Read lango Wel 14 Bible Online

Wel 14 - lango bible

Wel 14

¹Lwak luŋ te cako redo i koko; jo te kok dyeworrono luŋ.

²Jo Icrael te cako ŋuŋura i kom Muca kede Aron; lwak luŋ te kobbigi ni, “Kono rik giwa oto i lobo Miciri! Onyo kono rik giwa oto i tim.

³Piŋo kara Rwot okelowa i lobo man, me miyowa to i pala lweny? Monwa kede itinowa doŋ bino doko jo ame okworwa bino yako; onwoŋo mom twero bedo ber wan me dok ceŋ i Miciri?”

⁴Gin te cako kop kengi kengi ni, “Oyer wunu ŋat ame telowa, me odok wunu cen i Miciri.”

⁵Muca kede Aron te ryebere piny i nyim jo Icrael luŋ ame ocokere.

⁶Yocwa wot a Nuni kede Kaleb wot a Japune ame rik gin tye i akina jo ame oroto lobo-naca, gin oyeyecoboŋŋigi oko,

⁷kun okobbi lwak jo Icrael luŋ ni, “Lobo ame wan obe bea i yie me roto, lobo-nono onwoŋo ber odoco.

⁸Ka ce Rwot obedo i yomcuny i komwa, en bino terowa i lobo man, te miyo i ciŋwa, lobo ame cak kede moo kic mol amola iye.

⁹Jem i kom Rwot en a myero iwek wunu bedi; dok kur daŋ ilwor wunu jo me lobo-naca, pien gin obedo ogati me acanawa. Gin a geno negi doŋ mom, dok Rwot gire tye kedwa; kur ilwor wunugi.”

¹⁰Cite lwak luŋ te kobo ni nanapogi oko i gweŋe. Kwogo a Rwot te nen i kema me rwatte i nyim jo Icrael luŋ.

¹¹Rwot te kobo baŋ Muca ni, “Jo-ni kara bino bedo caya pi kare a rom mene? Obino kara kwero ye an pi kare a rom mene, kadi bed abedo tiyo anyut apol rom man i akinagi?

¹²Abino goyogi kede too edeke, dok daŋ abino twonogi lobo ame kono onwoŋo amigi me bedo megi, ate miyi yin doko rok adwoŋ dok daŋ atek a katogi oko.”

¹³Ento Muca te kobo ni. “Jo Miciri bino winyo, pien rik ikwanyo jo-ni kede tekoni i akinagi,

¹⁴gin bino tito koppere baŋ jo ame bedo i lobo man. Gin doŋ otyeko winyo ni yin Rwot itye i akina jo man; pien jo-ni obedo neni waŋ i waŋ kun pol meri bedo cuŋ i wigi malo. Yin Rwot ibedo telo nyimgi i pagi me pol dyeceŋ kede i pagi me mac dyewor.

¹⁵Doŋ aman ka ce yin ibino neko jo-ni luŋ awaŋe acel, rok ocele ame rik nyiŋi orwo owinyere baŋgi bino kobo ni,

¹⁶‘Pien tero jo man oloo Rwot oko i lobo ame rik ekwoŋo ni ebino miyogi, en gin omio en doŋ onekogi oko i tim.’

¹⁷Aman doŋ tim ber, wek onen ni tekoni dwoŋ, ama Rwot kite a rik iciko kun ikobo ni,

¹⁸‘Rwot gire akemo mom mako oyotoyot, marrere mom lokere, kun timo kica i bal kede i tim me turo cik, cite mom gire kwanyo kop i kom jo obalo, cite keto can i kom ikwae kede dok i kom ikwae ikwaegi, pi bal a kwarogi naka i lwagi me adekkere kede me aŋwennere.’

¹⁹Tim ber i tim jo-ni kica i balgi, kite acalo mar meri a mom lokere dwoŋ kede, dok kite ame ibedo timo kede jo man kica cakere i Miciri tuno kede naka atot i kare man.”

²⁰Rwot te gamo ni, “Doŋ atyeko timogi kica kite ame ikobo.

²¹Cite ateni, kite acalo an atye kwe-ni, dok kite acalo kwogo a Rwot bino poŋo lobo luŋ oko-ni,

²²i kom jo ame oneno kwogona mede anyut ame rik atio i Miciri kede i tim, eka gin dok te bedo omo yia, ame man doŋ odoko tyen me tomonnere twal, kun daŋ mom owinyo koppa, mom tye moro i akinagi,

²³ame bino ne no lobo ame rik akwoŋo ni abino miyo baŋ kwarigi; mom tye ŋattoro i akina jo luŋ ame ocaa ame bino neno lobo-naca.

²⁴Ento amirona Kaleb, pien en obedo i cuny apat, dok daŋ obedo luba i yore ducu, abino tere i lobo ame en rik owoto iye-nono, eka ikwae te gamo lobo-nono.

²⁵Doŋ aman ba, kite acalo jo Amalek kede jo Kanaan bedo i luŋ ducu, diki myero wun dok icak lokere wunu iwot wunu tuŋ tim i yo ame woto i Nam Arema.”

²⁶Rwot dok te kobo baŋ Muca kede Aron ni,

²⁷“Lwak jo areco-ni kara bi no bedo ŋuŋura i koma naka awene? Atyeko doŋ winyo ŋuŋura a jo Icrael luŋ ame gin obedo ŋuŋura kede i koma.

²⁸Kob baŋgi ni, ‘Kite acalo an atye kwo-ni, gin ame doŋ ikobo wunu, ame yita owinyo, abino ti mo i komwu.

²⁹Komwu ame oto bino radde ata i tim; wun jo luŋ ame welwu rik okwano, cakere i kom jo ame mwaka me ditogi oromo pyeraryo wot kede malo, gin luŋ ame obedo ŋuŋura i koma;

³⁰moro acel iye mom bino tuno i lobo ame rik akwoŋo ni abino miyowu ibedo wunu iye, kwanyo ka Kaleb wot a Jepune kede Yocwa wot a Nuni, gin en ame bino tuno kuno.

³¹Ento itinowu ame wun ikobo wunu ni bino doko jo me ayaka okworwu, gin en ame abino tero kuno, gin te ŋeyo lobo ame wun icao wunu.

³²Aco wun, komwu ame oto bino radde ata i tim kano

³³Dok itinowu koŋ bino bedo okwat i tim pi mwaka pyeraŋwen, kun oneno can pi kite ame wun ibedo wunu turo cik a Rwot, tuno ka kom dano oto me agikki i akinawu doŋ odoŋ i tim kano

³⁴Ibino neno wunu can pi mwaka pyeraŋwen, ame oporo wei ni no ame rik iroto wunu kede lobo, nino pyeraŋwen, mwaka acel pi nino acel acel, ite ŋeyo wunu kite ame cunya ocwer kede.’

³⁵An Rwot doŋ akobo; ateteni abino timo man i kom lwak jo areco-ni luŋ ame ocokere karacel me pyem keda; gin luŋ biŋo tum i tim kan, gin bi no to kuno.”

³⁶Jo ame rik Muca ocwaogi me roto lobo, ame rik te dwogo miyo lwak luŋ ŋuŋura i kom Muca pi kela kop arac i kom lobo-naca,

³⁷gin jo a rik okelo kop arac i kom lobo-naca, too edeke te nekogi oko i nyim Rwot.

³⁸Ento Yocwa wot a Nuni kede Kaleb wot a Jepune odoŋ gigi akwo, i kom jo a rik owoto oroto lobo.

³⁹Muca rik te kobo koppono luŋ baŋ jo Icrael, jo te kok meicel.

⁴⁰Gin rik te dilo ibayi, ote wot kwaro lobo obedo kidikidi, kun okobo ni, “Koŋ inen doŋ wan otye kan, wan doŋ obino wot i lobo ame Rwot rik ociko pire; pien wan doŋ obalo.”

⁴¹Cite Muca te kobbigi ni, “Piŋo kara aman dok ituro wunu cik a Rwot? Pien mano gire mom bino twerre.

⁴²Kur iwot wunu kuno, naka mio obino timowu lit i nyim okworwu, pien Rwot gire mom tye i akinawu.

⁴³Jo Amalek kede jo Kanaan tye i nyimwu kuno, pala lwenygi bino tyekowu oko; pien ikwero wunu lubo Rwot, Rwot gire mom bino bedo kedwa.”

⁴⁴Ento gin ote nwette ni owot kwaro lobo obedo kidikidi, akadi kono canduk cikere a Rwot kede Muca mom oya i gony.

⁴⁵Eka jo Amalek kede jo Kanaan ame bedo i lobo obedo kidikidi kuno, te yitto piny, ote loyogi oko kun oryemogi naka i Korma.