Read lango Wel 6 Bible Online

Wel 6 - lango bible

Wel 6

¹Rwot dok okobo baŋ Muca ni,

²“Kobbi jo Icrael ni, Ka ce lo moro onyo dako moro okwoŋo kwoŋ a pire tek, kwoŋ me bedo dano akwera, ŋat ame opokere kene oko baŋ Rwot,

³en myero daŋ pokere oko i koŋo kede kit mat ocele luŋ ame mero dano; en myero kur mat koŋo olok awac onyo kit koŋo moro ocele ame mero dano, mom daŋ bino mato pig olok, akadi camo nyige adyaka onyo otwo.

⁴Pi kare luŋ ame nwoŋo en opokere kene baŋ Rwot, en mom bino camo ginnoro ame oya i kom olok, akadi nyige atitino mere i yie onyo poke.

⁵“Pi kare luŋ ame nwoŋo en pwod tye i kwonere me pokere kene baŋ Rwot, mom bino gudo wie, tuno ka kare me kwoŋŋere-nono doŋ otum, en gire bino bedo dano acil; bino weko yer wie yuggo ibim.

⁶“Pi kare luŋ ame nwoŋo en opokere kene baŋ Rwot, en mom bino noko kom dano oto ceggi.

⁷En mom bino bale te doko ŋat a cik ogeŋo kadi kom pi pappere, onyo tottere, onyo ominnere, onyo aminnere, ka ce gin oto, pien pokere mere kene baŋ Rwot nwoŋo pwod tye i wie.

⁸Pi kare luŋ ame nwoŋo en pwod opokere kene, nwoŋo en obedo dano acil baŋ Rwot.

⁹“Ka ce ŋattoro otulle atula i laŋete, ame te miyo en balo wie ame okwero, en bino lyelo wie oko i nino me lonyere mere; bino lyelo i nino me abiro.

¹⁰I nino me aboro mere en bino tero amam aryo onyo itino awele aryo baŋ alamdog i doggola kema me rwatte.

¹¹Alamdog bino miyo acel pi mot me bal kede acel me mot awaŋa, kun tio tic me kwanyo bal i kom dano-nono, pien nwoŋo obalo pi gudo kom dano oto. En dok bino cako kwero wie i nino-nono ikome,

¹²te dok pokere pire kene me bedo dano a Rwot pi kare luŋ ame nwoŋo en pwod opokere, bino daŋ kelo atin nyok romo ame dittere oromo mwaka acel me bed mot yalo Obaŋa me walakino i roc; cite kare mere me agege ca nwoŋo doŋ oballe oko, pien en odoko ŋat a cik ogeŋo, pien pokere mere kene nwoŋo rik oballe oko.

¹³“Man en cik a mako dano akwera ame kare mere me pokere kene doŋ otum. Obino kelo i doggola kema me rwatte,

¹⁴en bino yalo Rwot i mottere, atin nyok romo acel ame dittere oromo mwaka acel me mot me bal kede nyok romo acel kun roccoro daŋ mom ikome, mano bino bedo mot awaŋa; kede akale acel kede nyok romo acel romo a roccoro mom i kome, me mot kweyo cuny,

¹⁵karacel i dita me ogati a mom orubo i tobi, capat me moko kwon apwottere ame orubo kede moo, kede capat areppere ame mom orubo i tobi, ame oweo moo i komgi, kede mot me moko kwon kede motgi me amata.

¹⁶Alamdog bino terogi i nyim Rwot te miyo mot me ballere kede mot awaŋa,

¹⁷eka dok te miyo nyok romo me bed mot me kweyo cuny Rwot, karacel kede dita ogati a mom orubo i tobi. Alamdog dok te miyo mot me moko kwon kede mot amata.

¹⁸Dano okwero-nono bino lyelo yer wie ame onwoŋo okwero-nono i doggola kema me rwatte, te coko yer wie-nono keto i mac ame tye i te mot me kweyo cuny.

¹⁹Alamdog bino kwanyo bad nyok romo a doŋ otedo oko, kede capat acel a mom orubo i tobi iyi dita me ogati a tobi mom iye, kede capat areppere acel a mom orubo i tobi, te ketogi luŋ i cuny ciŋ dano akwera, kare ame nwoŋo doŋ olyelo yer wie me akwera oko.

²⁰Alamdog bino yokogi luŋ me bedo mot ayoka i nyim Rwot; magi-nono iner alamdog acillege, karacel kede ogok ame oyoko, kede amuru ame omio; dano akwera doŋ twero mato koŋo olok.

²¹“Man en cik a mako dano akwera ame okwoŋo kwoŋ. En bino miyo mottere baŋ Rwot ame oporo kwoŋŋere ame en onwoŋo okwoŋo me bedo dano akwera, karacel kede gin ame en romo nwoŋo; en bino timo kun lubo cik me pokere mere acalo dano akwera kun daŋ lubere i kwoŋŋere.”

²²Rwot okobbi Muca ni,

²³“Kobbi Aron kede awobe mere ni, Ibino wunu lamo gum i kom jo Icrael kit man: ibino wunu kobo baŋgi ni,

²⁴Rwot myero omiwu gum, dok daŋ ogwokwu;

²⁵Rwot omi waŋe oryeny i komwu, otimwu ber;

²⁶Rwot otiŋ waŋe i komwu, omiwu kuc.

²⁷“Gin bino keto nyiŋa kittono i kom j Icrael, an abino miyogi winyo.”