Read lango Wel 30 Bible Online

Wel 30 - lango bible

Wel 30

¹Muca okobo baŋ otel a loo itekere a jo Icrael ni, “Gin ame Rwot ociko ene:

²Ka ce lo moro okwoŋo baŋ Rwot onyo okwoŋo kwoŋŋoro ame mio cikere twee oko, en mom bino turo gin ame ekwoŋonono; myero en cob luŋ kun lubo kop ame oya i doge.

³Onyo ka dannoro okwoŋo baŋ Rwot, ame mio cikere twee oko, kun nwoŋo en pwod tye i ot a pappere, i kare mere me nyako,

⁴eka pappere te winyo pi kwoŋŋere-nono kede pi cikere ame en otweye kede, eka mom gire te kobbe ginnoro; kwoŋŋere luŋ bino moko kite ame en okwoŋo kede dok cikere ame twee bino daŋ bedo kite ame en ociko.

⁵Ento ka pappere okobe ni mom emoko kwoŋŋere-nono i nino ame en owinyo iye, kwoŋŋere-nono mom bino moko, gin a en ociko ame twee daŋ mom bino moko; Rwot daŋ bino weke, pien pappere mom oye.

⁶Dok ka nyannoro onyomere oko kun kwoŋŋere pwod tye i kome onyo okobo kopporo a mom koŋ otamo tere i kom gin ame en otweye kede kene,

⁷eka cware te winyo, mom te kobo iye ginnoro i nino ame cwinyo iye-nono; kwoŋŋere-nono bino moko kite ame en okwoŋo kede.

⁸Aco ka cware okobo kopporo ame nyuto ni en mom emoko ame en owinyo iye pire, cware bino miyo kwoŋŋere-nono mom moko i kome, kede kop ame onwoŋo en okwoŋo aboŋo tamo tere, ame otweye kede kene. Rwot daŋ bino weke.

⁹Ento ka dako moro a cware oto, onyo dako ame cware oryemo oko okwoŋo, ginnoro luŋ ame en otweye kede kene bino moko i kome atwal.

¹⁰Ka ce en okwoŋo kun pwod tye i ot a cware onyo okwoŋo kwoŋŋoro ame mio cikere twee,

¹¹ka cware owinyo mom te kobbe ginnoro iye, kun daŋ mom okwero, kwoŋŋere-nono bino moko i kome kite ame en okwoŋo kede, dok cikere luŋ ame en otweye kede kene bino moko kite ame en ociko.

¹²Aco ka cware okwero oko i nino ame en owinyo iye pire, kopporo luŋ ame onwoŋo odonnyo i doge ame mako kwoŋ onyo gin ame en ociko, mom bino moko i kome, pien cware nwoŋo ogeŋo oko; Rwot daŋ bino weke.

¹³Kit kwoŋŋoro luŋ ame en okwoŋo kede kite cikkoro luŋ ame en otweye kede kene, cware twero moko, dok daŋ cware twero kwero.

¹⁴Ento ka cware mom okobo kopporo iye, kun obedo liŋ aliŋa cakere i nino-nono, en doŋ moko kwoŋ a dako mere luŋ ame nwoŋo tye i kome, pien mom okobo kopporo iye i nino ame owinyo iye pire.

¹⁵Aco ka cware okwero oko kun kare ame en owinyo koppere iye doŋ okato oko, bal a dako mere bino dok i wie.”

¹⁶Magi en icwil ame Rwot ociko kede Muca ame mako ico kede dako mere, papa a nyako kede nyare i kare ame en pwod tidi, ame nwoŋo pwod tye i ot a pappere.