Read lango Wel 9 Bible Online

Wel 9 - lango bible

Wel 9

¹Rwot rik okobbi i Muca i tim me Cinai i dwe me agege me mwaka me aryo ame onwoŋo gin doŋ oya oko i lobo me Miciri kun kobbe ni,

²“Jo Icrael myero kwer ecuban me Kato i kare ame aciko.

³I nino dwe apar wie aŋwen me dwe man otyeno, ibino kwero wunu i kare ame ociko. Ibino kwero wunu kun ilubo wunu icwillere luŋ kede gin ame ociko luŋ.”

⁴Eka Muca daŋ rik te titti jo Icrael ni myero gin kwer Kato.

⁵Gin rik te kwero ecuban me Kato i dwe me agege, i nino dwe apar wie aŋwen otyeno i tim me Cinai; kite a rik Rwot ociko kede Muca luŋ, jo Icrael daŋ otimo kittono.

⁶Rik onwoŋo tye jo mogo ame cik onwoŋo ogeŋogi pi gudo kom dano oto, jo-nono rik mom twero kwero Kato i nino-nono. Gin rik te wot baŋ Muca kede Aron i ninonono,

⁷ote kobbe ni, “Wan giwa doŋ odoko jo a cik ogeŋo oko pi gudo kom dano oto, kara piŋo ogeŋowa miyo mot a Rwot karacel i jo Icrael i nino ame ociko?”

⁸Muca rik te kobo baŋgi ni, “Koŋ ikur wunu, me koŋ awiny gin ame Rwot bino ciko i komwu.”

⁹Rwot te kobbi Muca ni,

¹⁰“Ka ce ŋattoro i akinawu onyo i akina ikwaewu odoko ŋat a cik ogeŋo pi gudo kom dano oto onyo onwoŋo owoto kannoro abor, en gire pwod bino kwero ecuban me Kato a Rwot.

¹¹Gin bino kwero i dwe me aryo i nino dwe apar wie aŋwen otyeno; gin bino camo ogati a tobi mom iye kede pot dekkoro akec,

¹²Kur iwek wunu ginnoro doŋ tuno naka odiko, kur daŋ tur cogo mere moro; obino kwero kun olubo icwil luŋ a mako Kato.

¹³Cite dano ame cikkoro mom ogeŋo, dok daŋ mom owoto kannoro abor, ento mom dok te kwero ecuban me Kato, dano-nono waŋe bino rwenyo oko i akina jo turgi, pien mom omio mot a Rwot i kare mere ame ociko, ballere gire bino bedo i wie.

¹⁴Ka ce arokkoro ame bedo i akinawu, mito daŋ kwero ecuban me Kato a Rwot, en twero kwero kun lubo icwil me Kato kede gin ame ociko. Cik bino bedo acel keken pi arok kede pi anywalli me lobo.”

¹⁵I nino ame oguro iye kema a Rwot, en ame pol daŋ bino wumo iye kom kema oko, ame en kema me kop me caden; bino wumo wi kema oko otyeno kun nen calo mac naka odiko.

¹⁶Eka te bedo gire amanno didik, kun pol wumo wi kema dyeceŋ eka gin acalo mac te wumo dyewor.

¹⁷Ka pol owarre oko i wi kema, jo Icrael cako wotgi anyim, kan ame pol ocuŋ iye, jo Icrael guro kemagi kannono.

¹⁸Jo Icrael obedo cako wotgi kun olubo cik a Rwot dok daŋ obedo guro kemagi kun olubo cik a Rwot; ka ce pol pwod owumo wi kema a Rwot oko, gin omedde bedo gigi i gonygi.

¹⁹Kadi bed pol obedo wumo wi kemagi kare alac, gin jo Icrael daŋ medde gwoko gin a Rwot ociko, kun mom oya i kannono.

²⁰Kare ocele pol wumo wi kema pi nino anonok meicel, cite pi gwoko gin a Rwot ociko, gin daŋ obedo i gonygi, eka dok pi lubo cik a Rwot, gin oya oko i kannono.

²¹Kare ocele pol twero wumo wi kema cakere otyeno naka odiko, te warre oko, gin daŋ ote cako wot oko, onyo ka ce dok omedde pi nino ocele acel, kadi iwor acel, kare ame pol owarre kede keken, en ame gin daŋ cako wot iye.

²²Kadi bed ori i wi ke ma pi nino aryo, onyo dwe acel, onyo pi kare moro alalac ka ce pol pwod omedde wumo wi kema, kun bedo iye kannono, jo Icrael daŋ koŋ bedo i gonygi kun mom oya i kannono.

²³Gin oguro kemagi pi lubo gin a Rwot ociko, dok daŋ ocako wotgi pi lubo gin a Rwot ociko, kun ogwoko gin a Rwot ociko kite a rik ociko Muca.