobo-nono onyo mom gire tye. Bed wunu jo ame cunywu nwaŋ, ikel wunu nyig yennogo me lobo-nono.” Pien kare-nono onwoŋo en kare ame nyig olok geo cek iye.

²¹Mannono omio gin owoto oroto piny kun ocako i tim me Jin tuno naka i Rekob, ame ceggi i dog yo me Kamat.

²²Gin owoto naka i Negeb, ote tuno naka i Kebron; Akiman, Cecai kede Talmai ikwae Anak onwoŋo tye kuno, (Kebron rik onwoŋo ogero te ri mwaka abiro twal kun mom ru ogero Joan ame tye i Miciri.)

²³Orot-piny te tuno naka i luŋ me Ecikol, gin rik ote ŋolo etak acel me jan olok ame onyak onugo anuga, ame jo aryo i akinagi te dyelo adyela kede yat; ote daŋ kelo nyig yat e okwer pomegranat kede nyig oduro.

²⁴Kabedo-nono rik olwoŋo ni luŋ me Ecikol pien jo Icrael oŋolo iye etak acel i jan olok onyak onugo anuga.

²⁵Kare ame nino pyeraŋwen doŋ okato, gin ocako dwogo oko i roto piny i lobo-nono.

²⁶Gin odwogo baŋ Muca kede Aron ame onwoŋo tye i tim me Padan i Kadec; gin okelligi kop i kom lobo-naca, baŋ lwak jo Icrael luŋ, dok daŋ ote nyuttigi gin ame ocek i lobo-naca.

²⁷Gin otittigi ni, “Wan otuno i lobo ame rik icwaowa iye; cak kede moo kic mol amola iye, kit gin ocek iye ene.

²⁸Aco kono jo ame bedo iye obedo jo atek, paccigi luŋ daŋ ocecelo oko atek kun daŋ doŋodoŋo; medo i kom ennono, oneno daŋ ikwae Anak kuno.

²⁹Jo Amalek bedo i lobo me Negeb; aco jo Kitti, jo Jebuc, kede jo Amor, gin obedo i lobo obedo kidikidi; jo Kanaan te bedo i lobo ame omano dog nan, kede en ame omano dog Jordan.”

³⁰Ento Kaleb te juko jo liŋ i nyim Muca, te kobo ni, “Wan myero oru wot kuno me owot ogam wunu oko; pien wan giwa oromo loyogi oko oyot.”

³¹Jo ame rik owoto kede kuno te gamo ni, “Wan kom mom oromo wot lweny i kom jo-nono; pien gin tek katowa oko.”

³²Mannono omio gin okelo kop arac baŋ jo Icrael i kom lobo ame gin oroto, kun okobo ni, “Lobo ame wan obe bea i yie me roto, lobo-naca rac neko jo ame bedo iye; dok jo luŋ ame wan oneno iye, obedo jo ame komgi pek atek.

³³Oneno daŋ jo Nepili kuno (ame gin ikwae Anak, ame oya i baŋ jo Nepili); ame wan ikomwa doŋ onen ocalo ocenne; gin daŋ onenowa ocal kittono.”