Read lango Wel 33 Bible Online

Wel 33 - lango bible

Wel 33

¹Man en kite ame jo Icrael rik obedo kokoba kede wotgi i kare ame gin oya i lobo me Miciri, owoto atekere atekere, kun Muca kede Aron telo wigi,

²Muca rik obedo coyo nyiŋ kan ame gin ya iye kun omedde i wotgi, kite ame Rwot ocikogi kede. Man en kite ame gin obedo medde kede i wotgi, kun lubere i kabedo luŋ ame gin obedo ya iye.

³Gin oya i Ramecec i nino dwe apar wie abic me dwe me agegi i kom nino ame lubo nino me Kato, en ame jo Icrael ocako wotgi iye kun owoto wot me loc, i nyim jo Miciri luŋ.

⁴Jo Miciri onwoŋo tye ayiko itino kaogi, ame Rwot obedo neneko ikinagi: Rwot daŋ oŋolo kop i kom obaŋegi luŋ.

⁵Jo Icrael rik te ya i Ramecec kittono, ote guro kemagi i Cukot.

⁶Gin oya i Cukot, ote wot guro kemagi i Etam, ame tye i pet tim.

⁷Gin oya i Etam, ote dok wirre dok cen i Pi-kakirot ame tye i tuŋ to me Baal-jepon; ote wot guro kemagi i nyim Migdol.

⁸Gin te ya oko i nyim Kakirot ote beo i dye nam, ote tuno i tim. Gin owoto wot me nino adek i dye tim me Etam, ote wot guro kemagi i Mara.

⁹Gin oya i Mara, ote bino i Elim. Iyi Elim rik ote nwoŋo iye waŋ akoŋ apar wie aryo, kede otit pyerabiro, gin te guro kemagi kuno,

¹⁰Gin oya i Elim ote wot guro kemagi i Nam Arema.

¹¹Gin oya i ŋet nam Arema, ote wot guro kemagi i ŋet tim i Cin.

¹²Gin oya i tim me Cin, ote wot guro kemagi i Dopika.

¹³Gin oya i Dopika, ote wot guro kemagi i Aluc.

¹⁴Gin oya i Aluc, ote wot guro kemagi i Repidim kan ame pii me amata a jo obedo mom iye.

¹⁵Gin oya i Ripidim, ote wot guro kemagi i tim me Cinai.

¹⁶Gin dok te ya i tim me Cinai, ote wot guro kemagi i Kibrot-atava.

¹⁷Gin oya i Kibrot-atava, ote wot guro kemagi i Kajerot.

¹⁸Gin te ya i Kajerot, ote wot guro kemagi i Ritma.

¹⁹Gin te ya i Ritma, ote wot guro kemagi i Rimmonperej.

²⁰Gin oya i Rimmonperej, ote wot guro kemagi i Libini.

²¹Gin oya i Libna, ote wotguro kemagi i Ricca.

²²Gin oya i Ricca, ote wot guro kemagi i Kekelata.

²³Gin oya i Kekelata, ote wot guro kemagi i kidi me Ceper.

²⁴Gin oya i kidi me Ceper ote wot guro kemagi i Karada.

²⁵Gin oya i Karada, ote wot guro kemagi i Makelot.

²⁶Gin oya i Makelot, ote wot guro kemagi i Takat.

²⁷Gin oya i Takat, ote wot guro kemagi i Tera.

²⁸Gin oya i Tera, ote wot guro kemagi i Mitka.

²⁹Gin oya i Mitka, ote wot guro kemagi i Kacmona.

³⁰Gin oya i Kacmona, ote wot guro kemagi i Mocerot.

³¹Gin oya i Mocerot, ote wot guro kemagi i Bene-jaakan.

³²Gin oya i Bene-jaakan, ote wot guro kemagi i Koraggidgad.

³³Gin oya i Koraggidgad, ote wot guro kemagi i Jotbata.

³⁴Gin oya i Jotbata, ote wot guro kemagi i Abrona.

³⁵Gin oya i Abrona, ote wot guro kemagi i Ejiongeber.

³⁶Gin oya i Ejiongeber, ote wot guro kemagi i tim me Jin (ame en Kadec).

³⁷Gin oya i Kadec, ote wot guro kemagi i ŋet waŋ lobo me Edom.

³⁸Aron alamdog te yitto malo i wi kidi me Kor kite ame Rwot onwoŋo ociko, te wot to oko kuno, i mwaka me pyeraŋwennere ame jo Icrael oya kede i Miciri, i nino dwe acel, me dwe me abic,

³⁹Mwaka me dit Aron onwoŋo doŋ oromo mia acel kede pyeraryo wie adek i kare ame en to i wi kidi.

⁴⁰Abaka Arad, ame en dano me Kanaan ame onwoŋo bedo i Negeb i lobo me Kanaan, te winyo pi bino a jo Icrael.

⁴¹Gin dok te ya ite kidi me Kor, ote wot guro kemagi Jalmona.

⁴²Gin oya i Jalmona, ote wot guro kemagi i Punon.

⁴³Gin oya i Punon, ote wot guro kemagi i Obot.

⁴⁴Gin oya i Obot, ote wot guro kemagi Iyeabarim i lobo me Moab.

⁴⁵Gin oya iyim, ote wot guro kemagi i Dibon-gad.

⁴⁶Gin oya i Dibon-gad, ote wot guro kemagi i Almon-diblataim.

⁴⁷Gin oya i Almondiblataim, ote wot guro kemagi i kidi me Abarim, ame tye i nyim Nebo,

⁴⁸Gin te ya i lobo obedo kidikidi me Abarim, ote wot guro kemagi i bar me Moab i ŋet Jordan i Jeriko.

⁴⁹Gin oguro kemagi i ŋet Jordan cakere i Bet-jecimot tuno naka i Abel-citim ame tye i bar me Moab.

⁵⁰Rwot te kobbi Muca i bar me Moab i ŋet Jordan ame otikere Jeriko ni,

⁵¹“Kobbi jo Icrael ni, ‘Ka idokoro wunu Jordan, ikato wunu i lobo me Kanaan,

⁵²ibino wunu ryemo jo ame bedo i lobo-nono oko luŋ i nyimwu; ibino babalo wunu kidigi luŋ ogogoro cal i komgi, kede jogigi luŋ ame otwako atwaka ibino wunu daŋ mumuko ka woro jogigi me awora ame tye i wi kiddi.

⁵³Lobo-nono doŋ te bedo megwu, ibino bedo wunu iye. Atyeko doŋ miyo lobo-nono oko me bedo megwu.

⁵⁴Ibino poko wunu lobo-nono i kwir kun lubo kite ame doggolawu tye kede. Atekere ame jo mere pol bino nwoŋo lobo alac me bedo megi, eka atekere ame jo mere nok, te daŋ nwoŋo lobo anok me bedo megi; kan ame kwir opoto iye i kom dano moro, mannono bino bedo mege. Ibino nwoŋo wunu lobo kun lubo doggola a kwariwu.

⁵⁵Cite ka mom iryemo wunu jo ame bedo i lobo-nono oko i nyimwu, jo ame wun iweko wunu odoŋŋono bino bedo calo gin acobo waŋwu dok acalo okuto ame cobo laŋetwu, gin bino yelowu i lobo ame ibedo wunu iye.

⁵⁶Gin ame onwoŋo amito timo i komgi, en ame abino timo i komwu.’ ”