Read lango Wel 29 Bible Online

Wel 29 - lango bible

Wel 29

¹I dwe me kany wie aryo, nino dwe acel, ibino bedo wunu kede cokere acil; mom ibino tiyo wunu ticcoro atek. Ibino miyo wunu apel kok i nino-nono,

²dok daŋ ibino miyo wunu mot owaŋo awaŋa, gin a ŋwece kur a yomoro cuny Rwot. Ibino miyo wunu atin twon acel kede nyok romo acel kede itino nyogi romi abiro ame mwaka me ditogi oromo acel acel, ame roccoro mom i komgi;

³kun imio karacel kede moko kwon a pwottere ame orubo kede moo jeituni ame romo gwata adek pi twon, gwata aryo pi nyok romo,

⁴kede gwata acel pi atin nyok romo acel acel,

⁵karacel kede nyok dyel acel me mot me bal, me tiyo tic me kwanyo bal i komwu.

⁶Ibino miyo wunu kun imedo wunu i kom mot ame owaŋo awaŋa me por a dwe kede mot me moko kwon ame ociko, kede mot awaŋa me nino ducu, karacel kede mot amata ame ociko kun ilubo wunu cikgi, obed gin a ŋwece kur a yomoro cuny, mot ame owaŋo i mac baŋ Rwot.

⁷“I dwe me abiro, nino dwe tomon, ibino bedo wunu kede cokere acil; ibino bedo wunu kede kumo kun cunywu cwer; mom ibino tiyo wunu ticcoro iye;

⁸ento ibino miyo wunu mot awaŋa baŋ Rwot, gin a ŋwece kur a yomoro cuny. Ibino miyo wunu twon acel, nyok romo acel, itino nyogi romi abiro ame mwaka me ditogi romo acel acel; myero inen wunu ni roccoro mom i komgi.

⁹Ibino miyogi wunu karacel kede moko kwon apwottere ame orubo kede moo jeituni ame romo gwata adek pi twon, gwata aryo pi nyok romo,

¹⁰kede gwata acel pi atin nyok romo acel acel

¹¹karacel kede nyok dyel acel me mot me bal, ame omedo i kom mot me kwanyo bal kede mot moko kwon kede mot amata ame ociko.

¹²“I nino dwe apar wie abic, me dwe me abiro, ibino wunu bedo kede cokere acil; kur iti wunu iye ticcoro atek. Ibino wunu kwero ecuban a Rwot pi nino abiro,

¹³dok daŋ ibino miyo wunu mot yalo Obaŋa ame owaŋo i mac, gin a ŋwece kur a yomoro cuny Rwot. Ibino miyo wunu itino twoni apar wie adek, nyogi romi aryo, itino nyogi romi apar wie aŋwen ame mwaka me ditogi oromo acel acel, ame roccoro mom i komgi.

¹⁴Ibino miyo wunu karacel i moko kwon apwottere ame orubo kede moo jeituni ame romo gwata adek pi twon acel acel, gwata aryo pi nyok romo acel acel,

¹⁵kede gwata acel pi atin nyok romo acel acel.

¹⁶Ibino miyo daŋ nyok dyel acel me mot me bal, ame omedo i kom mot awaŋa me nino ducu, kede mot me moko kwon, kede mot amata ame ociko.

¹⁷“I nino me aryo mere obino miyo itino twoni apar wie aryo, nyogi romi aryo, itino nyogi romi apar wie aŋwen ame mwaka me ditogo oromo acel acel, ame roccoro mom i komgi,

¹⁸Ibino miyo wunu karacel kede mot moko kwon, kede mot amata pi twoni, pi nyogi romi, kede pi itino nyogi romi, kun lubo welgi kede kite a cik tye kede.

¹⁹Ibino miyo daŋ nyok dyel acel me mot me bal ame omedo i kom mot awaŋa me nino ducu, kede mot me moko kwon, kede mot amata mere ame ociko.

²⁰“I nino me adekkere obino miyo itino twoni apar wie acel, nyogi romi aryo, kede itino nyogi romi apar wie aŋwen ame mwaka me ditogi oromo acel acel, ame roccoro mom i komgi.

²¹Ibino miyo wunu karacel kede mot me moko kwon, kede mot amata pi twoni, pi nyogi romi kede pi itino nyogi romi, kun lubo welgi kede kite a cik tye kede.

²²Ibino miyo daŋ nyok dyel acel me bal ame omio karacel kede mot awaŋa me nino ducu, kede mot me moko kwon kede mot amata ame ociko.

²³“I nino me aŋwennere obino miyo itino twoni tomon, nyogi romi aryo kede itino nyogi romi apar wie aŋwen ame mwaka me ditogi oromo acel acel, ame roccoro mom i komgi.

²⁴Ibino miyo wunu karacel kede mot me moko kwon, kede mot amata pi twoni, pi nyogi romi kede pi itino nyogi romi, kun lubo welgi kede kite a cik tye kede,

²⁵Ibino miyo daŋ nyok dyel acel me mot me bal ame omedo i kom mot awaŋa me nino ducu, kede mot moko kwon kede mot amata ame ociko.

²⁶“I nino me kannyere, obino miyo itino twoni aboŋwen, nyogi romi aryo kede itino nyogi romi apar wie aŋwen ame mwaka me ditogi oromo acel acel, ame roccoro mom i komgi.

²⁷Ibino miyo wunu karacel kede mot me moko kwon, kede mot amata pi twoni, pi nyogi romi kede pi itino nyogi romi, kun lubo welgi kede kite a cik tye kede.

²⁸Ibino miyo wunu daŋ nyok dyel acel me mot me bal ame omio karacel kede mot awaŋa me nino ducu, kede mot moko kwon kede mot amata ame ociko.

²⁹“I nino me kanyape mere obino miyo twoni kany wie adek nyogi romi aryo, kede itino nyogi romi apar wie aŋwen ame mwaka me ditogi oromo acel acel, ame roccoro mom i komgi.

³⁰Ibino miyo wunu karacel kede mot me moko kwon, kede mot amata pi twoni, pi nyogi rommi kede pi itino nyogi romi, kun lubo welgi kede kite a cik tye kede.

³¹Ibino miyo wun daŋ nyok dyel acel me mot me bal ame omio karacel kede mot awaŋa me nino ducu, kede mot moko kwon kede mot amata ame ociko.

³²“I nino me kany wie aryo obino miyo itino twoni abiro, nyogi romi aryo, kede itino romi apar wie aŋwen ame mwaka me ditogi oromo acel acel, ame roccoro mom i komgi.

³³Ibino miyo wunu karacel kede mot moko kwon, kede mot amata pi twoni, pi nyogi romi kede pi itino nyogi romi kun lubo welgi kede kite a cik tye kede.

³⁴Ibino miyo wunu daŋ nyok dyel acel me mot me bal ame omedo i kom mot awaŋa me nino ducu, kede mot moko kwon kede mot amata ame ociko.

³⁵“I nino me kany wie adek mere ibino bedo wunu kede cokere acil; kur iti wunu iye ticcoro atek.

³⁶Ento myero imi wunu iye mot yalo Obaŋa ame owaŋo i mac, gin a ŋwece kur a yomoro cuny Rwot. Ibino miyo wunu twon acel, nyok romo acel kede itino romi abiro ame mwaka me ditogi oromo acel acel, ame roccoro mom i komgi.

³⁷Ibino miyo wunu karacel kede mot me moko kwon kede mot amata pi twon, pi nyok romo kede pi itino nyogi romi acel acel kun lubo welgi kede kite a cik tye kede.

³⁸Ibino miyo wunu daŋ nyok dyel acel me mot me bal, ame omedo i kom mot awaŋa me nino ducu, kede mot me moko kwon kede mot amata ame ociko.

³⁹“Ibino miyo wunu mot magi baŋ Rwot i kare me ecubanwu ame ociko, kun imedo wunu iye motwu me cobo kwoŋ, kede motwu ocele luŋ me ber a yic, motwu me awaŋa, kede motwu me me moko kwon, kede dok motwu me amata kede motwu me kweyo cuny.”

⁴⁰Muca te titti lwak jo Icrael ginnoro luŋ, kite a rik Rwot ociko kede Muca.