Read lango Wel 31 Bible Online

Wel 31 - lango bible

Wel 31

²“Cul kwor ajo Icrael i komjo Midian; eka ite doŋ to, wot nywako kabedo i kwarini.”

³Muca te kobbi lwak ni, “Mi wunu jo me mony ame tye akinawu rukere i jami lwenygi, me gin wot lweny i kom jo Midian, me cul kwor a Rwot i kom jo Midian.

⁴Cwal wunu jo tutumia acel acel i kom atekere acel acel me Icrael, me gin wot i lweny.”

⁵Mannono omio i kom lwak tutumia i tutumia me Icrael, oya iye jo tutumia apar wie aryo ame orukere i jami lweny, kun iyi atekere acel acel ya iye tutumia acel acel.

⁶Muca rik te cwayogi i lweny, jo tutumia acel acel ame oya i atekere acel acel, kun owoto karacel kede Finekaci wot Eleajar alamdog, ame otero jami me kabedo acil, kun daŋ omako apel me kwenyoro jo i ciŋe.

⁷Gin rik te lweny i kom jo Midian kite ame Rwot ociko kede Muca, ote neko co luŋ iye.

⁸Oneko obakki me Midian karacel kede jo ocele; obakki abic me Midian ame onekogi, gin ene: Evi, Rekem, Jur, Kur kede Rebe, Oneko daŋ Balaam wot a Boer oko i pala lweny,

⁹Jo Icrael te yako mon a jo Midian karacel kede itinogi, ote daŋ mayo limgi akwo luŋ, karacel kede jamigi luŋ.

¹⁰Gin te waŋo daŋ bomagi luŋ i kan a gin bedo iye, karacel kede gonyegi.

¹¹Gin te tero ginnoro luŋ ame gin oyako karacel kede en ame gin omao, dano karacel kede leyi.

¹²Gin rik te tero jo ame gin oyako kede jami ame gin omao, kede ame gin oyako, ote kelo baŋ Muca kede Eleajar alamdog, kede baŋ lwak jo Icrael, i gonygi ame onwoŋo tye i bar me Moab i Jeriko i ŋet Jordan.

¹³Muca kede Eleajar alamdog, karacel kede otel a lwak luŋ, te wot me wot rwatte kedgi i ŋe gony.

¹⁴Akemo rik te mako Muca i kom otel wi mony, ame loo jo tutumia kede ame loo jo mia, ame onwoŋo odwogo i mony.

¹⁵Muca okobbigi ni, “Iweko wunu mon luŋ akwo?

¹⁶Nen ba, mon magi en ame olubo tam a Balaam, ame te miyo jo Icrael oturo cik a Rwot i kop i kom Peor, ame te miyo too edeke poto i kom lwak a Rwot.

¹⁷Aco doŋ nek wunu itino aco luŋ ame tye i akina itinogi, nek wunu daŋ mon luŋ ame oŋeye ico, ame obuto kedgi.

¹⁸Ento anyira luŋ ame mom ru oŋeye kede co, a mom ru obuto kedgi, wek wunu bed kwo me gin bed megwu.

¹⁹Koŋ ibut wunu oko i ŋe gony pi nino abiro; jo luŋ i akinawu ame oneko dano kede jo luŋ ame ogudo kom jo oto, myero lonnyere kengi kengi i nino me adekkere kede i nino me kany wie aryo mere, karacel kede jo luŋ ame iyako wunu.

²⁰Lony wunu ruk luŋ, ginnoro luŋ ame otio i lao, ginnoro luŋ ame otio i yer dyegi karacel kede ginnoro luŋ ame otio i yat.”

²¹Eleajar alamdog, rik te kobo baŋ lwak a rik onwoŋol owoto i mony ni, “Man en cik ame oketo, ame yam Rwot ociko kede Muca:

²²jami ame obedo jabu, onyo ryal, onyo mola, onyo nyonyo, kede kit nyonyo ocele acalo abati kede ricac keken,

²³ginnoro luŋ ame mac mom obalo, ibino cwayo wunu beo i mac, eka te lony oko. Cite kadi bed amannono, pwod dok ibino medo lonyo wunu i pii me lwoko kwer; doŋ ginnoro luŋ ame mac twero balo oko, ibino cwayo wunu beo i pii.

²⁴Myero ilwok wunu boŋŋiwu i nino me kany wie aryo mere, ite doŋ doko wunu jo olony; i ŋe ennono doŋ itwero dok wunu i gony.”

²⁵Rwot okobo baŋ Muca ni,

²⁶“Kwan doŋ wel jami ame oyako i mony, dano karacel kede leyi, yin karacel kede Eleajar alamdog kede odoŋe atekere me doggola a kwarigi ame tye i akina lwak;

²⁷eka ite poko gin oyako i mony i dul aryo, acel bed me a jo ame owoto i mony, eka tuŋ ocele te bedo me a lwak luŋ,

²⁸Eka ite miyo jo olwenyo kwanyo ocoro a Rwot i kom megi kun okwanyo acel me mia abic i kom dano, twoni, kana, kede romi onyo dyegi;

²⁹kwany i kom nucugi imi baŋ Eleajar alamdog acalo mot ame omio baŋ Rwot:

³⁰Eka ite daŋ miyo jo Icrael kwanyo ocoro a Rwot i kom megi kun okwanyo acel me pyerabic i kom dano, twoni, kana, kede romi onyo dyegi, kede kit lim akwo ocele luŋ; magi-nono mi baŋ jo Levi ame gwoko kane a Rwot.”

³¹Eka Muca kede Eleajar te daŋ timo kite ame Rwot ociko kede Muca.

³²Jami ame jo olwenyo oyako, ame odoŋŋere obedo romi tutumia mia abicel kede pyerabiro wie abic,

³³kede dok tutumia pyerabiro wie aryo,

³⁴kede kane tutumia pyerabicel wie acel,

³⁵kede jo tutumia pyeradek wie aryo, ame gin mon ame mom ru oŋeye kede co.

³⁶Nucu mere ame opoko baŋ jo ame rik owoto i mony obedo romi tutumia mia kede pyeradek wie abiro, kede mia abic nono;

³⁷eka romi ame omio me ocoro a Rwot te romo tutumia abicel kede pyerabiro wie abic.

³⁸Aco dok te romo tutumia pyeradek wie abicel; en ame omio me ocoro a Rwot te romo pyerabiro wie aryo.

³⁹Kane te romo tutumia pyeradek kede mia abic nono, en ame omio me ocoro a Rwot te romo pyerabicel wie acel.

⁴⁰Jo te romo tutumia apar wie abicel; jo ame omio me ocoro a Rwot te romo pyeradek wie aryo.

⁴¹Muca te miyo gin ame omio me ocoro a Rwot baŋ Eleajar alamdog, kite a Rwot ociko kede Muca.

⁴²Nucu mere ame omio jo Icrael, ame Muca opoko i kom nucu ame jo owoto i mony otero;

⁴³nucu a lwak kono rik te bedo daŋ romi tutumia mia adek kede pyeradek wie abiro kede mia abic nono;

⁴⁴eka dok te bedo daŋ tutumia pyeradek wie abicel,

⁴⁵kede kana tutumia pyeradek kede mia abic nono,

⁴⁶kede jo daŋ tutumia apar wie abicel.

⁴⁷Muca rik te miyo jo Icrael kwanyo acel me pyerabic i kom nucu ame opokkigi, i kom dano, kede i kom leyi, te miyogi baŋ jo Levi ame gin onwoŋo gwoko kema a Rwot, kite ame Rwot rik ociko kede Muca.

⁴⁸Eka otel wi mony ame loo jo me lweny tutumia i tutumia, jo ame loo jo tutumia kede jo ame loo jo mia te bino ceggi baŋ Muca.

⁴⁹Ote kobbi Muca ni, “Wan omironi otyeko kwano wel olweny ame tye i te locwa oko, onwoŋo ni mom gire tye ŋattoro i akinawa ame orwenyo.

⁵⁰Wan doŋ okelo mot a Rwot, gin ame dano acel acel onwoŋo, okelo jabu, mola bat, mola ŋut ciŋ, atem, atem me yit, tigo ŋut, me kwanyo bal i komwa i nyim Rwot.”

⁵¹Muca kede Eleajar alamdog te gamo jabu-nono i baŋgi; gin luŋ onwoŋo obedo jami ame otio atia.

⁵²Jabu luŋ ame omio me mot baŋ Rwot ame oya i baŋ otel ame loo jo tutumia kede ame loo jo mia, gin luŋ pekgi oromo cekel tutumia apar wie abicel kede mia abiro i pyerabic nono.

⁵³(Jo olwenyo onwoŋo oyako jami kun ŋat acel acel yako mere kene.)

⁵⁴Muca kede Eleajar alamdog te gamo jabu i baŋ odoŋe ame loo jo tutumia kede i baŋ odoŋe ame loo jo mia, gin te tero i kema me rwatte, me wek bed gin me po i kom jo Icrael i nyim Rwot.