Read lango Wel 35 Bible Online

Wel 35 - lango bible

Wel 35

¹Rwot okobbi Muca i bar me Moab ame tye i ŋet Jordan ame otikere i Jeriko ni,

²“Cik jo Icrael me mi jo Levi boma mogo, i kom lobo ame gin onwoŋo me bedo megi; eka ite miyo jo Levi barroro me kwat ame tye i ŋet boma-nogo.

³Boma ame bino bedo me a jo Levi me bedo kede bar ame bino bedo me kwayo dokgi kede limgi akwo karacel kede kit leyigi ocele luŋ.

⁴Bar luŋ ame imio wunu jo Levi, ame tye i ŋet bomagi, cakere i kom cel me bomagi, obino poro borrere bedo yadi mia abic, mano boma luŋ.

⁵Eka i oko i ŋe boma, obino poro ŋete ame tye tuŋ kide bedo yadi tutumia acel, eka laŋete me tutuŋ anyarolum yadi tutumia acel, kun nwoŋo boma tye i dyere; mannono bino bedo megi me kwat, pi bomagi luŋ.

⁶Boma ame ibino miyo baŋ jo Levi, bino bedo boma abicel me larre a jo ame oneko nek kan ame ibino yeyi wunu jo ame oneko nek riŋo laro, i bino daŋ medo miyo wunu boma ocele pyeraŋwen wie aryo i kom magi-nono.

⁷Boma luŋ ame ibino miyo wunu baŋ jo Levi, bino bedo pyerŋwen wie aboro, karacel kede bar me kwatgi.

⁸Ibino miyo wunu bomagi kun ikwanyo wunu i kom lobo ame omio jo Icrael me bedo megi; i baŋ atekere ame jo mere pol ibino kwanyo wunu abup, eka i baŋ atekere ame jo mere nok ite kwanyo wunu daŋ anok, kun atekere acel acel mio boma mere mogo baŋ jo Levi, kun mio ame poro kite ame gin omiogi kede lobo me bedo megi.”

⁹Rwot dok te kobo baŋ Muca ni.

¹⁰“Kobbi jo Icrael ni, Ka doŋ iŋolo wunu Jordan i kato wunu i Kanaan,

¹¹ibino yero wunu boma mogo me bed me larre a jo oneko nek, me wek jo ame oneko owotegi kun mom oneko me akaka, twero riŋo laro kuno.

¹²Boma-nogo bino bedo ka larrewu i ciŋ ocul kwor meremo, me wek ŋat ame oneko ŋattoro kur to tuno ka koŋ ocuŋ i nyim lwak pi ŋolo koppere.

¹³I kom boma ame ibino miyo wunuginono, abicel iye bino bedo megwu me laro jo oneko nek.

¹⁴Mi wunu bomanogo adek bed loka Jordan, eka adek te bedo i lobo me Kanaan, gin bino bedo boma me larre a jo oneko nek.

¹⁵Boma abicellono bino bedo me larre a jo Icrael kede pi arok kede wele ame bedo i akinagi, me wek dano ame oneko ŋattoro kun mom oneko me akaka, myero riŋ lar kuno.

¹⁶“Cite ka ce ogoo dano i nyonyo, oreto piny te daŋ to oko, dano-nono nwoŋo anek; anek, obino neko oko.

¹⁷Aco ka ocelo dano i kidi ame onwoŋo omako i ciŋe, kidi ame onwoŋo romo neko dano, eka te celo neko oko, dano-nono daŋ anek, anek obino neko oko.

¹⁸Onyo ka ce ogoo ŋattoro kede yat ame onwoŋo omako i ciŋe, yat ame onwoŋo romo neko dano, danonono te to oko, mannono daŋ nwoŋo anek; anek, obino neko oko.

¹⁹Dano ame culo kwor meremo ata en ikome ame bino neko ŋat oneko danonaca; ka orwatte kede myero neke oko.

²⁰Ka ce ocobo dano moro pi adagadaga moro, onyo ocele acela, kun nwoŋo okie akia, eka dano-nono te to oko,

²¹onyo odoŋe adoŋa kede ciŋe pi adagadaga moro ame onwoŋo tye i akinagi, eka dano-nono te to oko, ŋat ame odoŋe-nono obino neko oko; dano-nono anek. Ŋat ame culo kwor meremo ata ikome, en ikome ame bino neke ka ce orwatte kede.

²²“Ento ka ce ocobe oyotoyot kun onwoŋo amone moro gire mom, onyo ka ocele i ginnoro kun mom okie akia,

²³onyo ocele i gweŋŋoro ame onwoŋo romo neko dano, kun mom oneno, eka dano nono te to oko, ka yam en mom akworrere, dok daŋ onwoŋo mom oyiko kopporo arac i kome;

²⁴lwak bino ŋolo kop i akina ŋat oneko nek kede acul kwor meremo kun olubo cik megi.

²⁵Lwak bino laro ŋat oneko nek i ciŋ acul kwor meremo ato. Lwak bino dwoke i boma ame en rik onwoŋo oriŋo olaro. En bino bedo kuno atwal, tuno waŋ ame alamdog adwoŋ ame owiro kede moo oto.

²⁶Ento ka ce i nino moro anek oya oko i boma ame onwoŋo elaro te kato wan apokki me boma-nono,

²⁷ka ce acul kwor meremo a ŋat a rik oto oneko dano man, roccoro meremo mom bino bedo i wie.

²⁸Pien dano-nono myero bed i boma me larre tuno waŋ ame alamdog adwoŋ oto; i ŋe to alamdog adwoŋ, anek doŋ twero dok ceŋ i lobo ame rik onwoŋo obedo lobo mere me anywalli.

²⁹“Magi luŋ doŋ bino bedo cik baŋwu kede kop ame doŋ otyeko ŋolo naka i kare ikwaewu luŋ i kabedo ame ibino bedo wunu iye luŋ.

³⁰Ka ce ŋattoro oneko dano, obino neko ŋat oneko dano-nono kun nwoŋo ocuŋ i kop ocaden, cite mom obino neko dano moro pi kop acaden acel.

³¹Dok mom obino gamo limmoro me kokoro ŋat oneko dano ka ce balere onwoŋo romo to; obino neko dano-nono aneka.

³²Dok daŋ myero kur gam limmoro me lakoro dano ame oriŋo olaro boma me larre, me wek kur ye en dwog i lobo mere kun alamdog adwoŋ pwod kwo.

³³Mom ibino wunu balo lobo ame ibedo wunu iye; pien remo balo lobo, dok mom tye ginnoro ame twero kwanyo bal i lobo pi remo ame nwoŋo oony iye, kono ka remo a ŋat oneko dano-nono keken en ame twero kwanyo.

³⁴Kur ibal wunu lobo ame ibedo wunu iye kun an daŋ abedo iye i akinawu; pien an a Rwot ame abedo i akina a jo Icrael.”