Read lango Wel 4 Bible Online

Wel 4 - lango bible

Wel 4

²“Kwan wel awobe a Kokat i akina jo Levi kun ilubo doggolagi kede doggola a kwarigi

³cakere i kom jo ame mwaka me ditogi oromo pyeradek naka i kom jo ame mwaka me ditogi oromo pyerabic, jo luŋ ame romo donyo i tiyo tic ame tye i kema me rwatte.

⁴Tic ame awobe a Kokat bino tiyo i kema me rwatte ene; gin bino tic i kom jami acil meicel.

⁵Kare ame kema doŋ bino cako wot. Aron kede awobe mere en ame bino donyo i kema me gonyo boŋo me gera: Nyiŋ lim me kare-nono icika kede wumo canduk me kop me caden.

⁶Gin bino dok lutogi iyi cao ame okwoo i lao dyegi eka ote peto boŋo ame kome luŋ obedo bululu bululu i kom mannono, gin doŋ te rwako ludi iye.

⁷Gin bino peto boŋo obedo bululu bululu i kom meja me ogati me aketa i nyim Rwot, gin doŋ te keto cani i wie, kede tabo me odok akur, kede weer, kede cupa me liyo mot amata; ogati me nino luŋ daŋ myero bed i wie.

⁸Eka ote doŋ peto boŋo arema i wie, ote dok luto i cao ame okwoo i lao dyegi, ote doŋ rwako ludi iye.

⁹Obino dok kwanyo boŋo obedo bululu bululu ote wumo i gicibo mac tara, karacel kede tara mere, kede makaccere, kede cani mere, kede tabo moo luŋ.

¹⁰Gin bino boyo oko karacel kede jami ticcere luŋ kun tye iyi cao okwo i lao dyegi ote doŋ keto i wi ludi me tiŋo.

¹¹Obino peto boŋo obedo bululu bululu i kom keno lam me jabu, eka ote luto oko iyi cao ame okwo i lao dyegi, ote doŋ rwako ludi mere iye.

¹²Gin bino kwanyo jami ame otio kedgi i kabedo acil luŋ, te ketogi luŋ i boŋo ame obedo bululu bululu, ote dok wumo oko i lao dyel, ote doŋ pyelo i wi ludi me tiŋogi.

¹³Gin te jobo buru i keno me lam oko, ote peto boŋo ame obedo amaramar i wie;

¹⁴ote daŋ keto iye jami tic i keno lam luŋ, jami ame otio kede, weer me waŋo mac, acob riŋo, atok buru kede becen, jami tic i keno me lam luŋ; ote dok wumo oko i lao dyel, ote doŋ rwako ludi mere.

¹⁵Kare ame Aron kede awobe mere doŋ otyeko wumo kabedo acil karacel i jami luŋ me kabedo acil i kare ame gin kobo gonygi oko, awobe a Kokat doŋ bino bino me tino, cite gin myero kur gudde i kom jami luŋ acil, me gin kur to. Maginono en jami me kema me rwatte ame awobe a Kokat bino tiŋo.

¹⁶“Eleajar wot Aron alamdog en ame bino loyo moo tara, odok akur, kede mot moko kwon me yalo Obaŋa nino ducu, kede moo wir, kun daŋ dok loo kom kema luŋ kede jami luŋ a bedo iye, kabedo acil kede jami luŋ ame otio kede.”

¹⁷Rwot dok te kobo baŋ Muca kede Aron ni,

¹⁸“Kur iwek: atekere me doggola a jo Kokat to tum oko i akina jo Levi,

¹⁹ento myero itimgi kit man me wek gin bed kwo, kun mom oto i kare ame gin bino noko jami acil meicel aceggi: Aron kede awobe mere en ame bino donyo te wot nyutti ŋat acel acel ticcere kede yeccere ame en bino tiŋo.

²⁰Ento gin myero kur dony iye me wot neno kom jami acil kadi acel, me gin kur to.”

²¹Rwot dok te kobo baŋ Muca ni,

²²“Kwan daŋ wel awobe a Gercon, kun ilubo i doggolagi kede doggola a kwarigi;

²³cakere i kom jo ame mwaka me ditogi romo pyeradek naka i kom jo ame mwaka me ditogi romo pyerabic, jo luŋ ame romo donyo i tiyo tic ame tye i kema me rwatte.

²⁴Tic ame jo doggola a Gercon bino tiyo ene, tic me atia kede tic me tino yec,

²⁵Gin bino tiŋo cuka me kema, kede ke ma me rwatte kede gi-wumo wie, kede lao dyegi okwoo me wumo wie malo, kede cuka me geŋo doggola ke ma me rwatte,

²⁶kede cuka me aŋaba me dyekal, kede cuka me geŋo doggola me dyekal ame oguro kema kede keno lam, kede lollege, kede me tic luŋ ame otio kede iye; gin bino tiyo tic luŋ ame mitte i kom jami-nono.

²⁷Awobe a Gercon bino tiyo ticgi luŋ kite ame Aron kede awobe mere ocikogi kede i kom jami luŋ ame gin bino tiŋo, kede ginnoro luŋ ame gin bino tiyo; dok daŋ yin en ame ibino poko yecgi luŋ ame gin bino gwoko.

²⁸Man en tic ame jo me doggola a Gercon bino tiyo i kema me rwatte; dok Itamar wot Aron alamdog, en ame bino loyo ticgi.

²⁹“Awobe a Merari daŋ ibino kwano welgi kun ilubo i doggolagi doggola kede doggola a kwarigi;

³⁰cakere i kom jo ame mwaka me ditogi oromo pyeradek naka i kom jo ame mwaka me ditogi oromo pyerabic, jo luŋ ame romo donyo i tiyo tic ame tye i kema me rwatte.

³¹Man en gin ame gin bino tiyo, acalo ticgi luŋ i kema me rwatte; bayi me kema luŋ, kede arii mege luŋ, pagi mege luŋ, acib tergi luŋ,

³²kede pagi luŋ ame oguro dyekal, kede acib tergi luŋ, kede leke luŋ me gurogi, kede tollege, kede jami me tic luŋ ame otio kede iye, kede ginnoro ocele luŋ ame otio i tic ducu. Yin ibino pokkigi jami ame omito ni gin tiŋ kun inyutogi i nyiŋgi.

³³Man en tic ame jo me doggola a Merari bino tiyo i kema me rwatte; dok Itamar wot alamdog Aron, en a bino loyo ticgi.”

³⁴Muca kede Aron karacel kede otel a lwak okwano wel a jo Kokat kun lubo i doggolagi, kede doggola a kwarigi,

³⁵cakere i kom jo ame mwaka me ditogi oromo pyeradek naka i kom jo ame mwaka me ditogi oromo pyerabic, jo luŋ ame romo donyo i tiyo tic ame tye i kema me rwatte;

³⁶welgi luŋ ame okwano kun olubo i doggola i doggola oromo tutumia aryo kede mia abiro kede pyerabic nono.

³⁷Man en wel a jo me doggola a Kokat luŋ ame tio tic i kema me rwatte, ame Muca kede Aron okwano welgi, kite a Rwot rik ociko kun kobo baŋ Muca.

³⁸Wel awobe a jo me doggola a Gercon kun lubere i doggolagi kede doggola a kwarigi,

³⁹cakere i kom jo ame mwaka me ditogi oromo pyeradek naka i kom jo ame mwaka me ditogi oromo pyerabic, jo luŋ ame romo donyo i tiyo tic ame tye i kema me rwatte,

⁴⁰welgi luŋ ame okwano kun olubo i doggola i doggola oromo tutumia aryo kede mia abicel kede pyeradek nono.

⁴¹Man en wel a jo doggola a Gercon luŋ ame tio tic i kema me rwatte, ame Muca kede Aron okwano welgi, kite a Rwot ociko kun kobo baŋ Muca.

⁴²Wel awobe a jo me doggola a Merari kun lubere i doggolagi kede doggola a kwarigi,

⁴³cakere i kom jo ame mwaka me ditogi oromo pyeradek naka i kom jo ame mwaka me ditogi oromo pyerabic, jo luŋ ame romo donyo i tiyo tic ame tye i kema me rwatte,

⁴⁴welgi luŋ ame okwano kun olubo i doggola i doggola oromo tutumia adek kede mia aryo nono.

⁴⁵Man en wel jo me doggola a Merari luŋ ame tio tic i kema me rwatte ame Muca kede Aron okwano welgi, kite a Rwot rik ociko kun kobo baŋ Muca.

⁴⁶Jo luŋ ame okwano i akina jo Levi, ame rik Muca kede Aron karacel kede otel a jo Icrael okwano, kun lubere i doggolagi kede doggola a kwarigi,

⁴⁷cakere i kom jo ame mwaka me ditogi oromo pyeradek naka i kom jo ame mwaka me ditogi oromo pyerabic, jo luŋ ame romo donyo i tiyo tic ame tye i kema me rwatte,

⁴⁸jo ame okwano i akinagi, welgi oromo tutumia aboro kede mia abic kede pyeraboro nono.

⁴⁹Rik ore poko tic kite a Rwot ociko kun kobo baŋ Muca, ŋat acel acel ote miyo ticcere ame en tio onyo jami ame en tiŋo. Muca rik te kwano welgi kittono, kite a Rwot rik ocike kede.