Read lango Wel 27 Bible Online

Wel 27 - lango bible

Wel 27

¹I kare-nono anyira a Jelopekad te bino ceggi. Jelopekad obedo wot a Keper, wot a Gilead, wot a Macir, wot a Manace, ame gin oya i doggola a Manace wot a Yucepu. Nyiŋ anyira mere-nono rik: Malka, Noa, Kogla, Mirika kede Tirja.

²Gin ocuŋ i nyim Muca kede i nyim Eleajar alamdog, kede i nyim otel wic, karacel kede i nyim lwak luŋ i doggola kema me rwatte, kun gin okobo ni,

³“Pappawa rik obin oto oko i tim; en gire rik mom tye i akina lwak a Kora, ame rik bin cokere karacel i kom Rwot, ento en oto gire pi bale re kene kun onwoŋo mom onywalo awobi moro.

⁴Piŋo kara omio okwanyo nyiŋ papawa oko i doggola mere, pien en rik mom onywalo awobe bo? Miwa wan daŋ onwoŋ lobo i akina omego a papawa.”

⁵Muca rik te kelo kopgi i nyim Rwot.

⁶Rwot te kobbi Muca ni,

⁷“Kop anyira a Jelopekad tye ateni, ibino miyogi onwoŋo lobo me bedo megi i akina omego a papagi, mano bino miyo lobo ame kono obed me a papagi bedo megi.

⁸Yin ibino kobo baŋ jo Icrael ni, ‘Ka ce ŋattoro oto kun mom tye kede atin awobi, obino miyo lobo ame myero bed mege baŋ nyare.

⁹Ka ce nyare moro daŋ mom, obino miyo lobo mere baŋ omego mere,

¹⁰Ka ce ominnere moro daŋ mom, obino miyo lobo mere baŋ omego a pappere.

¹¹Ka ce omin pappere daŋ mom, obino miyo lobo moro baŋ wattere aceggi meicel me doggolagi, en bino tero lobo-nono bedo mege. Man bino bedo icwil kede cik baŋ jo Icrael kite ame Rwot rik ociko kede Muca.’ ”

¹²Rwot okobo baŋ Yocwa ni, “Wot malo i wi kidi man me Abarim, me iwot inen lobo ame amio baŋ jo Icrael.

¹³Ka doŋ ityeko neno, yin daŋ doŋ ibino to, ite wot nywako kabedo i kwarini kite ame ominni Aron rik daŋ owoto kede,

¹⁴pien opyem keda yin daŋ rik mom iwinyo koppa i tim me Jin i kare ame lwak rik mom inyutta i nyimgi i dog pii ni anacil.” (Man en pii me Meriba me Kadec ame rik tye i tim me Jin.)

¹⁵Muca te kobbi Rwot ni,

¹⁶“Myero Obaŋa ame loo tipo a jo luŋ oket dano moro me loyo lwak,

¹⁷ame bino terogi i lweny dok daŋ bino dwoggogi paco, me wek lwak a Rwot kur bed calo romi ame akwatgi mom.”

¹⁸Rwot te kobbi Muca ni, “Kwany Yocwa wot a Nuni, ame en dano ame tye kede Cuny Obaŋa, me iket ciŋi i kome.

¹⁹Mie ecuŋ i nyim Eleajar alamdog, i nyim lwak luŋ, eka ite miye ticcere i nyimgi.

²⁰Ibino daŋ miye twerri mogo, me wek lwak luŋ me Icrael bed i winy baŋe.

²¹En bino cuŋ i nyim Eleajar alamdog te penyo pire i nyim Rwot gin ame Urim oŋolo; jo bino wot oko kun olubo gin gin a en ociko, dok daŋ jo bino dwogo kun olubo gin a en ociko, en karacel kede jo Icrael luŋ, lwak luŋ me Icrael.”

²²Muca daŋ te tiyo kite ame Rwot ociko. En otero Yocwa, te miye cuŋ i nyim Eleajar alamdog, i nyim lwak luŋ,

²³eka te ke to ciŋe i kome, te miye ticcere kite ame Rwot okobo kede baŋ Muca.