Read lango Wel 5 Bible Online

Wel 5 - lango bible

Wel 5

¹Rwot dok te kobo baŋ Muca ni,

²“Cik jo Icrael mi odobo ya oko i gony, kede ŋat acel acel ame tut mollo i kome kede ŋat acel acel ame odoko ŋat a cik ogeŋo pi gudo kom dano oto.

³Cwalgi owot oko, kadi co onyo mon, kun imiogi oya oko i gony, me gin kur bal gonygi ame an abedo iye i akinawunie.”

⁴Jo Icrael daŋ te timo kittono, gin te ryemogi oko i gony; kite a rik Rwot ociko kede Muca, gin otimo kittono.

⁵Rwot dok okobbi Muca ni,

⁶“Kobbi jo Icrael ni, Ka ce ico moro onyo dako moro otimo balloro ame jo balo kun gin oturo kede cik a Rwot, danonono nwoŋo oroco.

⁷En bino tuco bal ame etimo-nono; dok daŋ bino culo gin arac ame etimo-nono kun medo iye acel me abic, te miyo baŋ dano ame etimo gin arac baŋe-nono.

⁸Cite ka dano-nono mom tye i wattere moro ame myero cul waŋ gin arac ame otimo baŋe, obino doŋ culo waŋ gin arac ame otimo-nono baŋ Rwot pi alamdog, kun ogamo omedo i kom nyok romo me kwanyo bal ame otio i tic me kwanyo bal i kome.

⁹Mot luŋ onyo jami luŋ acil ame jo Icrael kelo baŋ alamdog bino bedo me alamdog.

¹⁰Jami luŋ acil ame dano acel acel mio, bino bedo mege; ginnoro luŋ ame dano-moro omio baŋ alamdog, bino bedo mege.”

¹¹Rwot dok okobo baŋ Muca ni,

¹²“Kobbi jo Icrael ni, Ka ce dako a lo moro ogak oko eka te timo timmoro ame turo cik me abor i nyim cware,

¹³ka omio lo moro obuto kede eka te bedo kun cware mom ŋeo, dok ŋattoro oneno daŋ gire mom kadi bed en oballe kene, acadennoro ame moko kop i kom dako-nono daŋ mom, pien ŋattoro onwoŋe iye mom tye;

¹⁴ka ce cunnyoro me nyeko te mako ico, kun nyeko make i kom cege ame oballe kene-nono, onyo ka cunnyoro me nyeko omako ico i kom dako mere kun kono dako gire mom oballe.

¹⁵Ico bino tero dako mere baŋ alamdog, kun tero daŋ mot me yalo Obaŋa ame mitte pi dako mere-nono. En bino tero moko kwon gwata acel me moko cayiri; mom bino onyo moo iye, mom daŋ bino keto odok luban iye, pien mano mot me moko kwon ame omio me nyeko, en obedo mot moko kwon ame omio me poyo ballono.

¹⁶“Alamdog bino tero dannono aceggi, te keto i nyim Rwot.

¹⁷Alamdog dok bi no tero pii acil i gulu ame ocweo i lobo, eka te juko apua moro i piny i dye kema, te onyo i pii.

¹⁸Alamdog bino keto dako-nono i nyim Rwot, bino gonyo yer wi dako-nono weko ony iyak, te keto mot me moko kwon me me po i ciŋe, ame obedo mot moko kwon ame omio pi nyeko. Alamdog bino mako pii akec me ceno jo i ciŋe.

¹⁹Alamdog te miyo dako-nono kwon kun kobo ni, ‘Ka ce lo moro mom obuto kedi, ka ce mom igak oko ite bale keni kun yin itye i te loc a cwari, Obaŋa myero kur ye ginnoro arac timere i komi pi pii akec me ceno jo-ni.

²⁰Cite ka ce onwoŋo igak oko kun pwod itye i te loc a cwari, ka ce iballe keni, ite miyo ico ocele a mom obedo cwari obuto kedi,

²¹(alamdog bino miyo dako-nono kwoŋo kwoŋ kun cenne kene, eka te kobbi dako-nono ni,) Rwot myero mi idok ŋat ame jo turwu tio kede nyiŋ i ka gin kwoŋere, i kare ame Rwot bino miyo amuruni twil oko kun yii daŋ deŋ;

²²wek pii me ceno jo-ni odony naka iyi amontenni, omi yii deŋ, eka te twilo amuruni oko.’ Dako te gamo ni ‘Amen, Amen.’

²³“Alamdog doŋ te coyo kop me kwoŋŋono i buk, te lwoko yino mere oko i pii akec ca,

²⁴eka te miyo dakonono mato pii akeccono, pii ame oceno i jo, te donyo naka i yie, te miye twon rem a mom kobere.

²⁵Alamdog dok te kwanyo mot moko kwon ame omio pi nyeko i ciŋ dako-nono, te yoko mot moko kwonnono i nyim Rwot, te doŋ tero i keno lam.

²⁶Alamdog te juko moko kwonnono poŋ ciŋe acel, te waŋo i keno lam, obed me po i kome, en dok te miyo dako-nono mato pii.

²⁷A doŋ otyeko miye mato pii oko, ka ce onwoŋo en otyeko bale kene kun otimo timmoro ame turo cik me abor i nyim cware, pii me ceno jo-nono bi no donyo iyi amontennere te miye twon rem a mom kobere; yie te den oko, anaka amuru mere daŋ te twil oko, dako-nono te doko ŋat ame jo tio kede nyiŋe i kwoŋere i akina jo me turgi.

²⁸Cite ka dannono gire onwoŋo mom otimo bal, ginnoro arac mom bino timere i kome, dok daŋ bino nywalo itino.”

²⁹Man en cik a mako kop me nyeko, ka ce dako ame pwod tye i te loc a cware, ogak oko kun balle kene,

³⁰onyo ka ce cunnyoro me nyeko omako ico, kun make i kom dako mere, en bino keto dako i nyim Rwot, alamdog bino tic i kom dako kun lubo cik man luŋ.

³¹Ico gire mom bino bedo i balloro, ento bal bino dok i wi dako ka ce onwoŋo obalo.