Read lango Wel 7 Bible Online

Wel 7 - lango bible

Wel 7

¹I nino ame rik Muca otyeko guro iye kema, owiro kede moo, dok daŋ okwero oko karacel kede jami mere luŋ.

²I kare-nono otel a jo Icrael ame gin odoŋe me doggola a kwarigi, otel me atekere ame loo jo ame okwano welgi,

³gin omio motgi ote kelo i nyim Rwot. Gin omio gadigadi abicel ame tye kede awum wigi, kede twoni apar wie aryo; otel aryo aryo omio gadigadi acel acel, kun ŋat acel acel mio twon acel acel; gin omio mano luŋ i nyim kema.

⁴Rwot te kobbi Muca ni,

⁵“Gam jamigi-nono luŋ i baŋgi me ti kedgi pi tic ame tye i kema me rwatte; mi jami-nono luŋ baŋ jo Levi, kun imio baŋ ŋat acel acel kite a ticcere tye kede.”

⁶Mano en omio Muca te gamo gadigadi luŋ kede twoni, te miyo baŋ jo Levi.

⁷Omio gadigadi aryo kede twoni aŋwen baŋ awobe Gercon ame oporo ticgi;

⁸dok te miyo gadigadi aŋwen kede twoni aboro baŋ awobe a Merari, ame oporo ticgi, kun gin luŋ tye i loc Itamar wot Aron alamdog.

⁹Ento mom omio moro baŋ awobe a Kokat, pien gin rik onwoŋo oketogi i tic me gwoko jami acil ame myero gin tiŋgi i wi gwokgi.

¹⁰Otel te miyo mot kwero keno lam i nino ame owiro kede moo-nono; otel omio motgi i nyim keno me lam.

¹¹Rwot dok te kobo baŋ Muca ni, “Gin bino miyo motgi kun atel wic acel acel mio mere i nino mere kene, me kwero keno lam.”

¹²Ŋat a rik te geyo miyo mottere i nino me agege obedo Nacon wot Aminadab, me atekere a Juda.

¹³En omio cani ryal ame pekkere romo cekel mia acel kede pyeradek, kede becan ryal acel ame pekkere romo cekel pyerabiro, ka oporo i cekel me kabedo acil; gin aryo luŋ onwoŋo moko kwon apwottere ame orubo kede moo, tye opoŋ yigi, me mot me moko kwon.

¹⁴Dok te miyo daŋ tabo jabu acel ame pekere romo cekel apar, ame odok akur opoŋ yie;

¹⁵kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa

¹⁶kede dok nyok dyel acel me mot me bal.

¹⁷En te daŋ dok miyo twoni aryo, nyogi romi abic, nyogi dyegi abic, kede itino nyogi romi abic ame mwaka me ditogi oromo acel acel pi mot me kweyo cuny. Man en mot ame rik Nakucon wot Aminadab omio.

¹⁸I nino me aryo mere, Netanel wot a Juar ame obedo atel a jo Icakar en ate miyo mege.

¹⁹En rik te miyo me mottere, cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo oporo kede cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon,

²⁰Dok te miyo daŋ tabo jabu acel ame pekkere romo cekel apar ame odok akur opoŋ yie;

²¹kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa;

²²kede dok nyok dyel acel me mot me bal.

²³En te daŋ dok miyo twoni aryo, nyogi rommi abic, nyogi dyegi abic kede itino nyogi romi abic, ame mwaka me ditogi doŋ oromo acel acel, pi mot me kweyo cuny. Magi gin, mot ame rik Netanel wot a Juar omio.

²⁴I nino me adekkere, Eliab wot a Kelon ame obedo atel a jo Jabulon te miyo mege.

²⁵En rik te miyo mottere cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo oporo i cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon.

²⁶Dok te miyo daŋ tabo jabu acel ame pekkere romo cekel apar, ame odok akur opoŋ yie;

²⁷kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa;

²⁸kede dok nyok dyel acel me mot me bal.

²⁹En daŋ dok te miyo twoni aryo, nyogi romi abic, nyogi dyegi abic, kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi gin mot ame rik Eliab wot a Kelon omio.

³⁰I nino me aŋwennere, Elijur wot a Cedeur ame obedo atel a jo Reuben te miyo mege,

³¹En rik te miyo mottere cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo oporo i cekel me kabedo acil; gin aryo luŋ nwoŋo moko kwon apwottere ame orubo kede moo tye opoŋ yigi, me mot me moko kwon.

³²Dok te miyo daŋ tabo jabu acel ame pekkere romo cekel apar, ame odok akur opoŋ yie;

³³kede atin twon acel, kede nyok romo acel, kede atin nyok romo acel ame mwaka me dittere doŋ oromo acel, me mot awaŋa;

³⁴kede dok nyok dyel acel me mot me bal.

³⁵En te daŋ dok miyo twoni abic, nyogi romi abic, nyogi dyegi abic kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi en mot ame rik Elijur wot a Cedeur omio.

³⁶I nino me abiccere, Celumiel wot a Jericadai ame obedo atel a jo Cimeon, te miyo mege.

³⁷En rik te miyo cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo oporo i cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon.

³⁸Dok te miyo daŋ tabo jabu acel ame pekkere romo cekel apar, ame odok akur opoŋ yie;

³⁹kede atin twon acel, kede nyok romo acel, kede atin nyok romo acel ame mwaka me dittere doŋ oromo acel, me mot awaŋa

⁴⁰kede dok nyok dyel acel me mot me bal.

⁴¹En te dok miyo twoni aryo, nyogi romi abic, nyogi dyegi abic kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi en mot ame rik Celumiel wot a Jericadai omio.

⁴²I nino me abiccellere Eliacap wot a Deuel ame obedo atel a jo Gad te miyo mege,

⁴³En rik te miyo cani ryal acel ame pekkere romo cekel mia acel kede pyeradek, kede becen ryal acel ame pekkere rom cekel pyerabiro, kun nwoŋo oporo i cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon.

⁴⁴Dok te miyo daŋ tabo jabu acel ame pekkere romo cekel apar, ame odok akur opoŋ yie;

⁴⁵kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa;

⁴⁶kede dok nyok dyel acel me mot me bal.

⁴⁷En te daŋ dok miyo twoni aryo, nyogi romi abic, nyogi dyegi abic kede itino nyogi rommi abic ame mwaka me ditogi doŋ oromo acel acel, pi mot me kweyo cuny. Magi en mot ame rik Eliacap wot a Deuel omio.

⁴⁸I nino me kany wie aryo mere, Elicama wot a Amikud ame obedo atel a jo Epraim te miyo mege.

⁴⁹En rik te miyo cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo oporo i cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon.

⁵⁰Dok te miyo daŋ tabo jabu acel ame pekkere romo cekel apar, ame odok akur opoŋ yie;

⁵¹kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa;

⁵²kede dok nyok dyel acel me mot me bal.

⁵³En te daŋ dok miyo twoni aryo, nyogi romi abic, nyogi dyegi abic kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi gin mot ame rik Elicama wot Amikud omio.

⁵⁴I nino me kany wie adekkere Gamaliel wot a Pedajur ame obedo atel a jo Manace te miyo mege.

⁵⁵En rik te miyo cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo olubo cekel me kabedo acil; gin aryo luŋ onwoŋo moko kwon apwottere ame orubo kede moo tye opon yigi.

⁵⁶Dok te miyo daŋ tabo jabu acel ame pekkere romo cekel apar, ame odok akur opoŋ yie;

⁵⁷kede atin twon acel, nyok romo acel, me mot awaŋa; romo acel ame mwaka me dittere doŋ oromo acel, me mot awaŋa;

⁵⁸kede dok nyok dyel acel me mot me bal.

⁵⁹En te daŋ dok miyo twoni aryo nyogi romi abic, nyogi dyegi abic kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi en mot ame rik Gamaliel wot a Pedajur omio.

⁶⁰I nino me kany wie aŋwennere, Abidan wot a Gideoni ame obedo atel a jo Benjamin te miyo mege,

⁶¹En rik te miyo cani ryal acel ame pekkere romo cekel mia acel kede pyeradek, kede becen acel ame pekkere romo cekel pyerabiro, kun nwoŋo oporo kede cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon.

⁶²Dok te miyo daŋ tabo jabu acel ame pekkere romo cekel apar, ame odok akur opoŋ yie;

⁶³kede atin twon acel, nyok romo acel kede atin nyok romo acel ame mwaka me dittere doŋ oromo mwaka acel, me mot awaŋa;

⁶⁴kede dok nyok dyel acel me mot me bal.

⁶⁵En te daŋ miyo twoni aryo, nyogi romi abic, nyogi dyegi abic kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi en mot ame rik Abidan wot a Gideoni omio.

⁶⁶I nino me tomonnere, Akiejer wot Amicadai ame obedo atel a jo Dan te miyo mege.

⁶⁷En rik te miyo cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo oporo kede cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon.

⁶⁸Dok te miyo daŋ tabo acel ame pekkere romo cekel apar, ame odok akur opoŋ yie;

⁶⁹kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa;

⁷⁰kede dok nyok dyel acel me mot me bal.

⁷¹En te daŋ dok miyo twoni abic, nyogi romi abic, nyogi dyegi abic kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi en mot ame rik Akiejer wot Amicadai omio.

⁷²I nino me apar wie acellere, Pagiel wot Okoran ame obedo atel a jo Acer te miyo mege.

⁷³En rik te miyo cani ryal acel ame pekkere romo cekel mia acel kede pyeradek, kede becen ryal acel ame pekkere romo cekel pyerabiro, kun nwoŋo oporo i cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon.

⁷⁴Dok te miyo daŋ tabo jabu acel ame pekkere romo cekel apar, ame odok opoŋ yie;

⁷⁵kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa;

⁷⁶kede dok nyok dyel acel me mot me bal.

⁷⁷En te daŋ dok miyo twoni aryo, nyogi romi abic, nyogi dyegi abic, kede itino nyogi romi abic ame mwaka me ditogi doŋ oromo mwaka acel acel, pi mot me kweyo cuny. Magi gin mot ame rik Pagiel wot a Okoran omio.

⁷⁸I nino me apar wie aryo mere, Akira wot Enan ame obedo atel a jo Naputali te miyo mege.

⁷⁹En rik te miyo cani ryal acel ame pekkere romo cekel mia acel kede pyeradek, kede becen ryal ame pekkere romo cekel pyerabiro, kun nwoŋo oporo kede cekel me kabedo acil; gin aryo luŋ onwoŋo moko kwon apwottere ame orubo kede moo tye opoŋ yigi, me mot me moko kwon.

⁸⁰Dok te miyo daŋ tabo jabu acel ame pekkere romo cekel apar, ame odok akur opoŋ yie;

⁸¹kede atin twon acel, nyok romo acel, kede atin nyok romo acel ame mwaka me dittere doŋ oromo acel, me mot awaŋa;

⁸²kede dok nyok dyel acel me mot me bal.

⁸³En te daŋ dok miyo twoni aryo, nyogi romi abic nyogi dyegi abic kede itino nyogi romi abic ame mwaka me ditogi doŋ oromo acel acel, pi mot me kweyo cuny. Magi en mot ame rik Akira wot Enan omio.

⁸⁴Magi en mot me kwero keno lam ame rik omio i nino ame owiro iye keno lam kede moo, ame otel a jo Icrael omio: cani ryal apar wie aryo, becen me ryal apar wie aryo, tabo jabu apar wie aryo,

⁸⁵kun cani me ryal acel acel pekkere romo cekel mia acel kede pyeradek, kede becen acel acel pekkere romo cekel pyerabiro nono. Pek a ryal me jami-nono luŋ te romo cekel tutumia aryo kede mia aŋwen kun nwoŋo oporo kede cekel me kabedo acil.

⁸⁶Tabo me jabu onwoŋo tye apar wie aryo ame odok akur opon yigi, kun acel acel pekkere romo cekel apar apar kun nwoŋo oporo i cekel me kabedo acil. Pek a jabu me tabo luŋ te romo cekel mia acel kede pyeraryo nono.

⁸⁷Lim akwo luŋ me mot awaŋa te romo twoni apar wie aryo, nyogi romi apar wie aryo, kede itino nyogi romi apar wie aryo ame mwaka me ditogi doŋ oromo acel acel karacel i motgi me moko kwon; kede nyogi dyegi apar aryo, me mot me bal.

⁸⁸Lim akwo luŋ me mot me kweyo cuny te romo twoni pyeraryo wie aŋwen, nyogi romi pyerabicel, nyogi dyegi pyerabicel, kede itino nyogi romi pyerabicel ame mwaka me ditogi doŋ oromo acel acel. Magi-nono en mot me kwero keno lam ame omio a doŋ otyeko wiro keno lam oko kede moo.

⁸⁹I kare ame Muca owoto i kema me rwatte me kop i Rwot, en owinyo dwonnoro ame onwoŋo tye akop kede kun ya i malo i wi kom-me-kica ame onwoŋo ocibo ocuŋ i wi canduk me kop me caden, kun kobo kede winyere i akina okerubi aryo.