Read lango Wel 15 Bible Online

Wel 15 - lango bible

Wel 15

¹Rwot okobbi Muca ni,

²“Kobbi jo Icrael ni, Ka doŋ ituno wunu i lobo ame ibino wunu bedo iye, ame amiowu,

³ce imiyo wunu mot baŋ Rwot kun imiyo wunu dyaŋ onyo romo me mot owaŋo i mac onyo mot awaŋa, onyo mot aŋola, me cobo kwon onyo me ber a yic onyo i kare me ecubanwu ame ociko, me timo gin a ŋwece kur a yomoro cuny Rwot,

⁴ŋat ame okelo mottere myero mi baŋ Rwot moko kwon apwottere a romo gwata acel ame orubo kede moo ame romo cupa aryo kede nucu, me bed mot me moko kwon.

⁵Dok daŋ ibino wunu yiko vino me mot amata pi mot awaŋa onyo mot ocele, ame romo cupa aryo kede nucu pi romo acel acel.

⁶Onyo ka pi nyok romo, ibino yiko moko kwon apwottere ame romo gwata aryo ame orubo kede moo ame romo cupa adek me mot me moko kwon.

⁷Pi mot amata ibino miyo vino ame romo cupa adek, me bed gin a ŋwece kur a yomoro cuny Rwot.

⁸Aco ka iyiko twon me yalo Rwot me mot awaŋa, onyo me mot ocele ame oŋolo, onyo me cobo kwoŋ, onyo me kweyo cuny,

⁹mot me moko kwon a myero mi karacel i twon en moko kwon apwottere ame romo gwata adek ame orubo kede moo ame romo cupa abic, me bed mot me moko kwon;

¹⁰ibino miyo vino ame romo cupa abic me mot amata, me bed mot ame owaŋo i mac, gin a ŋwece kur a yomoro cuny Rwot.

¹¹“Obino timo kittono i kom twon acel acel, atin nyok romo onyo atin nyok dyel acel acel.

¹²Ibino wunu tiyo kun ilubo wunu wel leyi ame iyiko wunu; ibino timo wunu kittono i kom lee acel acel kite ame welgi tye kede.

¹³Jo ame gin obedo anywalli me lobo luŋ bino timo kittono ka gin mio mot ame owaŋo i mac, gin a ŋwece kur a yomoro cuny Rwot.

¹⁴Ka ce arokkoro odoko ŋat ame bedo i akinawu onyo ŋattoro keken ame bedo i akinawu, naka i kare ikwaewu luŋ, ka ce en mito miyo mot ame owaŋo i mac, gin a ŋwece kur a yomoro cuny Rwot, en daŋ bino timo kite ame wun itimo wunu kede.

¹⁵Cik bino bedo acel pi lwak ocokere, pirwu, kede pi arok ame bedo i akinawu; mannono bino bedo cik atwal, tuno i kare ikwaewu luŋ; arok ame bedo i akinawu bino bedo a rom kedwu i nyim Rwot.

¹⁶Cik bino bedo acel, icwil daŋ acel, pi wun kede arok ame bedo i akinawu.”

¹⁷Rwot okobo baŋ Muca ni,

¹⁸“Kob baŋ jo Icrael ni, Kare ame ibino tuno wunu i lobo ame aterowu iye-ni,

¹⁹ka doŋ icamo wunu cam me lobo-naca, ibino miyo wunu mot baŋ Rwot.

²⁰I kom moko ogati ame igeo rubo wunu, ibino wunu miyo capat acel obed acalo mot me yalo Obaŋa, ibino miyo wunu kite ame omio kede mot ame oya i laro dino kal.

²¹Ibino wunu miyo mot baŋ Rwot i kom moko ogati ame ogeo rubo naka i kare ikwaewu luŋ.

²²“Aco ka ce iroco wunu, kun mom igwoko wunu cik magi ame Rwot rik okobo baŋ Muca,

²³ginnoro luŋ ame Rwot rik ocikowu iye kun kobo baŋ Muca, cakere i nino ame Rwot rik omio kede cik, wot kede anyim naka i kare ikwaewu luŋ,

²⁴ka ce ŋat oroco mom otimo me akaka, kun lwak mom oŋeo, lwak luŋ bino yalo Obaŋa atin twon etobayit acel me mot awaŋa, gin a ŋwece kur a yomoro cuny Rwot, karacel i mottere me moko kwon kede mot amata kun olubo cik, karacel kede nyok dyel acel me mot me bal.

²⁵Alamdog bino tiyo tic me kwanyo bal i kom lwak jo Icrael luŋ, Rwot daŋ bino weko balgi, pien nwoŋo gin mom obalo me akaka, dok gin otyeko kelo motgi, mot ame owaŋo i mac baŋ Rwot, dok okelo daŋ motgi me bal i nyim Rwot, pi balgi ame gin mom otimo me akaka,

²⁶Obino weko bal a jo Icrael luŋ, karacel kede me orok ame bedo i akinagi, pien bal ame mom otimo me akaka-nono omako jo ducu.

²⁷“Ka ce dano moro acel en obalo kun mom obalo me akaka, en bino kelo akale dyel acel ame dittere romo mwaka acel, me mot me bal.

²⁸Alamdog bino tiyo tic me kwanyo bal i kome i nyim Rwot pi bal ame en opoto iye kun mom otimo me akaka, me kwanyo bal i kome; Rwot daŋ bino weko ballere.

²⁹Cik bino bedo acel pi dano otimo bal kun mom otimo me akaka kadi bed dano-nono anywalli me Icrael, onyo arokoro ame bedo i akinagi.

³⁰Ento ka ce dano moro otimo bal me akaka, kadi bed en anywalli me lobo onyo arok, nwoŋo oyeto Rwot, dano-nono waŋe bino rwenyo oko i akina jo me turgi.

³¹Pien ocao kop a Rwot, dok daŋ oturo cikkere, dano-nono wane bi no rwenyo odoco; ballere bino dok i wie.”

³²I kare ame jo Icrael tye i tim, gin onwoŋo dano moro ame onwoŋo tye amwodo yen i ceŋ cabit.

³³Jo a rik onwoŋo en tye amwodo yen te kele baŋ Muca kede Aron, kede baŋ lwak luŋ.

³⁴Gin te kete koŋ i buc, pien onwoŋo Rwot mom ru onyuto baŋgi gin a myero tim i kome.

³⁵Rwot te kobbi Muca ni, “Dano-nono obino neko oko; lwak luŋ bino nanapo en kede gweŋe oko i ŋe gony.”

³⁶Lwak luŋ te tere oko i ŋe gony, ote nanapo en kede gweŋe ote neke oko, kite ame Rwot ociko kede Muca.

³⁷Rwot okobo baŋ Muca ni,

³⁸“Kobbi jo Icrael kun icikogi ni okwo awula i dog bomŋigi, tuno naka i kare ikwaegi luŋ, dok daŋ oket tol obedo bululu bululu i kom awula acel acel ame tye i lak boŋo.

³⁹Awula-nono bino bedo me anenawu, me poyo wiwu i cik a Rwot luŋ, me icob wunu, mom ilubo wunu tamwu kenwu kede gin ame waŋwu oneno, ame imaro wunu lobo pi mitwu kenwu.

⁴⁰Ibino wunu po cikka ducu kun daŋ icobo wunu kittono, ite bedo wunu jo acil pi Obaŋawu.

⁴¹An a Rwot Obaŋawu ame akwanyowu i lobo me Miciri, me bedo Obaŋawu: an a Rwot Obaŋawu.”