Read lango Wel 16 Bible Online

Wel 16 - lango bible

Wel 16

¹Kora wot a Ijar, ame obedo wot a Kokat, wot a Levi, karacel kede Datan kede Abiram, awobe Eliab, kede On wot a Palet, awobe a Reuben,

²gin otero jo; gin te cako ayela i kom Muca, karacel kede jo mogo apopol i akina jo Icrael, otel a lwak mia aryo kede pyerabic ame oyero i akina jo ocokere ame gin jo a ŋeye meicel.

³Gin ocokere luŋ karacel i kom: Muca kede i kom Aron, ote kobbigi ni, “Iwoto wunu dok atut okato kare oko! Pien lwak luŋ cil, gin luŋ aluŋa, Rwot daŋ tye i akinagi. Kara piŋo wun dok ikette wunu malo amala ikato lwak a Rwot?”

⁴Kare ame Muca owinyo, oryebere piny;

⁵eka te kobo baŋ Kora kede lwakkere ni, “Diki odiko Rwot en ame bino nyuto dano mere, kede dano ame cil; bino miyo noke aceggi; ŋat ame en bino yero, en bino miyo noke aceggi.

⁶Doŋ gin a myero itim wunu ene: kwany wunu tabo me waŋo odok akur, Kora kede lwakkere luŋ.

⁷Ket wunu mac i yigi, ite daŋ keto wunu odok akur iye i nyim Rwot diki; doŋ ŋat ame Rwot bino yero, en bino bedo ŋat acil. Iwoto wunu dok atut okato kare, wun awobe a Levi!”

⁸Muca dok te kobo baŋ Kora ni, “Koŋ iwiny wunu, wun awobe a Levi:

⁹Wun ibwono wunu ni obedo ginnoro atidi moro Rwot a jo Icrael me pokowa i kom jo Icrael, te miyowu bino aceggi baŋe, me tiyo tic i kema a Rwot, kun icuŋ wunu i nyim lwak, itio wunu pirgi?

¹⁰Dok ni en daŋ okelli aceggi baŋe, yin karacel kede omegoni luŋ ame gin obedo awobe a Levi? Aman doŋ dok iyenyo wunu yo me doko olamdog?

¹¹Man wun ijem wunu i kom Rwot, en omio yin karacel kede lwakki icokere wunu karacel. Aron kara gin aŋo ba ame iŋuŋura wunu i kome-ni?”

¹²Muca dok te cwalo dano lwoŋo Datan kede Abiram ame gin awobe a Eliab; gin te kobbe ni, “Wan giwa mom obino wot.

¹³Pwod ibwono ni obedo ginnoro atitidi, yin me kwanyowa oko i lobo me Miciri, i lobo ame cak kede moo kic mol amola iye, me neko wa i tim? Myero yin dok ikette keni me bedo aloc me loyowa?

¹⁴Dok daŋ mom ru ikelowa i lobo ame cak kede moo kic mol amola iye, akadi miyowa poto moro, onyo potti olok me bedo megwa. Yin ibino wumo waŋ jo-ni oko? Wan giwa mom obino tuno kuno.”

¹⁵Akemo te mako Muca atek meicel, te kobo baŋ Rwot ni, “Kur igam motgi. An mom ru agamo kana moro kadi acel i baŋgi, daŋ mom atimo ginnoro arac i kom dano moro i akinagi.”

¹⁶Muca dok te kobbi Kora ni, “Yin karacel kede lwakki myero ibin wunu i nyim Rwot diki, yin kede gin, karacel kede Aron;

¹⁷kun nwoŋo ŋat acel acel i akinawu omako tabo mere me waŋo odok akur. Ket wunu odok akur i yigi, eka ŋat acel acel te kelo tabo mere me waŋo odok akur i nyim Rwot, tabo mia aryo kede pyerabic; yin daŋ karacel kede Aron, ŋat man myero bin kede tabo mere.”

¹⁸Ŋat acel acel te kwanyo tabo mere, te keto mac iye, ote dok keto iye odok akur, gin te doŋ cuŋ i dog kema me rwatte, karacel kede Muca kede Aron.

¹⁹Kora ocoko lwak luŋ i komgi kittono, i dog kema me rwatte, eka kwogo a Rwot te nen baŋ lwak luŋ.

²⁰Rwot dok te kobo baŋ Muca kede Aron ni,

²¹“Wun pokere wunu oko i akina lwak man, me wek aru tyekogi oko aman.”

²²Gin te ryebere piny kun okobo ni, “Ama Obaŋa, Obaŋa ame won tipo a jo luŋ, bal a dano acel mio akemo maki i kom lwak luŋ?”

²³Rwot te kobo baŋ Muca ni,

²⁴“Kobbi lwak luŋ ni, ‘Ya wunu oko i kan ame jo a Kora bedo iye, kede Datan, kede Abiram.’ ”

²⁵Muca te ya wot baŋ Datan kede Abiram, odoŋe a jo Icrael daŋ te lubo yore,

²⁶En te kobbi lwak ni, “Tim wunu ber iya wunu oko i kema a jo areco-ni, kur igud wunu gigi moro, naka mio wun daŋ oweowu oko karacel kedgi ibalgi luŋ.”

²⁷Omio lwak te ya oko i kan ame jo a Kora kede Datan kede Abiram tye iye; eka Datan kede Abiram te kato oko, ote cuŋ i dog kemagi, karacel kede mongi, kede awobegi kede itinogi atino.

²⁸Muca te kobo ni, “Man en gin ame bino miyo iŋeo wunu ni Rwot Obaŋa kara ocwaa me tiyo tic man ducu, dok mom abedo tiyo pira kena.

²⁹Ka ce jo man bino to kite a jo luŋ to kede me nino ducu, onyo ka ce cannoro a poto i kom jo luŋ en ame opoto i komgi, mom nwoŋo Rwot en oora.

³⁰Ento ka Rwot bino keto ginnoro ocele anyen, eka lobo te ŋamo doge mwonyogi oko, karacel i jamigi luŋ, eka gin te donyo akwo i lyel me Ceol, ibino ŋeyo wunu ni jo-ni kara obedo cayo Rwot.”

³¹Kare ame Muca doŋ otyeko kobo kop man ducu, lobo ame gin onwoŋo ocuŋ iye, te barre, yabere oko,

³²lobo te ŋamo doge mwonyogi oko karacel kede jo me udigi, kede lwak a Kora luŋ, kede jamigi luŋ.

³³Gin karacel kede jogi luŋ kede jamigi luŋ te donyo akwo i lyel me Ceol kittono; lobo te wumogi oko, gin doŋ te rwenyo oko i akina lwak.

³⁴Jo Icrael luŋ ame rik omanogi te belle i rjwec pi winyo kokogi; pien gin obedo kobo ni, “Naka mio wan daŋ lobo mwonyowa oko!”

³⁵Mac daŋ dok te ya ibaŋ Rwot, te tyeko jo mia aryo i pyerabic ca oko, ame onwoŋo tye awaŋo odok akur.

³⁶Rwot dok te kobbi Muca ni,

³⁷“Kobbi Eleajar wot Aron alamdog, okwany tabbi me waŋo odok akur oko i mac a lyel, eka te oonyo mac i yigi oko kun keketo atata. Pien gin obedo gin acil,

³⁸magi-nono obedo tabbi a jo ame balgi okelligi to. Pi mannono, myero papadogi oko arep kun odidinogi anyul, me gin bed gi-wumo wi keno lam; pien rik gin doŋ omio oko baŋ Rwot, mannono mio gin bedo jami acil. Mannono bino miyo gin bedo anyut baŋ jo Icrael.”

³⁹Eleajar alamdog daŋ te kwanyo tabbi me mola kittono, ame rik jo ame mac owaŋo otyeko miyo baŋ Rwot, gin te papado me wumo wi keno lam,

⁴⁰me bed gin me poyo wi jo Icrael, wek ŋattoro a mom obedo alamdog, ame mom obedo ikwae Aron, kur bin cok me waŋo odok akur i nyim Rwot, me gin daŋ kur bed bala Kora onyo acalo lwakkere, kite a Rwot omio Muca okobo kede baŋ Eleajar.

⁴¹Ento orwo mere lwak jo Icrael luŋ te dok ŋuŋura i kom Muca kede i kom Aron, kun okobo ni, “Wun ineko wunu jo a Rwot.”

⁴²Kare ame lwak doŋ ocokere me pyem i Muca kede Aron, gin olokere tutuŋ kema me rwatte; nen ba, pol onwoŋo owumo kome oko, kwogo a Rwot te nen.

⁴³Muca kede Aron te wot i nyim kema me rwatte,

⁴⁴Rwot te kobbi Muca ni,

⁴⁵“Ya oko i akina lwak man, me wek aru tyekogi oko aman.” Gin te ryebere piny.

⁴⁶Muca te kobbi Aron ni, “Kwany taboni me waŋo odok akur me iket iye mac ame itoko i keno lam, eka ite keto iye odok akur, tin, ite ru tero baŋ lwak, iwot iti tic me kwanyo bal i komgi, pien akemo ame oya i baŋ Rwot doŋ obino oko, to edeke daŋ doŋ acakere oko.”

⁴⁷Aron daŋ te kwanyo kittono, kite ame Muca okobbe, te riŋo i akina lwak. En te keto odok akur i tabo, te tiyo tic me kwanyo bal i kom lwak.

⁴⁸En te cuŋ i akina jo oto kede akwo, to edeke te gik oko.

⁴⁹Jo ame to edeke oneko obedo tutumia apar wie aŋwen, kede mia abiro, kun nwoŋo mom oribo iye jo ame oto pi tim a Kora,

⁵⁰Kare ame too edeke ogik, Aron odok ceŋ baŋ Muca, i dog kema me rwatte.