Read lango Wel 20 Bible Online

Wel 20 - lango bible

Wel 20

¹Jo Icrael, lwakgi luŋ rik otuno i tim me Jin i dwe me agege, ote koŋ wot bedo i Kadec. Miriam rik te to kuno, ote daŋ yiko kuno.

²Pii ame myero jo mat te bedo pe; lwak luŋ te cokere karacel i kom Muca kede Aron.

³Jo te pyem i Muca, ote kobbe ni, “Kono rik giwa oto oko i kare ame omegowa to i nyim Rwot!

⁴Piŋo kara ikelo lwak a Rwot itim kan, me wek wan karacel kede limwa oto oko?

⁵Dok piŋo imiowa oya oko i Miciri, ite kelowa i kabedo arac-ci? Kabedo a mom ceko cam, akadi otit, onyo olok, onyo okwer pomegranat; pii moro me amata-gu daŋ mom iye.”

⁶Muca kede Aron te ya oko i nyim jo ame ocokere, ote wot naka i doggola kema me rwatte, ote ryebere piny; eka kwogo a Rwot te nen baŋgi.

⁷Rwot te kobbi Muca ni,

⁸“Kwany abiro ite coko lwak karacel, yin kede ominni Aron, ite kobbi kidi i nyimgi ducu ni mi pii mere mollo oko. Ibino miyo pii i kidi mollo pirgi kittono; ibino miyo lwak kede limgi pii amata kittono.”

⁹Muca te kwanyo abiro oko i kan a tye iye i nyim Rwot, kite ame ocike kede.

¹⁰Muca kede Aron te dok coko lwak karacel i nyim kidi, Muca te kobo baŋgi ni, “Aman kon doŋ iwiny wunu, wun jo ame maro jem ajema-ni. Imito wunu ni omi pii mollo i kidi man pirwu?”

¹¹Muca te tiŋo ciŋe malo, te goyo kidi kede abiro mere tyen aryo twal; pii te wukere oko adwoŋ meicel, lwak karacel kede limgi te mato.

¹²Rwot te kobbi Muca kede Aron ni, “Pien wun mom iye wunu an, mom inyuto wunu i nyim jo Icrael ni an acil, pi mannono, wun mom doŋ ibino wunu tero lwak man i lobo ame amiogi.”

¹³Pii me Meriba ennono, kan ame rik jo Icrael opyem i Rwot iye, en te nyutte kene i akinagi ni ecil.

¹⁴Muca ocwao kwena baŋ abaka me Edom iya i Kadec kun kobbe ni, “Omini Icrael okobo ni mannono, Yin iŋeo can luŋ ame opoto i komwa:

¹⁵kite a rik kwariwa owoto kede i Miciri, eka ote bedo i Miciri pi kare alac, jo Miciri te wunowa atek meicel karacel kede kwariwa.

¹⁶Kare ame rik okok baŋ Rwot, en owinyo kokowa, te cwayo amalaika kwanyowa oko i Miciri; aman doŋ wan otye kan i Kadec, i boma ame doŋ ceggi i waŋ loboni.

¹⁷Myero doŋ itimwa ber obe i loboni. Wan giwa mom obino beo i poto moro, onyo i poto olok, akadi mato pii moro me akoŋ. Wan obino lubo ka yo abaka adittere, mom obino gak tuŋ cem onyo tuŋ cam, tuno ka okato giwa waŋ loboni.”

¹⁸Ento Edom te kobbe ni, “Mom gire ibino beo, naka mio abino i komi i pala lweny.”

¹⁹Jo Icrael te kobbe ni, “Wan giwa obino lubo yo adittere; ka ce waŋ kede limwa omato piini moro, obino culo waŋe. Tim ber imi abe ka i tyena keken, aboŋo mito ginnoro ocele.”

²⁰Cite en te kobo ni, “Mom gire ibino beo.” Edom te bino oko i komgi i lwak jo apol, ame daŋ tek meicel.

²¹Edom rik te kwero miyo jo Icrael beo i lobo mere kittono; Icrael doŋ te lunyo beo tuŋ ocele.

²²Lwak jo Icrael luŋ rik te ya oko i Kadec, ote wot ite kidi me Kor.

²³Rwot te kobbi Muca kede Aron i te kidi me Kor, i waŋ lobo me Edom, ni,

²⁴“Aron en ame doŋ bino to oko, te wot nywako kabedo kede kwari mere; pien en mom bino donyo i lobo ame rik amio baŋ jo Icrael, pien wun rik ijem wunu i kom cikka i dog pii me Meriba.

²⁵Ter Aron kede wode Eleajar, ikelgi i wi kidi me Kor.

²⁶Gony boŋŋi Aron luŋ i kome, rwakgi i kom wode Eleajar, pien Aron doŋ awot to oko kuno, awot nywako kabedo i kwari mere.”

²⁷Muca daŋ te timo kite ame Rwot ociko; gin owoto malo i wi kidi me Kor kun lwak luŋ anene.

²⁸Muca te gonyo boŋŋi aruka Aron oko luŋ, te rwako i kom wode Eleajar. Aron te to oko i wi Kidi kuno. Icennere Muca kede Eleajar te yitto oko i wi kidi.

²⁹Kare ame lwak doŋ oneno ni Aron doŋ oto oko, jo ot Icrael luŋ te koko Aron nino pyeradek.