Read lango Wel 28 Bible Online

Wel 28 - lango bible

Wel 28

¹Rwotokobo baŋ Mucani,

²“Cik jo Icrael kun ikobbigi ni, Myero ikella wunu motta i kare ame aciko i kome, ame en cam ame owaŋo awaŋa kede mac, gin a ŋwece kur a yomoro cuny.

³Dok daŋ kobbigi ni, Gin ame ibino wunu waŋo i mac me mot baŋ Rwot ene: nyogi romi aryo me mwaka acel acel, ame roccoro mom i komgi, en ame ibino miyo wunu me mot owaŋo awaŋa kede mac nino ducu.

⁴Nyok romo acel ibino miyo wunu odiko, eka acel ite miyo wunu otyeno.

⁵Ibino miyo daŋ moko kwon apwottere karacel kede romo-nono; moko kwonnono myero bed ame romo gwata acel ame orubo kede moo jeituni ame oodo aoda cupa aryo kede nucu, obed mot me moko kwon.

⁶Man en mot awaŋa me nino ducu ame rik ociko pire i wi kidi me Cinai, me bed gin a ŋwece kur, me mot awaŋa i mac baŋ Rwot;

⁷karacel kede mot amata a romo cupa aryo kede nucu pi nyok romo acel acel; ibino onyo mot amata me vino akeccere i kabedo acil baŋ Rwot.

⁸Nyok romo ocele ibino miyo otyeno, kun imio kite ame imio kede mot moko kwon me odiko karacel kede mot amata; ibino miyo acalo mot ame owaŋo i mac, gin a ŋwece kur a yomoro cuny Rwot.

⁹“I ceŋ cabit obino miyo nyogi romi aryo ame mwaka me ditogi oromo acel acel, ame roccoro mom i komgi, kede moko kwon apwottere ame romo gwata aryo, ame orubo kede moo jeituni, mot me moko kwon karacel kede mot amata mere.

¹⁰Man en mot awaŋa me ceŋ cabit acel acel, medo i kom mot awaŋa me nino ducu karacel kede mot amata ame ociko.

¹¹“Iyi acakki dwewu, ibino miyo wunu mot awaŋa baŋ Rwot ibino miyo wunu itino twoni aryo, nyok romo acel kede itino nyogi romi abiro ame mwaka me ditogi oromo acel acel, ame roccoro mom i komgi;

¹²karacel kede moko kwon apwottere ame orubo kede moo jeituni ame romo gwata adek pi mot me moko kwon pi twon acel acel; moko kwon apwottere ame orubo kede moo jeituni ame romo gwata aryo pi mot moko kwon pi nyok romo acel acel;

¹³kede dok moko kwon apwottere ame orubo kede moo jeituni ame romo gwata acel pi mot me moko kwon pi atin nyok romo acel acel; bino bedo mot awaŋa a ŋwece kur a yomoro cuny, mot ame owaŋo i mac baŋ Rwot.

¹⁴Mot amata ame ociko bino bedo vino ame romo cupa abic pi twon, cupa adek pi nyok romo, kede cupa aryo kede nucu pi atin romo. Man en mot awaŋa pi dwe acel acel, naka tyeko dwete luŋ ame tye i mwaka.

¹⁵Ibino daŋ miyo nyok dyel acel me mot me bal baŋ Rwot; ibino miyo mannono karacel kede mot awaŋa me nino ducu kede mot amata mere.”

¹⁶I dwe me agege, i nino dwe apar wie aŋwen, mano en Kato a Rwot.

¹⁷I nino dwe apar wie abic me dwe me acellono, en nino a Rwot, me ceuban me Ogati a Tobi Mom iye, ibino camo wunu ogati a tobi mom iye pi nino abiro.

¹⁸I nino me agege mere, myero ibed wunu kede cokere acil; mom ibino wunu tiyo ticcoro ame tek.

¹⁹Ento myero iyal wunu Obaŋa i mot ame owaŋo i mac, mot ame owaŋo baŋ Rwot; ibino miyo wunu itino twoni aryo, nyok romo acel, kede itino nyogi romi abiro ame mwaka me ditogi romo acel acel; myero inen wunu ni roccoro mom i komgi.

²⁰Mot yalo Obaŋa me moko kwon apwottere ame orubo kede moo jeituni, ame tye pirgi ene: myero mi gwata adek pi twon acel acel gwata aryo pi nyok romo;

²¹dok daŋ mi gwata acel pi atin romo acel acel.

²²Ibino daŋ miyo wunu nyok dyel acel me mot me bal, me kwanyo bal i komwu.

²³Ibino miyo wunu karacel kede mot awaŋa me odiko, ame obedo mot awaŋa me nino ducu.

²⁴Ibino miyo wunu cam ame owaŋo i mac kittono pi nino abiro, gin a ŋwece kur a yomoro cuny Rwot; ibino miyo wunu karacel i mot awaŋa me nino ducu kede mot amata ame ociko.

²⁵I nino me abiro mere, myero ibed wunu kede cokere acil; kur iti wunu iye ticcoro atek.

²⁶I nino me miyo camwu me wi mwaka ogeo cek, ame ikelo wunu iye motwu baŋ Rwot, mot me moko kwon kal anyen, iyi ecubanwu me cabit abiro, ibino bedo wunu kede cokere acil; kur iti wunu iye ticcoro atek,

²⁷ento myero imi wunu mot awaŋa, gin a ŋwece kur a yomoro cuny Rwot. Ibino miyo wunu itino twoni aryo, nyok romo acel kede itino nyogi romi abiro ame mwaka me ditogi oromo acel acel,

²⁸karacel kede moko kwon apwottere, ame orubo kede moo jeituni ame romo gwata adek pi twon acel acel, gwata aryo pi nyok romo,

²⁹kede gwata acel pi atin nyok romo acel acel;

³⁰Okaracel kede nyok dyel acel me mot me bal, me tiyo tic me kwanyo bal i komwu,

³¹Ibino miyogi wunu karacel i mot amata ame ociko, kun imedo wunu i kom mot awaŋa me nino ducu kede mot me moko kwoŋŋere. Myero inen wunu ni roccoro mom i komgi.