Read lango Wel 19 Bible Online

Wel 19 - lango bible

Wel 19

¹Rwot dok te kobo baŋ Muca kede Aron ni,

²“Man en icwil ame Rwot ociko: Kobbi jo Icrael kelli roya arema, ame kakannoro i kome mom oballe, ame roccoro daŋ mom i kome, dok ame lodi moro mom ru ogudo ŋute,

³Ibino miyo wunu baŋ Eleajar alamdog, eka ote tero wot neko oko i ŋe gony i nyim Eleajar.

⁴Eleajar alamdog bino gweto remo mere mogo i nyako ciŋe, te kikiro remo mo go tutuŋ nyim kema me rwate tyen abiro.

⁵Eka ote doŋ waŋo riŋo roya-nono i nyime; obino waŋo pyennere, riŋo mere, remo mere kede wee mere.

⁶Alamdog bino kwanyo yat cedar kede jaŋ yat acalo ogudo kede anyero kede uci arema, te bologi i dye mac ame awaŋo riŋo roya.

⁷Eka alamdog te lwoko boŋŋi mere, te daŋ lwoko kome kede pii, icennere, en doŋ te dwogu i gony; alamdog te bedo ŋat a cik ogeŋo naka otyeno.

⁸Ŋat owaŋo roa daŋ bino lwoko boŋŋi mere i pii karacel kede kome, te daŋ bedo ŋat a cik ogeno naka otyeno.

⁹Ŋattoro olony, a cikkoro mom ogeŋo, en ame bino jobo buru roa-nono, eka te onyo oko i ŋe gony i kabedo moro acil; obino gwoko pi lwak jo Icrael, me yiko pi me lwoko kwer, pi lwoko bal.

¹⁰Ŋat ojobo buru daŋ bino lwoko boŋŋi mere te bedo ŋat a cik ogeŋo naka otyeno. Man doŋ cik i ame jo Icrael kede orok ame bedo i akinagi bino lubo nakanaka.

¹¹“Ŋat ame ogudo kom dano moro oto bino bedo ŋat a cik ogeŋo nino abiro.

¹²Bino lonyere kene kede piinono i nino me adekkere kede i nino me kany wie aryo mere, eka te bedo doŋ ŋat olony. Cite ka en mom olonyere kene i nino me adekkere kede i nino me kany wie aryo mere, en mom bino doko ŋat olony.

¹³Dano moro keken ame ogudo kom dano oto, kom ŋattoro keken ame oto, eka mom te lonyere kenekene, dano-nono balo kema a Rwot, dok dano-nono waŋe bino rwenyo oko i akina jo Icrael. En bino bedo ŋat a cik ogeŋo, pien pii me lwoko kwer mom oonyo i kome; cik ame ogene nwoŋo pwod omake.

¹⁴“Man cik ame mako dano ame oto i kema: ŋat acel acel ame donyo i kema-nono, kede ŋat acel acel ame onwoŋo tye i kema-nono, bino bedo ŋat a cik ogeŋo pi nino abiro.

¹⁵Dok tabo onyo kodi ginnoro ducu ame wie onwoŋo twolo, ame ginnoro owumo i wie mom tye, bino bedo gin a cik ogeŋo.

¹⁶Ka ce dano moro ame onwoŋo tye i dye tim ogudo kom dano ame oneko i pala lweny onyo dano moro ame oto, onyo cogo dano, onyo lyel a dano moro, dano-nono bino bedo ŋat a cik ogeŋo nino abiro.

¹⁷Pi lonyo gin a cik ogeŋo, obino juko buru ame owaŋo i mot me bal, ote keto i tabo kun omedo iye pii ame mol.

¹⁸Dano moro ame olony ame cikkoro mom ogeŋo bino kwanyo jaŋ ogudo, te luto i pii, te kikiro i kom kema-nono, kede i kom jami luŋ ame tye iye, kede i kom jo luŋ ame onwoŋo tye kannono, kede i kom ŋat ame ogudo cogo-nono, onyo kom ŋat ame oneko onyo kom ŋat oto, i kom lyellaca.

¹⁹Ŋat olony, ame cikkoro mom ogeno bino dok kiro pii i kem dano a cik ogeŋo i nino me adekkere kede i nino me kany wie aryo mere; en bino lonyo dano ame cik ogeŋo kittono i nino me kany wie aryo, dok dano-nono bino lwoko boŋŋi mere, te lwoko daŋ kome kede pii, otyeno en doŋ te doko ŋat olony.

²⁰“Ento dano moro ame onwoŋo cik ogeŋo, eka mom te lonyere kenekene, dano-nono waŋe bino rwenyo oko i dye lwak ocokere, pien nwoŋo obalo kabedo a Rwot acil; en nwoŋo, ŋat a cik ogeŋo, pien pii me lwoko kwer mom oonyo i kome.

²¹Mannono bino bedo cik ame gin bino lubo nakanaka. Ŋat ame okiro pii me lwoko kwer bino lwoko boŋŋi mere; kede ŋat ame ogudo pii me lwoko kwer bino bedo ŋat a cik ogeŋo naka otyeno.

²²Ginnoro ducu ame dano ame cik ogeŋo-nono ogudo, bino bedo gin a cik ogeŋo i ŋat ame ogudo daŋ bino bedo ŋat a cik ogeŋo naka otyeno.”