Read lango Wel 32 Bible Online

Wel 32 - lango bible

Wel 32

¹I Jo Reuben kede jo Gad rik onwoŋo tye i lwak lim akwo apipim. Gin rik te neno lobo me Jajer kede lobo me Gilead, lobo mere onwoŋo ber me kwat,

²Omio jo Reuben kede jo Gad te wot baŋ Muca kede baŋ Eleajar alamdog, kede baŋ otel a lwak, eka gin te kobbigi ni,

³“Atarot, Dibon, Jajer Nimra, Kecibon, Eleale, Cebam, Nebo kede Beon,

⁴ame gin lobo ame rik Rwot en omao i nyim lwak jo Icrael, lobe-nono obedo lobo aber me gwoko lim akwo; wan omironi daŋ otye kede lim akwo.”

⁵Gin te dok medde i kopgi ni, “Ka ce berwa onen i nyimi, wek omironi ter lobo man bed megi, kur dok iterwa imiwa oŋol Jordan.”

⁶Ento Muca te kobbi jo Gad kede jo Reuben ni, “Omegowu bino wot lweny kun wun ibedo wunu kan?

⁷Piŋo kara imito wunu balo cuny jo Icrael me wot loka i loba ame rik Rwot omiogi?

⁸Kwarowu rik daŋ koŋ otimo kittono, i kare ame rik ocwaogi i Kadec-barnea me neno lobo.

⁹Pien i kare ame gin owoto naka i luŋ me Ecikol, ote neno lobo, gin obalo cuny jo Icrael me wot i lobo ame Rwot omio baŋgi.

¹⁰I nino-naca akemo te mako Rwot meicel i komgi, te kwoŋ kun kobo ni,

¹¹‘Ateteni, mom tye ŋattoro i akina jo-ni ame yam oya i lobo Miciri, cakere i kom jo ame mwaka me ditogi doŋ oromo pyeraryo dok kede malo, ame bino neno lobo ame rik akwoŋo pire ni abino miyo baŋ Iburaim, kede Icaka kede Yakobo, pien gin mom obedo luba i yore ducu.

¹²Ŋattoro i akinagi mom bino neno, kono ka Kaleb wot a Jepune ame obedo jo Keniji kede Yocwa wot a Nuni, pien gin en obedo lubo Rwot i yore ducu.’

¹³Akemo rik te mako Rwot i kom Icrael, eka te miyogi bedo wiwira i tim pi mwakki pyeraŋwen twal, naka waŋ ame lwagi jo luŋ a nwaŋ otimo bal i nyim Rwot otum oko luŋ.

¹⁴Koŋ dok inen wunu ba, wun daŋ dok icako timere wunu bala kwariwu, wun itino obalo, imito wunu medo akemo a Rwot me bed agwa i kom jo Icrael!

¹⁵Pien ka ce iweko wunu lube oko, en dok bino lwak ata i tim kan; mano dok bino miyo imio wunu jo man to tum oko.”

¹⁶Gin dok ote noke aceggi ote kobbe ni, “Wan obino celo ka-gwoko limwa kede boma me bedo itinowa,

¹⁷cite wan obino ruko jami lwenywa kun oyikere pi telo wi jo Icrael anyim, tuno ka doŋ oterogi i kabedogi, kun itinowa bedo i boma ame ocecelo atek pi okwor ame bedo i lobo-nono.

¹⁸Wan mom obino dwogo ceŋ i pacowa tuno ka doŋ jo Icrael onwoŋo lobogi me bedo megi, kun ŋat acel acel nwoŋo mege.

¹⁹Pien wan giwa mom obino nwoŋo lobo karacel kedgi i loka Jordan kuno, pien wan doŋ otyeko nwoŋo lobowa i ŋe Jordan kan, tuŋ kide.”

²⁰Mannono te miyo Muca kobbigi ni, “Ka ce ibino timo wunu man, ka ce ibino ruko wunu jami lwenywu ite telo wunu nyim Rwot pi lweny,

²¹kun ŋat acel acel i akinawu ame orukere i jami lweny bino kato i ŋe Jordan tuŋ ca, i nyim Rwot, tuno waŋ ame en oryemo okworrere oko i nyime,

²²kun Rwot doŋ oloo lobo-nono oko; i ŋe mannono, wun giwu doŋ ite dwogo wunu bedo, kun mom doŋ itye wunu kede banya moro baŋ Rwot onyo baŋ jo Icrael, lobo man doŋ bino bedo megwu i nyim Rwot.

²³Cite ka mom itimo wunu kittono, nen ba, nwoŋo itimo wunu bal i nyim Rwot; myero iŋe wunu ni balwu bino miyo itiŋo wunu megwu oromowu oko.

²⁴Ger wunu boma itino kede ka-gwoko limwu akwo, ite timo wunu doŋ kite ame ikobo wunu-nono.”

²⁵Jo Gad kede jo Reuben te doŋ ye baŋ Muca ni, “Wan omironi obino timo kite ame yin adwoŋwa iciko,

²⁶Itinowa kede monwa kede romiwa kede limwa akwo luŋ bino doŋ i boma ame tye i Gilead.

²⁷Cite omironi bino kato loka ca, jo luŋ ame orukere me lweny, kun owoto i mony i nyim Rwot, kite ame adwoŋwa ociko kede.”

²⁸Mannono omio Muca omio cik ame makogi baŋ Eleajar alamdog kede baŋ Yocwa wot a Nuni, kede baŋ odoŋe a loo doggola a kwarigi ame tye iyi atekere luŋ me a jo Icrael.

²⁹Muca okobo baŋgi ni, “Ka jo Gad kede jo Reuben, jogi luŋ ame orukere me lweny i nyim Rwot, bino kato kedwu loka Jordan, eka Rwot te miyowu loyo lobo-nono, ibino miyo wunu lobo me Gilead bedo megi.

³⁰Cite ka gin mom bino ruko jami lweny te kato karacel, gin bino nwoŋo lobo megi karacel kedwu i lobo me Kanaan.”

³¹Jo Gad kede jo Reuben te dok iye ni, “Wan obino timo kite ame Rwot okobo baŋ omiro mere-nono.

³²Wan obino kato loka ca, naka i lobo Kanaan, i nyim Rwot kun oruko jami lweny, kun lobo ame wan onwoŋo me bedo megwa doŋ i ciŋwa i ŋe Jordan kan.”

³³Muca te miyo baŋ jo Gad kede baŋ jo Reuben kede baŋ nucu a jo Manace wot a Yucepu, lobo ame Cikon abaka a jo Amor yam loo, kede lobo ame Og, abaka me Bacan yam loo, omiogi lobo-nono luŋ kede boma luŋ ame tye i lobo-nono.

³⁴Jo a Gad te gero Dibon, Atarot, Aroer,

³⁵Atrot-Copan, Jajer, Jogbeka,

³⁶Bet-nimara kede Bet-karan, ame gin boma ame ocecelo atek kede anok me gwoko romi.

³⁷Jo a Reuben ogero Kecbon Eleala, Kiriataim,

³⁸Nebo kede Baalmeon (nyiŋgi obino loko oko), kede Cibima; gin te cako nyiŋ boma ame ogero-nono apat.

³⁹Jo a Makir wot a Manace te wot i lobo Gilead, ote mayo oko, ote ryemo jo Amor ame onwoŋo bedo iye oko,

⁴⁰Muca te miyo Gilead baŋ Makir wot a Manace, en te cako bedo iye.

⁴¹Jair te wot mayo boma atitino luŋ, te cako nyiŋgi ni, Kavotjair.

⁴²Noba te wot mayo Kenat kede paco atino luŋ a tye i ŋete, te cako nyiŋgi ni Noba, bala nyiŋe en ikome.