Read lango Wel 2 Bible Online

Wel 2 - lango bible

Wel 2

¹Rwot okobbi Muca kede Aron ni,

²“Jo Icrael bino guro kemagi, ŋat acel acel bino guro i te bendera atekeregi, kun gin tye kede anennoro me doggola a kwarigi. Gin bino guro mano kema me rwatte amano kun nyim kemagi tikere i kema me rwatte.

³Jo ame bino guro kemagi tuŋ kide, tuŋ ame ceŋ donnyo iye, bino bedo jo ame tye i te bendera a Juda kun oguro eryoŋet eryoŋet; atel a jo Nacon obedo wot Aminadab,

⁴ame jo mere okwa no oromo tutumia pyerabiro wie aŋwen kede mia abicel nono.

⁵Jo ame bino guro kemagi aceggi jo Icakar kede jo Jabulon bino bedo jo me atekere Icakar; atel obedo Natanel wot a Juar,

⁶ame jo mere okwano oromo tutumia pyerabicel wie aŋwen kede mia aŋwen nono.

⁷Eka dok atekere a Jabulon; atelgi obedo Eliab wot a Kelon,

⁸ame jo mere okwano oromo tutumia pyerabic wie abiro kede mia aŋwen nono.

⁹Wel jo luŋ onwoŋo tye i gony a Juda, kun lubere eryoŋetgi, oromo tutumia mia acel kede pyeraboro wie abicel kede mia aŋwen nono. Ka wot ocakere, jonnono bino telo yo.

¹⁰“Jo a Reuben en ame bino bedo i te benderagi tuŋ anyarolum, kun oguro eryoŋet eryoŋet; atel a jo Reuben obedo Elijur wot a Cedeur,

¹¹ame jo mere okwano oromo tutumia pyeraŋwen wie abicel kede mia abic nono.

¹²Jo ame bino guro kemagi aceggi kedgi bino bedo jo me atekere a Cimeon; atel a jo Cimeon obedo Celumiel wot a Juricadia,

¹³ame jo mere okwano oromo tutumia pyerabic wie aboŋwen kede mia adek nono.

¹⁴Eka dok atekere a Gad; atel a jo Gad obedo Eliacap wot a Reuel,

¹⁵ame jo mere okwano oromo tutumia pyeraŋwen wie abic kede mia abicel i pyerabic nono.

¹⁶Wel jo luŋ onwoŋo tye i gony a Reuben, kun lubere eryoŋetgi, oromo tutumia mia acel kede pyerabic wie acel kede mia aŋwen i pyerabic nono. Ka wot ocakere, jonnono en ame bino ciro aryo i wot.

¹⁷“Eka kema me rwatte te doŋ cako wot karacel i jo me gony a jo Levi ame onwoŋo tye i dyere; kite ame onwoŋo rik gin oguro kede gonygi, en ame daŋ obino wot kede, kun ŋat acel acel bedo i kabedo mere ikome, ame daŋ olubere i bendera i bendera.

¹⁸Jo Epraim en ame bino bedo i te benderagi tuŋ to kun oguro eryoŋet eryoŋet; atel a jo Epraim obedo Elimaca wot Amikud,

¹⁹ame jo mere okwano oromo tutumia pyeraŋwen nono kede mia abic nono.

²⁰Jo ame bino bino guro kemagi aceggi kedgi bino bedo jo me atekere a Manace; atel a Manace obedo Gamaliel wot a Pedajur,

²¹ame jo mere okwano oromo tutumia pyeradek wie aryo kede mia aryo nono.

²²Eka dok atekere a Benjamin; atel a jo Benjamin obedo Abidan wot a Gideoni,

²³ame jo mere okwano oromo tutumia pyeradek wie abic kede mia aŋwen.

²⁴Wel jo luŋ onwoŋo tye i gony Epraim, kun lubere eryoŋetgi, oromo tututmia mia acel kede aboro kede mia acel nono. Gin bino ciro me adek i wot.

²⁵“Eka jo a Dan te bedo i te benderagi tuŋ anyarodi kun oguro eryoŋet eryoŋet; atelgi obedo Akiejer wot Amacadai,

²⁶ame jo mere okwano oromo tutumia pyerabicel wie aryo kede mia abiro nono.

²⁷Jo ame bino guro kemagi aceggi kedgi bino bedo jo me atekere Acer; atel a jo Acer obedo Pagiel wot Okaran,

²⁸ame okwano jo mere oromo tutumia pyeraŋwen wie acel kede mia abic nono.

²⁹Eka dok atekere a Naputali; atel a jo Naputali obedo Akira wot Enan,

³⁰ame jo mere okwano oromo tutumia pyerabic wie adek kede mia aŋwen nono.

³¹Wel jo luŋ onwoŋo tye i gony a jo a Dan, kun lubere eryoŋetgi, oromo tutumia mia acel kede pyerabic wie abiro kede mia abicel nono. Gin bino ciro icen kun olubere i bendera i bendera.

³²“Magi gin jo Icrael, kite ame okwanogi kede kun lubere i doggola a kwarigi; jo luŋ onwoŋo tye i gony ame okwano eryoŋet eryoŋet rik oromo tutumia mia abicel kede adek kede mia abic i pyerabic nono.

³³Ento jo a Levi rik mom okwano i kom jo Icrael, kite a rik Rwot ociko kede Muca.

³⁴“Jo Icrael rik daŋ otimo kittono. Kit a Rwot rik ociko kede Muca luŋ, gin oguro daŋ kemagi kittono kun oguro i te benderagi; gin luŋ daŋ ote cako wot kun ociro kittono ŋat acel acel kede doggola mere, kite a doggola a kwarigi tye kede.”