Read lango Wel 8 Bible Online

Wel 8 - lango bible

Wel 8

¹Rwot okobbi Muca ni,

²“Kobbi Aron ni, Ka icibo tara malo, tara abiro bino lyel menyo nyim gi-cibo tara.”

³Aron daŋ te timo kittono; en ocwinyo tara te cibogi malo wek meny kan a tye i nyim gi-cibo tara, kite a rik Rwot ociko kede Muca,

⁴Man en kite ame otio kede gi-cibo tara. Rik otio i jabu ame oteto anyul; cakere i tere tuno kede naka iyi ature mere, onwoŋo oteto ateta kede anyul. Otio kun olubo cal a rik Rwot onyuto baŋ Muca.

⁵Rwot dok te kobbi Muca ni,

⁶“Kwany jo Levi oko i akina jo Icrael, eka te lonyogi.

⁷Kare ame doŋ ilonyogi, tim kit man: kirgi i pii me lwoko bal, migi olyel komgi oko luŋ i lyedi, olwok daŋ boŋŋigi oko, ote lonyere kengi.

⁸Migi okwany atin twon ocele karacel kede mot me moko kwoŋŋere me moko apwottere ame orubo kede moo, eka dok ite kwanyo atin twon ocele me mot bal.

⁹Ibino tero jo Levi i nyim kema me rwatte, kun lwak jo Icrael luŋ ocokere karacel.

¹⁰Ka imio jo Levi me mot baŋ Rwot jo Icrael bino keto ciŋgi i wi jo Levi,

¹¹eka Aron te miyo jo Levi i nyim Rwot me gin bed me mot ayoka ame oya i baŋ jo Icrael, me gin doŋ bed itiyo tic a Rwot.

¹²Jo Levi dok te keto ciŋgi i wi twoni, ote miyo acel me mot me bal, kede acel me mot awaŋa baŋ Rwot, me kwanyo bal i kom jo Levi.

¹³Ibino tero jo Levi i nyim Aron kede awobe mere, ite miyogi me mot, me gin bed acalo mot ayoka baŋ Rwot.

¹⁴“Ibino poko jo Levi i akina jo Icrael kittono, jo Levi doŋ bino bedo jo mera.

¹⁵Jo Levi doŋ bino donyo i tiyo tic ame tye i kema me rwatte ame nwoŋo doŋ ityeko lonyogi oko, dok daŋ imiyogi oko acalo mot ayoka.

¹⁶Pien otyeko miyogi oko baŋa i akina jo Icrael, kun omiogi akaka itino kao a jo Icrael luŋ ame ogeo yabo ot nyodo, an doŋ agamogi me bedo mega.

¹⁷Pien itino kao luŋ i akina jo Icrael, me a dano kede me leyi luŋ obedo mega, rik akwerogi oko me bedo mega i nino ame rik anek iye itino kao luŋ i Miciri.

¹⁸Atyeko doŋ kwanyo jo Levi me leyo kakargi, gin itino kao luŋ i akina jo Icrael.

¹⁹Dok daŋ atyeko miyo jo Levi baŋ Aron kede awobe mere acalo mot, kun gin doŋ ya oko i akina jo Icrael me tiyo tic pi jo Icrael i kema me rwatte, kede dok pi kwanyo bal i kom jo Icrael, me two moro arac kur pot i kom jo Icrael, pi noko kabedo acil aceggi.”

²⁰Muca kede Aron karacel kede jo Icrael rik daŋ te timo kittono i kom jo Levi; kite ame Rwot rik ociko kede Muca luŋ i kop a dok i kom jo Levi, jo Icrael daŋ otimo kittono i komgi,

²¹Jo Levi te lonyere kengi kengi i kom balgi, ote daŋ lwoko boŋŋigi; Aron te miyogi acalo mot ayoka i nyim Rwot, Aron te tiyo tic me kwanyo bal i komgi me wek gin bed ame olony.

²²Jo Levi te donyo i tiyo ticgi ame tye i kema me rwatte, kun okonyo Aron kede awobe mere kite a rik Rwot ociko kede Muca i kom jo Levi; gin daŋ rik te timo kittono.

²³Rwot dok te kobo baŋ Muca ni,

²⁴“Man en kop a mako jo Levi. Jo ame mwaka me ditogi oromo pyeraryo wie abic dok kede malo, jo-nono bino donyo i tiyo tic ame tye i kema me rwatte.

²⁵Ka mwaka me ditogi oromo pyerabic, gin bino weko ticgi-nono oko, mom dok obino medde i ticgi atwal.

²⁶Ento gin bino konyo omegogi ame tio i kema me rwatte me cobo ticgi kakare, cite mom obino tiyo tic ikome. Ibino timo jo Levi kittono i kom kop a mako ticgi.”