Read lango Wel 21 Bible Online

Wel 21 - lango bible

Wel 21

¹Rik onwoŋo tye abaka moro me Arad, ame dano me Kanaan, ame bedo i Negeb. Kare ame en owinyo ni jo Icrael tye abino kun olubo yo me Atarim, en olwenyo i kom jo Icrael, te mako jo ocele i akinagi.

²Icrael te kwon baŋ Rwot kun kobo ni, “Ka ce ibino miyo jo man i ciŋa, an abino jalo bomagi luŋ bed me ajwera acalo gin me kwer.”

³Rwot rik te winyo Icrael, te miyo jo Kanaan baŋgi, gin te jwero oko luŋ pire acalo gin me kwer. Mannono en omio ote cako nyiŋ kabedo-nono ni Korma.

⁴Gin rik te ya i te kidi me Kor, ote beo i yo me Nam Arema, kun omano lobo me Edom amana; cuny jo rik te bale oko iyo.

⁵Jo rik te kobo kop arac i kom Obaŋa kede i kom Muca, kun okobo ni, “Piŋo kara ikwanyowa wunu oko i Miciri me to i tim? Pien cam pe, pii-gu daŋ pe, cam a konnyere mom-mi doŋ okwero yiwa oko,”

⁶Rwot te cwayo twole mogo a kwirgi rac meicel i akina lwak, gin te totoŋo jo, ame te miyo jo Icrael to adwoŋ meicel.

⁷Jo te bino baŋ Muca kun okobo ni, “Wan obalo, pien okobo kop arac i kom Rwot Obaŋa kede i komi. Kwa Rwot me kwany twole oko i baŋwa.” Muca rik daŋ te kwayo Rwot pi lwak.

⁸Rwot te kobbi Muca ni, “Ti cal twol a kwirrere rac, ite ŋabo malo i kom pagi, me wek ŋat a twol otono, ka ce oneno, bedo kwo.”

⁹Mannono te miyo Muca tiyo twol mola, te ŋabo malo i wi pagi; doŋ ka twol mola-nono otoŋo ŋattoro, ka ce en oŋao wane malo oneno twolmola-nono en bedo kwo.

¹⁰Jo Icrael dok te cako wot, ote wot guro gonygi i Obot.

¹¹Gin dok te ya i Obot, ote wot guro gonygi i. Iyeabarim, i tim ame otikere i Moab, ame tye tutuŋ kide.

¹²Gin te ya i kuno, ote wot guro gonygi i luŋ me Jered.

¹³Gin dok te ya i kuno, ote wot guro gonygi i kulo me Amon tuŋ ca, ame tye i dye tim, ame oya i waŋ lobo me ajo Amor; pien Amon obedo waŋ lobo a jo Moab ame tye i akina Moab kede jo Amor.

¹⁴Man en kan ame okobo iye i Buk me lweny a Rwot, ni, “Wakeb ame tye i Cupa, kede luŋ me Amon ducu,

¹⁵kede lula me luŋ apol ame okato naka i kabedo me Ar, te jeŋere i waŋ loba me Moab.”

¹⁶Gin oya i kuno, ote bino i Beer[3]. Mannono en akoŋ ame Rwot okobo iye baŋ Muca ni, “Cok jo karacel, an abino miyogi pii.”

¹⁷Jo Icrael rik te wero wer man: “Yin akoŋ yeye malo! Owerre wunu wer!

¹⁸Akoŋ ame oloc yam okunyo, ame jo adoŋo i lwak en oŋolo, kede abiro loc kede ludigi.” Gin dok te ya i tim, ote wot Matana.

¹⁹Eka i Matana ote wot Nakaliel, eka i Nakaliel ote wot Bamot.

²⁰Eka i Bamot gin te wot i luŋ ame tye i loba me Moab, ame ceggi atenni kidi me Piciga, kan ame otwero bolo waŋgi ote neno tim ame tye piny.

²¹Icrael te cwayo okwena baŋ Cikon, abaka ajo Amor, kun kobo ni,

²²“Myero itimwa ber obe i loboni. Wan giwa mom obino beo i poto moro, onyo i poto olok, mom daŋ obino mato pii moro me akoŋ. Waŋ obino lubo ka yo abaka adittere, tuno ka okato giwa waŋ loboni.”

²³Ento Cikon mom te ye ni Icrael be i lobo mere. En te coko jo mere luŋ karacel, te wot lweny i kom Icrael i tim. Obino i Jakaj, te lweny i kom Icrael.

²⁴Icrael te nekogi i pala lweny, te mayo lobogi oko, cakere i Amon tuno naka i kulo Jabok, tuno naka i waŋ lobo a jo Ammon pien onwoŋo loba me Jajer en obedo waŋ lobo a jo Ammon,

²⁵Icrael te mayo boma-nono luŋ, ote bedo i boma a jo Amor luŋ, i Kecbon kede pacci ame tye i ŋete ducu.

²⁶Pien Kecbon onwoŋo obedo boma adwoŋ me Cikon, abaka a jo Amor, ame rik koŋ onwoŋo olwenyo i kom abaka a jo Moab occonnere eka te mayo loba mere luŋ i ciŋe, tuno naka i Amon.

²⁷En omio odiro me cako wer te wer ni, “Biye wunu i Kecbon, me ger boma abaka Cikon, me yik cuni okon.

²⁸Pien mac opello i tuŋ Kecbon, leb mac oya i boma a Cikon. Owaŋo Ar ame tye i Moab, oweo rwode me wi kidi me Amon oko,

²⁹Ineno can meicel, yin Moab! Ito, itum wunu oko, wun jo a Kemoc! En omio awobe mere oriŋo olaro komgi, anyira mere ote yako oko, ote tero baŋ Cikon, abaka a jo Amor.

³⁰Ikwaegi oneko otyeko kittono, cakere i Kecbon naka i Dibon, Obalo lobo-nono oko, tuno ka mac omedde naka i Medeba.”

³¹Jo Icrael rik obedo i lobo a jo Amor kittono.

³²Muca dok te cwayo dano roto Jajer. Gin rik te mayo pacci iye oko, ote ryemo jo Amor oko iye.

³³Gin dok te lokere dok malo i yo a woto Bacan; eka Og, abaka me Bacan, te bino lweny i komgi, en karacel kede lwakkere luŋ, ote lweny i Edrei.

³⁴Cite Rwot te kobo baŋ Muca ni, “Kur ilwore, pien atyeko doŋ miye oko i ciŋi, karacel kede lwakkere luŋ, kede loba mere. Ibino time kite a rik itimo kede Cikon, abaka a jo Amor, ame rik bedo i Kecbon.”

³⁵Rik ote neke kittono, karacel kede awobe mere, kede lwakkere tuno waŋ ame ŋattoro acel iye mom odoŋ baŋe akwo ame obwot; gin te mayo loba mere bedo megi.