Read lango Wel 23 Bible Online

Wel 23 - lango bible

Wel 23

¹Balaam te kobbi Balak ni, “Canna keno lam abiro kan, ite daŋ kella twoni abiro kede romi abiro kan.”

²Balak daŋ te timo kite ame Balaam okobe; eka Balak kede Balaam te bedo yalo Obaŋa i twon kede romo i wi keno lam acel acel.

³Balaam te kobbi Balak ni, “Cuŋ i ŋet mot awaŋani, me an koŋ awoti; gwok onyo Rwot twero bino me rwatte keda. Doŋ ginnoro luŋ ame en bino nyutta, an abino titti.” Balaam te wot malo i wi kidi.

⁴Obaŋa daŋ te rwatte i Balaam. Balaam te kobbe ni, “Doŋ atyeko yiko keno me lam abiro doŋ daŋ atyeko waŋo i wi keno lam acel acel mot me twon acel kede nyok romo acel.”

⁵Rwot te keto kop i dog Balaam, eka te kobbe ni, “Aco doŋ dok baŋ Balak, iwot ikobbe kit man,”

⁶Balaam te dok baŋ Balak, en te nwoŋo Balak kede rwode me Moab luŋ tye ocuŋ i ŋet mot awaŋa mere.

⁷Balaam te cako wero koppere, ni, “Balak okela i Aram, abaka me Moab olwoŋa i kiddi ame tye tuŋ kide: ‘Bin icenna Yakobo, bin ilucoro Icrael!’

⁸Atwero ceno ŋat Obaŋa mom oceno niŋo? Alucoro niŋo ka Rwot mom olucoro?

⁹Pien anene kun atye i wi kidi, anene kun atye malo i wi atenni kidi, koŋ inen ba, jo abedo gigi kengi, jo a mom kwanne kengi i akina orok!

¹⁰Ŋa ce a twero kwano apuwa a Yakobo? Onyo a twero kwano acel me aŋwen me Icrael? Weka gira ata kite a dano a kite atira to kede! Wek agikki kwona bed calo mege!”

¹¹Balak te kobbi Balaam ni, “Ŋo kara ame yin itimo pira? An ateri me wot ceno okwora yin dok ilunyo lammigi winyo.”

¹²Balaam te gamo ni, “Mom myero agwokere ikobo gin ame Rwot oketo i doga bo?”

¹³Balak dok te kobo ni, “Koŋ dok ibin ateri i kabedo ocele, kan ame iromo nenogi. Mom ibino nenogi luŋ, ibino neno ka jo ame tye ceggi keken; eka ite cennagi oko i kuno.”

¹⁴En rik te tere i poto me Jopim, naka i wi kidi me Piciga, eka ote cano keno lam abiro kuno, ote daŋ ŋolo mot me twon acel kede nyok romo acel i wi keno lam acel acel.

¹⁵Balaam te kobo baŋ Balak ni, “Cuŋ i ŋet mot awaŋa-ni kan, me an koŋ arwatte i Rwot kuca,”

¹⁶Rwot daŋ rik te rwatte i Balaam, te keto kop i doge, eka te kobbe ni, “Dok doŋ baŋ Balak, iwot ikobbe kit man.”

¹⁷Balaam te dok baŋ Balak, te nwoŋo Balak ocuŋ i ŋet mot awaŋa mere, kun daŋ rwode me Moab tye karacel kede. Balak te penyo Balaam ni, “Rwot okobo kop aŋo.”

¹⁸Balaam te cako kobo koppere ni, “Balak, ya malo me iwiny, winy koppa, yin wot a Jippor;

¹⁹Obaŋa gire mom obedo dano, me kobo kop goba, en mom obedo wot a dano, ame twero loko tammere. Gin a en dok okobo, itamo mom bino cobo? Onyo kite a en doŋ okobo, itamo ni mom bino cobo koppere-nono?

²⁰Nen ba, an onwoŋo ocika me lamo winyo; en doŋ otyeko miyo winyo oko, an mom dok atwero dwoko ceŋ.

²¹Cannoro mom nen i kom Yakobo, akadi ayela moro i kom Icrael. Rwot Obanagi tye gire kedgi, gin oredo me pwoye acalo abakagi.

²²Obaŋa okwanyogi i Miciri, en tye i akinagi acalo tuŋ jobi ager.

²³Pien mom tye cannoro ame omio i kom Yakobo Ŋattoro daŋ mom tye ame twero logoro Icrael. Aman doŋ abino kobo kop i kom Yakobo kede Icrael ni, ‘Man twon ŋo ame Obaŋa otimo nie?’

²⁴Koŋ inen jo-nono! Oya malo calo min eŋatu kite acalo eŋatu tirre kede malo; mom buto piny tuno waŋ omwodo lee ame omako, eka te mato remo a gin ame eneko.”

²⁵Balak ociko Balaam ni, “Kur doŋ icengi, kur daŋ ilammigi winyo.”

²⁶Cite Balaam te dok iye ni, “Rik mom akobbi ni. ‘Ginnoro luŋ ame Rwot okobo, an abino tiyo atia’?” Balak dok te kobbi Balaam ni,

²⁷“Koŋ dok ibin ateri kan ocele; gwoko onyo Obaŋa bino ye ni icennagi i kuno,”

²⁸Balak dok te tero Balaam malo i wi atenni kidi me Peor, kan ame itwero neno tim ame tye i tere piny.

²⁹Balaam te kobbi Balak ni, “Canna dok keno lam abiro kan, ite kela twoni abiro kede nyogi romi abiro kan.”

³⁰Balak daŋ te timo kite ame Balaam okobo, eka ote bedo ŋolo mot yalo Obaŋa me twon acel kede nyok acel i wi keno lam acel acel.