Read lango Wel 17 Bible Online

Wel 17 - lango bible

Wel 17

¹Rwot okobbi Muca ni,

²“Kobbi i jo Icrael, ite gamo abiro i baŋgi, kun igamo abiro acel i ot a kwarogi acel acel, i baŋ otelgi luŋ, kun lubo doggola a kwarigi, gin luŋ abiro apar wie aryo. Co nyiŋ dano acel acel i kom abiro mere,

³eka ite coyo nyiŋ Aron i kom abiro a jo Levi; pien adwoŋ acel acel a loo doggola me ot a kwarogi bino bedo kede abiro mere.

⁴Yin ibino ketogi iyi kema me rwatte i nyim canduk me kop caden, kan ame arwatte kedwu iye.

⁵Doŋ abiro a ŋat ame abino yero, bino lot; mannono bino miyo agiko ŋuŋura a jo Icrael i komwu.”

⁶Muca daŋ te kobo baŋ jo Icrael; otelgi luŋ te miye abiro, kun atel acel acel mio abiro acel kun lubo doggola a kwarigi, gin luŋ abiro apar wie aryo; abiro Aron daŋ onwoŋo tye i akina megi.

⁷Muca te keto abiro luŋ i nyim Rwot i kema me kop me caden.

⁸Orwo mere Muca te donyo i kema me kop caden; nen ba, abiro Aron ame onwoŋo ocuŋ pi ot a jo Levi onwoŋo olot oko, onok, daŋ te keto ture, te nyak, te daŋ cek.

⁹Muca te kelo abiro luŋ ame onwoŋo tye i nyim Rwot oko, te tero baŋ jo Icrael, gin te neno, eka ŋat acel acel te kwanyo abiro mere,

¹⁰Rwot te kobo baŋ Muca ni, “Dwok abiro Aron kakare i nyim canduk me kop me caden, me gwok bed me anyut pi jo ame ojem, me ijuk ŋuŋuragi i koma, gik oko, me kur oto.”

¹¹Muca daŋ te timo kittono, kite ame Rwot ocike kede, en te timo kittono.

¹²Jo Icrael te kobo baŋ Muca ni, “Nen ba, wan doŋ oto otum oko, wan luŋ doŋ otum oko,

¹³Ŋat acel acel ame noko ceggi, ame noko ceggi i ŋet kema a Rwot, to oko. Omito ni wan oto otum oko iweŋ bo?”