Read lango Wel 22 Bible Online

Wel 22 - lango bible

Wel 22

¹Jo Icrael dok te cako wot, ote wot guro gonygi i bar me Moab, ame tye loka Jordan i Jeriko.

²Balak wot a Jippor oneno ginnoro luŋ ame jo Icrael otimo i kom jo Amor.

³Jo Moab te bedo i twon lworo adwoŋ meicel i komgi; pien gin rikopol. Lworo jo Icrael onwoŋo doŋ onyobo kom jo Moab oko.

⁴Jo Moab te kobbi odoŋe me Midian ni, “Lwak man abino cido ginnoro luŋ ame omanowa, kite ame twon cido kede lum i bar.” Mannono omio Balak wot a Jippor, ame rik onwoŋo obedo abaka me Moab i kare Balak nono,

⁵ocwao kwena baŋ Balaam wot a Peor i Petor, ame ceggi i kulo me Eufrate, i lobo me Amau, me wot lwoŋe, kun kobo ni, “Nen ba, rokkoro obino i Miciri, owumo lobo oko, aman gin obedo otikere keda.

⁶Tim ber ibin icen jo man oko pira, pien gin otek okata oko. Gwok onyo bino miyo aloogi, ate ryemogi oko i lobo-ni pien an aŋeo ni ŋat ame yin ilamme winyo, bedo daŋ awinyo, dok ŋat ame iceno nwoŋo daŋ doŋ oceno.”

⁷Odoŋe me Moab karacel kede odoŋe me Midian te cako wotgi kittono kun daŋ otero lim me tyet. Gin owoto baŋ Balaam, ote titte kop ame Balak ocwaogi pire,

⁸En te kobbigi ni, “Aco doŋ tin koŋ ibut wunu kan, an abino dwoggiwu kop kite ame Rwot okobo kede baŋa.” Oloc me Moab daŋ te bedo baŋ Balaam kittono.

⁹Obaŋa te bino baŋ Balaam, te penye ni, “lo mene kara a tye baŋi nie?”

¹⁰Balaam te kobbi Obaŋa ni, Balak wot a Jippor, ame obedo abaka me Moab, en ame ocwao kop baŋa kun kobo ni,

¹¹“Nen ba, rokkoro obino i Miciri, owumo lobo oko. Tim ber ibin icen jo-nono oko pira. Gwok onyo bino miyo alwenyo kedgi, ate ryemogi oko.”

¹²Obaŋa te kobbi Balaam ni, “Yin gire mom ibino wot kedgi, mom daŋ ibino ceno jo-nono, pien gin obedo jo ame doŋ amio winyo oko.”

¹³Balaam rik te ya oko odiko con, te kobbi oloc a Balak ni, “Dok wunu i lobowu; pien Rwot mom oye ni an awot kedwu.”

¹⁴Mannono te miyo oloc me Moab ya oko wot baŋ Balak, ote kobbe ni, “Balaam gire okwero bino kedwa oko.”

¹⁵Balak dok te medo cwayo rwode ocele apol, dok ame obedo jo me awora kato maca me agege ca oko.

¹⁶Gin owoto baŋ Balaam, ote kobbe ni, “Balak wot a Jippor okobo ni, kur imi ginnoro geŋ i bino baŋa;

¹⁷pien iyi ateni, abino twon kwogo adwoŋ meicel i komi, dok keto daŋ ginnoro luŋ ame ibino kobba, abino tiyo. Bye icenna jo man oko.”

¹⁸Ento Balaam te dok iye kun kobbi jo ame Balak ooro ni, “Kadi bed Balak onwoŋo omia ode ame opoŋ i ryal kede jabu, onwoŋo mom atwero timo ginnoro a mom Rwot Obaŋana ociko, akadi i ginnoro ame titidi onyo i ginnoro ame dwoŋ,

¹⁹Tim wunu ber tin koŋ dok ibut wunu kaŋ, me koŋ dok amed ŋeyo gin ame Rwot bino kobo baŋa.”

²⁰Obaŋa te bino baŋ Balaam dyewor, te kobbe ni, “Ka ce jo man obino me lwoŋi, ya iwot kedgi; ento ibino tiyo ka gin ame an aciko keken.”

²¹Mannono te miyo Balaam dilo odiko, te tweyo gi-bedo mere i ŋe kana, te wot karacel kede rwode me Moab.

²²Cite akemo te mako Obaŋa pi wottere-nono; amalaika a Rwot te cuŋ oko i yo acalo akworrere. En onwoŋo rik tye i wi kana karacel kede omiro mere aryo.

²³Kana rik te neno amalaika a Rwot ocuŋ oko i dye yo, kun omako pala lweny i ciŋe. Kana te wirre weko yo oko, te coro lum. Balaam te goyo kana me dwog iyo.

²⁴Amalaika a Rwot dok te cuŋ i dye yo kan adiŋ i akina poto olok ame ogeŋo oko i cel tuŋŋi kede tuŋŋi.

²⁵Kare ame kana oneno amalaika a Rwot, odiye i kom cel, te miyo cel gwaro tyen Balaam; Balaam dok te medo goye.

²⁶Amalaika a Rwot te dok medde wot anyim, te dok wot cuŋ kakannoro adiŋ, kan ame mom dok tye yo tuŋŋoro me lokere, akadi tuŋ cem onyo tuŋ cam.

²⁷Kare ame kana oneno amalaika a Rwot, obuto oko piny kun Balaam tye i wie; akemo te mako Balaam oko, te goyo kana i lut.

²⁸Rwot te yabo dog kana, kana te kobbi Balaam ni, “Atimi kara ŋo ba omio igoa odoko tyen adek twal-li?”

²⁹Balaam te kobbi kana ni, “Pien ibedo nywara, kono woki onwoŋo at ye i pala i ciŋa, kono aneki kede oko.”

³⁰Kana te kobbi Balaam ni, “An mom a kanani ame ibedo ŋwec kede kare luŋ tuno kede naka tin? Yam koŋ ineno abedo timere kittono baŋi?” En te gamo ni, “Pe gire.”

³¹Rwot doŋ te yabo waŋ Balaam, en te neno amalaika a Rwot kun tye ocuŋ i yo kun omako pala lweny i ciŋe; en te kulo wie, te ryebere piny.

³²Amalaika a Rwot te kobbe ni, “Piŋo kara igoo kanani tyen adek twal? Nen ba, an abino me juki, pien woti-nono mom oyomoro cunya,

³³Tyen adek-ki luŋ kana onwoŋo obedo nena, en omio te wirre weko yo oko. Kono en mom owirre oweko yo oko i nyima, kono nyo doŋ aneki oko, ate lunyo weke en akwo.”

³⁴Balaam te kobbi amalaika a Rwot ni, “An doŋ abalo, pien onwoŋo mom aŋeo ni yin icuŋ i yo me lweny keda. Doŋ ba, ka ce wota ni rac i nyimi, an abino dok gira cen.”

³⁵Amalaika a Rwot ogamo dog Balaam ni, “Wot doŋ i jo-nono; ento ibino kobo kop ame an aciko keken.” Balaam doŋ te medde wot karaceli rwode a Balak.

³⁶Kare ame Balak owinyo ni Balaam obino, en owoto me wot rwatte kede i boma me Moab, i waŋ lobo ame boma ame kulo Amon opoko, i waŋ apokki ikokome.

³⁷Balak te kobbi Balaam ni, “An mom rik koŋ acwao jo me lwoŋi? Ŋo kara a rik ogeŋi bino baŋa? Itamo ni an mom aromo miyi kwogo?”

³⁸Balaam te gamo ni, “En doŋ abino oko baŋi ni! Itamo ni aman an atye i twer me kobo ginnoro? Kop ame Obaŋa oketo i doga, en ame myero akobi.”

³⁹Balaam te wot gin kede Balak, gin te wot naka i Kiriat-kujot.

⁴⁰Balak te ŋolo twoni kede rommi te poko rinogi cwayo baŋ Balaam kede rwode a rik onwoŋo tye baŋe.

⁴¹Orwo mere Balak te tero Balaam naka i Bamot-baal, Balaam te neno jo Icrael mogo ame onwoŋo tye ceggi i kaci-naca.